Октябрянь 2-це чистэ Анна Александровна Филеванень топодсть 90 иеть. Эри сон Отяжбуень Ламбаське велесэ. Неть читнестэ тензэ сакшнось покш инже – Отяжбуень прявтось Константин Николаев. Сон кандынзе мартонзо РФ-нь Президентэнть В. В. Путинэнь пельде кучозь лембе валтнэнь, казсь цецят, ёвтась шумбракстнемань валт. Миньгак редакциянь тевтнень коряс пачколинек Отяжбуев ды ульнесь меленек теевемс содавиксэкс сырькаенть марто. Сон вастымизь паро мельсэ.
Анна Александровна (велесэ тензэ мерить Нюра баба) пингензэ перть эри Ламбаськесэ. Чачсь теке велесэнть, тескень цёра экшс лиссь мирденень ды нейгак эри тесэ. Сон 1933 иень, ялаксозо ульнесь 1935 иень. Тетянзо, Александр Михайловичень, саекшнизь Ине Отечественной войнав, тосто сон мекев эзь велявто… Аваст, Вера Ивановна, ськамонзо тринзе-кастынзе кавто эйдензэ.
– Школасо тонавтнинь вете класст. Истямо якшамоль – натой чернилатне кельмильть, сынь ульнесть сод марто човорязь сеянь ловсосто. Стакальть шкатне, мезть кортамс. Оршамс-карсемс а мезель, ярсамс а мездель. Якинек карьсэ. Ярсынек пекше лопань, марчонь кшиде. А содангак, кода цидярдынек?! Зярдо прядовсь войнась – велень келес марявсть гармониясо седямот. Ломантне пек кецнесть. Кинь жо мирдест ды тетяст эзть велявто – авардсть ды лайшесть, минекак тетянок чавовсь, – ледстни Нюра баба.
Сон уш 12 иесэ кармась роботамо колхозсо. Ды весе пингензэ перть, 61 иес, тосо важодсь. Ков кучилизь – тов молильтькак ялгацек. Седе сеедьстэ паксясо роботасть: кочкасть тикше, нусть тарвазсо. Се шкане кодамояк техника арасель. Чить нуильть, веньберть скирдовильть пулттнэнь.
– Машинат-мезть арасельть, весементь кедьвийсэ топавтынек, кансттнэнь эсенек лангсо кандтнинек. Ялго яксинек Отяжелев видьмекс мельга. Пенькозаводсто салазкесэ усксинек удобрениянь кескавт. Тельняяк эзинек аште тевтеме. Лия велев олго мельга ардтнинек тракторсо. Ламоль роботась, а ёвтневияк, – корты Нюра баба.
1953 иень июлень 6-це чистэ аванзо ледизе пурьгине. Нюра те шкастонть кудосо арасель, паксясо тикше пурнасть.
– Сестэ латотне олгонь ульнесть. Мольсь виевдеяк виев пиземе. Авам ансяк панжизе кенкшенть ды апак учне пурьгинесь ледизе, – нейгак теде ледстнемстэ сырькаенть а кирдевить сельведензэ.
Кавто иень ютазь, 21 иесэ, Анна Александровна лиссь мирденень. Афанасий Иванович эрясь теке песэнть, сон вете иеде седе покшоль нидензэ. Роботась истя жо колхозсо – плотникень бригадасо, стройкасо, заправкасо. Филевтне стявтсть эстест кудо. Афанасий Иванович кулось 66 иесэ. Нюра баба малав 30 иеть эри ськамонзо. 90 иесэ сонсь яки эсь мельганзо: пиди ярсамопель, муськи-чови, саразт анды. Палкинензэ марто лисни пиревгак, ансяк ней уш тосо мезеяк пек арась путозь, зяро-бути пандинеть ды аламошка модамарть. Кувать кирдсь скалгак, лездасть цёратне. Ней дивси: велесэ малав кияк а кирди скал. А сон эсь шкастонзо весе тикшенть кандтнесь кутьмерензэ лангсо.
– Эряви якамс, такшардомс. Ве таркасо аштемс а эряви. Чись юты – сюкпря Пазонтень. Зярс пильгень якить – киненьгак а молян эрямо (эйкакштненень). А мейле кода Пазось мери, – корты Нюра баба.
Ловны сырькаесь сельмукштомо. Зярыя иеде икеле яксиль церьковавгак, ней уш а пачкоди. Батюшкась сонсь сакшны тензэ кудов причастямонзо. Нюра баба кирди весе постонь читнень. Озны эйкакштнень-нуцькатнень кисэ. Вейке тейтерезэ казсь тензэ мазый пазава, эйсэнзэ Пазонь Авань чачось (Умиление Пресвятой Богородицы). Пазавась покш, сон ковёрокс кодазь сурестэ.
Филевтнень сисем эйкакшост: ниле цёрат ды колмо тейтерть. Нюра бабанть 15 нуцьканзо, 21 правнуконзо ды вейке праправнукозо. Истя уш лиссь, вейкеськак а эри Ламбаськесэ. Сехте маласось – шабра Трокскужо велесэ Василий цёразо, кона сеедьстэ совси варштамонзо. Весе лиятне – гайневтнить ды сакшныть инжекс. Кудозо икелень кизэтнестэ пешксель нуцькатнеде, ламонест пурнавильть. Ней весе кассть, пурнасть эсест пизэть-семият, эрьванть эсензэ тевензэ ды мелявксонзо. Паро, сынь а стувтнить аваст ды бабаст.
– Эрьва чокшне гайневтнян аванень. Кевкстнян, кода эри-ашти, мезе теи. Сон эйсэнек трясь-кастсь апак кольневте. Кармавтсь важодеме, кияк тевде-роботадо эзь орголе. Валске марто туемстэ эрьвантень ёвтыль, мезе самозонзо теемс. Пштистэ вансь сень мельга, илязтано киньгак марто тюре, илязтано сюлмаво берянь ломань марто. Пирень-кудонь тевтне ульнесть васенце таркасо, – ёвтни Любовь тейтерезэ. Сон сась аванзо варштамо Московсто.
Нюра бабась ламо мезенть кирди мельсэнзэ-превсэнзэ, апак кавтолдо ёвтни читнень ды иетнень, зярдо лиссь те эли тона тевесь. Корты, ней паро эрямось, ули мезде ярсамс ды мезе оршамс, эрьва ковсто сы пенсиясь, ансяк вана шумбрачись аволь од шкань.
Анна Александровнанень чачома чинзэ кувалма ёвтазельть ламо лембе валт. «Эрзянь правда» газетань коллективеськак весе седейстэ арси тензэ кеме шумбрачи, сэтьме эрямо, валдо ды маней чить, кадык малавикстнэ кецнить – ули кисэст мелявтыця аваст ды бабаст!
Татьяна Маторкина