Малав комсь иеде икеле, 2004 иень сентябрянь 1-це чистэ, Северная Осетия-Алания Республикань Беслан ошсо террористэнь отрядось совась 1 № школань зданиянтень. Те покш кажось сайсь 334 ломанень эрямот, сынст ютксо 186 эйкакшт.
Нать, а стяко эрьва иень сентябрянь 3-це чистэ масторонь келес тешкставить Воинской славань ды Терроризмань каршо тюремань читне. Минек республикасо неть читненень алтавсть ламо мероприятият. Н. П. Огарёв лемсэ МГУ-нь Терроризмань идеологиянь а нолдамонь ды экстремизмань профилактикань координационной центрань важодицятне вейсэ Мордовия Республикань Антитеррористической комиссиянть марто анокстасть «Мордовия против террора!» ледстнемань акция ды ламо лия мероприятият.
Роман Тазинэнь валдо лемензэ а стувтомга
Сентябрянь 3-це чинь валскестэ Саранскойсэ, Н. П. Огарёв лемсэ МГУ-нь Экономической институтонь тонавтнемань 25 № корпусонть икеле, ютавтовсь мемориальной лазонь панжома. Сон алтавсь Мужествань орденэнь кавалерэнтень, те Институтонть прядыцянтень Роман Тазиннэнь, конась маштовсь СВО-сонть воинской долгонзо топавтомсто.
Роман Альбертовичень валдо лемензэ ледстямо сакшность Н. П. Огарёв лемсэ МГУ-нь ректорось Дмитрий Глушко, Мордовия Республикань Антитеррористической комиссиянь тевтнень топавтыця отделэнь прявтось Сергей Шамин, Мордовиясо «Защитники Отечества» СВО-нь участниктненень лезксэнь максомань фондонь филиалонь прявтонь полавтыцясь Ольга Зеткина, СВО-нь ветеранось Сергей Пронькин, 2004 иестэ Беслансо антитеррористической спецоперациянь участникесь Тристан Парменович (сон сась тосто Координационной цетранть тердеманзо вельде), Роман Тазинэнь тонавтыцянзо ды ялганзо.
Торжественной шкастонть ёвтнезель Роман Тазинэнь эрямонь кидензэ. Сон те вузонть прядызе 2012 иестэ. Теде мейле од ломанесь служась армиясо. Иень ютазь кочкизе военнослужащеень профессиянть, кемекстась РФ-нь Миноборонанть марто контракт ды тусь служамо Севастополев.
2022 иестэ Мариуполь ошонть олякстомтомсто Россиянь Черноморской флотонь военнослужащеесь Роман Тазин боевой задачанзо топавтомадо мейле маштовсь. Воинской долгонь топавтомсто героизманть, апелемачинть невтеманть кисэ РФ-нь Президентэнть Указонзо коряс гвардиянь старшей сержантось Роман Альбертович Тазин казезь Мужествань орденсэ (куломадо мейле).
– Минек университетэсь лезды Россиянь од субъекттнэнень, тосонь эрицятненень, – мерсь Дмитрий Глушко. – Мариуполь ошось, конась икеле ульнесь прок каладозь крепость, ней одс строяви ды тов сыть эрицят. Роман Альбертович маштовсь те ошонть кисэ тюрематнесэ, минек масторонть сэтьмечинзэ кисэ. Те минек университетэнть вишка пелькске сэтьмечинь эрямонтень. Пингеде-пингень ледстнема героентень!
– Роман эсь тевензэ топавтызе алкукс. Истя сонзэ тонавтызь эйдень кужосо, школасо, мейле тесэ – университетсэ. Неть ломантне те шкас тонавтыть тынк эйсэ. Роман – алкуксонь герой! Неень шкане студенттнэнь васень тевест, лиякс меремс, тынк задачанк – а стувтомс сондензэ, сонзэ подвигтензэ, – мерсь Тристан Парменович.
Седе тов пурнавозтне чатьмонемань минутасо ледстизь Роман Тазинэнь валдо лемензэ.
«Бесланонь седей» акциядонть
Обед малав Тёжа иетнень площадьсэнть од ломантне ютавтызь «Бесланонь седей» акциянть. Сынь явшесть #МордовияПротив Террора тешкстнэнь, конат теезельть седеень ёнов молицякс. Мезесь каявсь сельмес, явшицятнень малас лотксесть аволь ансяк од ломанть, истя жо сыретькак, кинень савсь цидярдомс Ине Отечественной войнань стака иетнень. Ломантне апак пеле ёвтасть мелест-арсемаст Бесланонь зыянов тевденть, конась сайсь мейсэяк а чумо ламо ломанень эрямот.
«Мордовиясь
терроронть каршо!»
Истя лемдевсь акциясь, конась ютавтовсь «Огарёв Арена» центрасонть. Тов истя жо пурнавкшность ламо од ломанть: школасо, колледжсэ, вузсо тонавтницят. Анокстазь сценанть лангсо сынст туртов ловность стихотвореният ды морасть морот, конат алтавсть покш кажотненень ды весе теракттнэнь жертватненень.
Акциянть ютавтомсто макссть казнеть «Мордовиясь терроронть каршо!» ды «Профилактикань коряс сехте паро сценарий» конкурстнэнь изницятненень ды призёртнэнень.
Седе тов Беслансо антитеррористической спецоперациянь участникенть Тристан Парменовичень ды од ломантнень ютксо ульнесь панжадо кортамо, косо максозельть ламо кевкстемат.
«Огарёв Аренань» холлсонть невтезельть выставкат. Сынст ютксо – антитерроронь неень шкань геройтнеде – СВО-нь участниктнеде, Н. П. Огарёв лемсэ МГУ-нь прядыцятнеде ды важодицятнеде. Теке таркасонть весе, кинь ульнесь мелест, кодасть «Для СВОих» алтымат.
Тоско жо невтезель «Мордовия – Родина Героев» фильмань омбоце пельксэсь.
«Ведень байге»
Истямо лем ало те чистэнть ютавтовсь Весероссиянь акциясь, конанень вейсэндявсь минек республикась. Бесланонь кажосонть, зярдо ломантне колмо чинь перть пекстазельть, майсесть ведтеме, сынст лемест ледстямга, ошонь эрицятне ламо таркатнесэ валность цецят, чувтот ды куракшт… Истя сынь прок симдизь сетнень, кить течи арасть ютксонок.
Палыця штатолсо
ледстизь лемест
Терроризманть каршо бороцямонь солидарностень чистэнть мероприятиятне мольсть позда чокшнес. Самай те шкастонть Соборной площадьсэ МР-нь Од ломанень госкомитетэнть лезксэнзэ вельде ютавтовсь «Сердце Беслана» акциясь. Сон ушодовкшнось штатолонь кирвазтемасто ды поладозель «Вечная память» моравтомасо, конань свал ютавтыть православиянь богослужениясо кулыцятнень лемест ледстямга. Сонзэ моравтызь Саранскоень епархиянь секретаресь Виктор Хохлов, священнослужительтне ды Саранскоень духовной семинариянь студенттнэ. Чатьмонемань минутадо мейле мероприятиянь участниктне палыця штатолсто пурнасть седей, куншказонзо истя жо штатолсто сёрмадызь: «Беслан, помним» валтнэнь.
Валентина Юдина