Саранскойсэ «Защитники Отечества» фондонь филиалсонть панжовсь «Донбасс» фотовыставкась. Сон алтави Россиянть марто од регионтнэнь вейсэндявомань чинтень. Фотовыставканть панжомасо ульнесть фондонь филиалонь важодицятне, специальной военной операциянь ветерантнэ, «Российской газетань» важодицятне ды Саранск ошонь 30-це № школань кадеттнэ.

Выставкасонть весемезэ невтевить комсь фотографият. Весе сынь ёвтнить специальной военной операциянь исторической тевтнеде ды невтить Россиянь Федерациянь од территориятнесэ эрямонть – Херсонской, Запорожской областтнесэ ды истя жо Донецкой ды Луганской народной республикатнесэ. Фотографиятнень авторост – «Российской газетань» военной корреспонденттнэ ды Мордовиясто спецоперациянь ветерантнэ.

Яжазь кудотнень марто кадратнесэяк редяви эрямось – овсе вишка эйкакшкетне Донбассонь чачтома кудотнесэ, Мариуполень площадьсэ симфонической концертэсь ды эйкакштне, конатне кирдить Россиянь флагонть. Эрьва фотографиясонть ули QR-код, конань вельде мереви ловномс снимканть историянзо.

«Минь тешкстатано од регионтнэнь Россиянть марто вейсэндявомань васенце иенть. Тенень алтавияк те фотовыставкась. Снимкатне а маштыть манчеме: эйсэст невтевить алкуксонь тевть», – тешкстась «Защитники Отечества» фондонь филиалонь прявтось Алексей Герасименко.

«Российской газетань» филиалонь прявтось Арсений Бабенков мерсь, исторической кадратнень кисэ военкортнэ, каскатнень ды бронежилеттнэнь оршазь, мольсть передовойс. Ды ёвтась арсема, штобу сыця фотовыставкась улевель алтазь сэтьме эрямонтень.
«Эряви невтемс, штобу ломантне содавольть, мезе алкукс моли линиянть тона пеле, – мерсь ветеранось Андрей Чернышёв. – Неть фотографиятне – минек масторонь неень шкань историянь ёвтницят».
«Донбасс» выставкась карми важодеме ноябрянь 4-це чис. Ваномс сонзэ мереви «Защитники Отечества» фондонь региональной филиалсонть, конась ашти истямо адресэнть коряс: Саранск ош, Полежаевень курось, 113 кудось.