Четверг, марта 28, 2024
Важное
Книгась лезды чарькодемс эрямонть, неемс эрявиксэнть, явомс паронть беряненть эйстэ. Эйкакштненень алтазесь чарькодевти седеяк ламонть. Сон келейстэ панжи вишка ломаненть икеле эрямонтень кенкшенть, ёвтни тензэ сонзэ эрьва кодамо ёнкстнэде: пертьпельксэнь мазычиденть, ломанень кордонть (обуцядонть).
Эйкакшонь литературась – паронтень тонавтыця. Вельдензэ пакшатне аламонь-аламонь тонадыть чарькодеме эрямонть. Истямо Г. Гребенцовонь шкинемазояк. Сон эрзянь литературантень совась 1980-це иетнень ушодовомсто, зярдо лиссь «Ёжов ур» ёвтнемань васенце пусмозо, васняяк, кода эйкакшонь сёрмадей, конань сёрмадовксонзо кадыть домка тешкс вишка ловныцятнень мельс-превс эсест шожда кельсэст, чарькодевикс сюжетсэст ды мельстуиця персонажсост.

Кода ледстни сонсь авторось, сёрмадомань виензэ кармась варчнеме, зярдо тонавтнесь тиринь Бозаёвсо школасо. Сестэ сон кучнесь Покш Березникень райгазетав эсь веледензэ аволь покш сёрмадовкст. Мейле, Ицялонь педучилищасо тонавтнемстэ, седеяк кемекставсь сёрмадомантень бажамозо, ды сон тейсь паро сюлмавома «Сятко» журналонть ды «Эрзянь правда» газетанть марто. Те седеяк кемекстызе од сёрмадыцянть мелензэ – поладомс ушодозь тевенть. Поладксокс теевсь «Тештине» литературань вейсэндявксось, ков Гребенцов Гена студентэсь ушодсь якамо Мордовской госуниверситетэнь филологиянь факультетсэ тонавтнемстэ. Тесэ ушодыця сёрмадеесь ламос тонадсь, кармась домкасто чарькодеме сёрмадомань тевень «салавачитнень». Лездыцязоль В.К. Радаев – вейсэдявксонь ветицясь, Мордовиянь народной писателесь.

Г. Гребенцовонь шкинемазо келей кода темань, истя жанрань коряскак. Сон сёрмады валморот, ёвтнемат, ёвкст, пьесат. Сынь весе алтазь эйкакштненень. Сёрмадеесь свал кирди мельсэ ловномо маштыця пакшатнень ды сетненьгак, конат ансяк теевить содавиксэкс сёрмадозь букванть, валонть марто. Истятнэнень алтавить Азбуканзо. Весемезэ сон нолдась Азбукань кото книгат. Сеске редясак – Азбукань теицясь парсте содасы эйкакшонь психологиянть, чарькодьсынзе истямо тевсэнть методикань тонавтомань ёнкстнэнь. Азбукатне сёрмадозь стихсэ.

Стихсэ Азбукась – те жанрань истямо теевкс, кона явови кавто ёнкссо. Сон тонавтомапель ды секе шкане художественной жанра. Веёндо, стихсэ Азбукатне топавтыть тонавтома тев, содавтыть эйкакштнень букватнень гайгемаст ды сёрмадомаст марто, лия ёндо – лездыть башка букватнень ды алфавитэнть целанек эстетикань ёндо панжомо.
Азбукань теема тевенть эсензэ кемекставозь коензэ. Улить Азбукат, конатнесэ эрьва буквантень алтазь строфатне сюлмавить ансяк эсь ютковаст. Истятнэнь тонавтнемань книгас совавтыть пельксэнь-пелькс. Улить Азбукат, конатнесэ вейке буквань чарькодевтиця строфатне смустень коряс сюлмавить лия буквань чарькодевтицятнень марто, ды, нама, сынь кодаяк пельксэнь-пельксэв а явовить. Г. Гребенцовонь улить кода васенцетненень кандовицят, истя омбоцетнененьгак. 1985 иестэ нолдазь «Стихсэ азбуказо» кандови васенцетненень. Эйсэнзэ теицясь эрьва букванть чарькодевти нурька стихсэ. Сёрмадеесь тонавты эйкакштнень аволь ансяк букватнень содамо. Нурька стихтне содавтыть вишка ловныцятнень эрямонь эрьва кодамо ёнкстнэнь марто. Тесэ минь нетяно важодемань вечкеме кармавтома, школань койтнень чарькодевтема, пертьпельксэнь содамо, вечкеме ды ванстомо тонавтома, кудонь ды идем ракшань, чувтонь, тикшень ды лия касовксонь содамосо лездамо.

