Эсь мелензэ ёвтызе «Российское движение школьников» ресурсной центрань прявтось Владислав Канунов:

«Бажан марямс од ломантненень ды од семиятненень лезксэнь максомань ёнкстнэде. Кода седе тов карми виевгавтовомо од ломантнень политикась, кодамо лезкс максови од профессионалтнэнень важодема таркань муемасо. Пек паро, бути Мордовиясо од ломантнень туртов креативной таркатнень теемга мелесь кирдеви, эдь те лезды школьниктненень ды студенттнэнень эсь ёрокчист невтемасо ды максы эрявикс содамочить проекттнэнь теемасо».

Образованиянь ёнкссо эсь учоматнеде пачтясь исторической наукань докторось, М. Е. Евсевьев лемсэ МГПУ-нь преподавателесь Тимофей Надькин:

«МР-нь Государственной Собраниянтень Мордовия Республикань Прявтонь Кучомадонть учан сень, што эйсэнзэ карми ёвтазь региональной историянть ды культуранть тонавтомадо мелявксось. Меельце шкасто те кевкстемантень башка мель явсь Российской Федерациянь Президентэськак. Эрзянь-мокшонь ёнксонь историядонть ды культурадонть минек учебниктне, конатне нолдазельть 2008 иестэ, аламодо таштомсть. Мон кеман, минек школьниктне маласо шкастонть кармить тонавтнеме инновационной учебниктнень коряс, косо невтевить Мордовия Республиканть эрямосо меельце шкань вадря полавтоматне».