Мордовиясо ютавтозельть мероприятият, конатне алтазельть Боевой действиятнень ветеранонь чинтень. Те ледстнемань чи весень, кить тюрсть Россиянть кис, топавтсть Тиринь масторонть ванстоманзо коряс долгост войнатнесэ ды вооружённой конфликттнэсэ.

Кенярксчись официальна апак кемекста, ансяк иеде иес сон тееви седеяк содавиксэкс.

Саранскоень Советской площадьсэ воинтнэнень-интернационалисттнэнень кеврунгонть икелев пурнавкшность боевой действиятнень ветерантнэ, специальной военной операциянь участниктне, местной самоуправлениянь органтнэнь представительтне, Саранскоень эрицятне ды инжетне.

«Минек цёратне свал каштансто кандсть солдатонь ды офицерэнь лемтнень. Эряви, штобу весе задачатне, конатнень путынзе Верховной Главнокомандующеесь, улест топавтозь», – тешкстась МР-нь Прявтонь советникесь, отставкасо генерал-майорось Сергей Неяскин.
«Афганецтнэ поладызь эсь тетятнень, конатне ютызь Ине Отечественной войнанть, боевой койтнень ды максызь сетненень, кить примасть участия Северной Кавказонь конфликтсэнть, а вана течи минь неть койтнень максынек эйкакшонок туртов – СВО-нь участниктнень туртов. Ды минь кемтяно лангозост», – мерсь Саранскоень военной комиссариатонь военной комиссарось Алексей Демин.

«Мон кеман, Боевой действиятнень ветеранонь чинтень максови официальной статус. Ды се, што минь пурнавинек тезэнь, кемексты те кенярксчинть эрявиксчинзэ», – тешкстась Афганистансо боевой действиятнень участникесь Вячеслав Кормилицын.

Теке жо чистэнть Рузаевкасо панжсть лиятнень ёнов а молиця кеврунго, конась алтави боевой действиятнень ветерантнэнень. 1,8 метрань сэрьсэ мраморной плитасонть невтеви эрьвась, кинь ули путовксозо Тиринь масторонь мельтнень-арсематнень идемасонть. Монументэсь аравтозь панжадо менель ало военной техникань музейсэнть.