Парсте чарькодеви, мекс Г. Гребенцов покш мель яви Азбукатненень. Сонзэ эрямозо кеместэ сюлмавозь эйкакшонь тонавтоманть марто. Сон комсьветее иеде ламо важоди республикань тонавтомань системасонть. Зярыя иеть ульнесь «Народное образование Республики Мордовия» журналонь прявт редакторокс. Неень шкасто сон важоди А.И. Полежаев лемсэ музейсэ научной сотрудникекс. Те шканть перть таштазь методикань ды шкинемань сюпавчинть минь несынек сонзэ меельце иетнестэ нолдазь Азбукатнестэ.

Неть Азбукатне седеяк сюпалгадсть эсест тонавтомань, художествань-эстетикань ды жанрань ёнксост коряс. Те парсте неяви «Ёжов азбукастонть». Книгась панжови «Азбукась лемсэ» стихсэнть, конань эйсэ эрьва строчкась ушодови ломанень лемстэ. Седе тов эрьва буквантень максови кавто строфань стихсэ чарькодевтема, мейле – содамоёвкс, конасонть кекшезь те буквастонть ушодовиця валось. Букванть чарькодевтеманзо поладсызь эйстэнзэ ушодовиця вал марто аволь покш валкскесь, авань ды цёрань лемтне. Буквадонть кортамось прядови аволь покш ёвтнемасо-миниатюрасо, конасонть тагояк вастневить те буквастонть ушодовиця ламо валт. Содамоёвкстнэ ды ёвтнематне содавтыть эйкакштнень ломань ютксо ялгаксчинть, пертьпельксэнь мазычинть, идем ракшатнень ды нармунтнень марто, кармавтыть важодемас тонадомо, нузяксчинь а вечкеме, пертьпельксэнь ванстомо. Книганть песэ максовить темань коряс зярыя пельксэв явозь содамоёвкст. Сынь тагояк кандыть тонавтомань смусть ды нурькинестэ чарькодевтить ломанень эрямонть, кудонь ды идем ракшатнень обуцяст, пертьпельксэнть. Книгась прядови «Поладынк стихенть» ды «Содасак-арась пертьпельксэнть» налксематнесэ. Сынь кепедить эйкакштнень мелест шкинемантень, тонавтыть арсеме. Азбуканть тееме Г. Гребенцовнень лездасть Покш Березниксэ артома школань тонавтницятне. Сынст артовкстнэ мазылгавтызь книганть, кармасть улеме паро иллюстрациякс.
Эйкакшонь сёрмадыцясь Азбуканзо теи аволь ансяк эрзянь кельсэ. Ули сонзэ кавто кельсэ (эрзянь ды мокшонь) азбуказо. Мокшонь кельс ютавтыцясь – мокшонь содавикс поэтессась Рая Орлова. Те Азбукась – паро лездыця эйкакшонь куротненень, косо тонавтневить эрзянь ды мокшонь кельтне. Сон теезь шождасто чарькодевицякс, паро артовкс марто.

Г. Гребенцовонь рузонь кельсэ Азбукатне эсест башка ёнкс мартот. «Стихи Деда Мороза и Снегурочки» азбукась темань коряс седе теине. Эрьва буквась чарькодевтеви аволь покш, ниле-кото строкань стихсэ, кона темань коряс кеместэ сюлмазь теленть марто. Эйзэнзэ иллюстрациятнень тагояк артызь сынсь эйкакштне. Книганть песэ невтевить артыцятне, зяро иест, тонавтыцяст.

Рузонь кельсэ кавто лия Азбукатнень эйсэ тонавтомань ёнксось кеместэ сюлмави эйкакштнень содамочинтень ды шкинемантень бажамост марто. «Допиши имена» азбукасонть эрьва буквась чарькодевтеви кавто строкасо сёрмадовкс эйсэ. Омбоцесь кадови апак прядо. Сонзэ эряви прядомс ломанень лемсэ, конась муеви рифманть ладязь. Те кепеди эйкакштнень мелест муемс рифманть, мезесь, нама, тонавты сынст поэзиянь чарькодеме-марямо. «Зарифмуй!» азбукась седе тов кемексты эйкакштнень эйсэ рифмань коряс стихень ладсеманть. Меельце строчкантень эряви муемс рифмань коряс ладиця вал. Неть кавто азбукатненень, кода лиятнененьгак, артовкстнэнь теизь сынсь эйкакштне.

