Алкуксонь геройтне ютксонок – сынь а неявить сэтьме шкасто, ансяк зыянов минутатнестэ алкуксокс топавтыть гражданской долгост Тиринь масторонть икеле. Сынст коряс ледстнематне иневанькст...
Истят геройтнестэ вейкенть – Роман Крашенинниковонь ледстнемга Саранскойсэ панжсть мемориальной лаз. Простой церась, конась эрясь ды тонавтнесь Саранскойсэ, ловизе эсь долгокс туемс масторонь мельтнень-вановттнэнь идеме, максомс сехте питнеенть – эсь эрямонть.
Саранскоень государственной промышленно-экономической колледжень прядыцясь, козо путозьгак мемориальной лазось, свал явовсь икелензэ путозь тевтнень топавтомасонть, мелень явомасонть, ялгаксчинь сюлмотнень кирдемань маштомачисэнть, вейсэндясь тонавтнеманть ды спортонть.
Армиясо срочной службанть ютамодо мейле Роман, кода сонзэ тетязо ды лелязо, алтызе эрямонзо Отечествань ванстомантень – сон тешкстась контракт Воздушно-десантной войскатнесэ военной службань поладоманть коряс. Кода ушодовсь специальной военной операциясь, Роман апак кавтолдо совась Россиянь ванстыцятнень юткс.
Ефрейторось Роман Сергеевич Крашенинников чавовсь ютазь иень июнень 29-це чистэ боевой тевень топавтомсто. РФ-нь Президентэнть Указонзо коряс куломадонзо мейле казезь Мужествань Орденсэ.
Чавовозь Роман Крашенинниковонь те чистэнть ледстизь Мордовиянь Прявтось Артём Здунов, малавиксэнзэ, мартонзо служицятне, общественностень представительтне, колледжень педагогтне ды тонавтницятне.
Артём Здунов тешкстась, Романдо ледстнематне кадовост минек седейтнесэ ды пачтявост весенень, кие одс карми само тонавтнемань учреждениянтень: «Истят геройтне, кода Роман, – те ломанть, конатнень лангсо кирдеви минек Россиясь».
Федерациянь Советэнь Раськеютконь тевтнень коряс комитетэнь Председателень васенце полавтыцясь Сергей Кисляк евтась сюкпря весе геройтненень, кить поладыть эсь покштяст тевенть – яжить неонацизманть: «Ломантне, конат кочкизь эсь туртов Тиринь масторонь ванстомань тевенть, невтить ней духовной ды моральной сехте вадря енкстнэнь. Романдо, веседе, кить тюрить фронтсо, ледстнематнень эряви ванстомс пингеде-пингес». Воинской долгонь топавтомсто маштовозтнень ледстизь чатьмонемань минутасо.