Ноябрянь 16-це чистэ Мордовия Республикань Прявтось Артём Здунов эрьва иень Кучома марто пшкади МР-нь Госсобраниянь депутаттнэнень ды минек республикань весе эрицятненень. Минь кевкстнинек мезе учить Мордовиянь од ломантне Кучомастонть ды кодат кевкстемат сынст талновтыть неень шкане.
Наталья Зубова, «Навигаторы детства» федеральной проектэнь Ицялонь райононь муниципальной координаторось:
– Течи Мордовиясо ды целанек масторсонок покш мель явить од ломантнесэ тиринь масторонтень вечкеманть кастомантень. Те кевкстеманть бажить решамс властень кирдийтне.
Койсэнь, МР-нь Прявтось эсь Кучомасонзо те кевкстемантень яви покштояк покш мель. Эдь неень шкасто масторлангсо од ломантнень ютксо кармасть лавшомгадомо истят обуцянь ёнкстнэ, кода кидеяк а пелемась, подвигентень, ине тевтненень свал анокчись, видечись, ламо паро тевень топавтомо бажамось, седеймарямонь паро тевтнень топавтомась ды истя седе тов.
Эйкакштнень эрявить тонавтомс малавикс ломантнень, тетятнень-аватнень, покштятнень-бабатнень ды тиринь кудонть вечкеме! Эйкакштнень тонавтомат велесэ тевтнень вечкеме, сынст тонавтыцятнень ломанькс путомо, тиринь моданть лангсо касовкстнь содамо. Цёрынетнень жо кастомс Отечествань алкуксонь ванстыцякс!
Кеман, пек эрявикс тев эйкакшонть тиринь кельсэ кортамо, культуранть содамо тонавтомась, эсь арсематнень ёвтамо маштомась.
Миненек, покштненень, эряви невтемс эйкакштненень раськенек ине тевест, тень вельде кастомс духовно-нравственной ёнксост. Эйкакштненень содама сынст покштяст-бабаст ине тевдест!
Ольга Кунич, Рузонь классической школань прявт, психолог:
– Минек семиясь эрясь Краснодарсо. Нилешка иеде икеле минь, мирдем ды кавто эйкакшонок, саинек мель самс эрямо Мордовияв. Ульнесь покш меленек рамамс эсенек кудо. Монь ундоксом тестэнь, мирдем жо Кубаньстэ. Минь тунь а янксетяно, тей эрямо самонть кувалма. Васень шкасто кувать вешнинек рамамс кудо ды муинек Саранскоенть эйстэ аволь васолдо, Лямбирень районсто. Кевкстеманк лангс, мезе учотано МР-нь Прявтонть Кучомасто, меревлинь бу истя, седе покш мель явомс сетненень, кить ве ёно эрямсто, свалшкань таркакс кочкавлизь Мордовиянть, штобу седе ламо ломанть велявтовольть тиринь ёнксов, важодевельть вечкевикс республиканть лезэс. Тень туртов сыненст лездамс тевень ды эрямо таркань муемасо.
Текенень бу поладовлинь, сеть од ломантне, кить сыть тей тонавтнеме лия регионтнэстэ, истя жо кадовольть Мордовияс эрямо. Тень туртов сыненст лездама эрямонь условиятнень паролгавтомсто ды важодемань таркань муемстэ.