Г. Гребенцовонь Азбукатне – эрявикс сёрмадовкст, конатнесэ тонавтнемась ды шкинемась вейсэндявить. Сынь теезь-сёрмадозь эйкакштненень мельстуицякс, кепедить тонавтнемантень бажамост, поэзиянь лувонть чарькодемаст. Сёрмадеесь вечки эйкакштнень, бажи панжомс сыненст эрямонь эрьва кодат ёнкстнэнь, тонавтомс сынст паронтень.

Кепедемс вишка ломаненть ловномас мелензэ – те эйкакшонь литературасонть, паряк, сехте эрявиксэсь. Трямонь-кастомань тевеськак эйсэнзэ ашти неявикс таркасо. Ансяк теке шкасто свал эряви кирдемс мельсэ: пек ламо тонавтомась-кармавтомась колы художественной ёнкстнэнь. Сехте паро произведениятнесэ сон сельмс а каяви. Аволь свал неявикс, ансяк тагояк питней ёнксозо – сон максы художествань чарькодема, содавты ловныцянть валонь шкинеманть марто. Максы сон содамочияк – лезды эйкакшонтень келейгавтомс эрямодонть, ломанденть, пертьпелькстэнть чарькодеманзо. Весемесь те парсте неяви Г. Гребенцовонь эйкакштненень сёрмадозь стихотворениятнестэ.
Эйкакшонь стихотворениятнесэ васенце таркасо ашти аволь потмоёжось, – ломаненть перька молиця тевтне-валтнэ. Секскак эйкашонь поэзиясь – те эсензэ лув марто аволь покш ёвтнема. Сонзэ эйсэ сехте неявиксэсь – пакшанть эрямозо ды мартонзо сюлмавозесь. Эйкакшонь поэзиясь ёвтни эсензэ ловныцятненень седе, мезесь тенст малавикс ды содавикс, мезесь сельмест икеле.

Г. Гребенцовонь «Панжовкст» ды «Лёмзёркс чире» стихень пусмотне сёрмадозь сехте вишкине ловныцятнень туртов, конатне весе мельсэ бажить содамс седе ламо перькаст эрямодонть. Эйзэст совавтозь стихотворениятне содавтыть эйкакштнень иень шкатнень ды мартост кеместэ сюлмазь кенярксов тевтнень марто: телень куншкасто – Од иень вастома, сёксенть ушодовомсто – тонавтнеме сыргамо.

Кизэсь минек эйстэ яви,
Сёксесь мизолды пертьпельде,
Марят, баягинесь чави,
Минек эйсэ школав терди.
«Тонавтнеме»

Содазь, эйкакшонь поэзиянть эсензэ башка ёнксонзо: зярдо эйсэнзэ кортамось моли ракшадо, – невтеви вейке саезь ракшась лиятнень ёнов а молиця обуцянзо марто. Поэтэсь эйкакштнэнень чарькодевиксстэ ёвтни идем ды кудонь ракшатнеде, сынст башка ёнкстнэде:

Нумолкаесь эряза, Ансяк вельть уш
пеляза…
Мурка превей каткась: Веньперть
утом ванстась…
Онгай тюжа кискине, Мендязь пуло
вишкине…
Лейсэнть галат экшелить, / Кельме
ведте а пелить…

Зярдо стихотворениянь персонажтне эйкакшт, невтеви сынст прянь ветямось. Тееви лем марто конкретной образ, конань вельде невтевить прянь ветямонь паро ды берянь ёнкстнэ. Весемесь те максови мельс совиця тевень тееманть ды образонть вельде. Аволь стака чарькодемань невтиця образось ды тевесь ёвтневить эйкакштненень содавикс валсо.

Школав ильти эйсэнь авам.
Ушось кеци, монгак кецян.
Петя артомо пек вечки.
Сон – художник-портретист.

Г. Гребенцовонь эйкакшонь поэзиясонть икеле ёвтазь башка ёнкстнэнь марто неявикс тарка саи вишкинетненень пертьпельксстэ ёвтнемась, сонзэ мазычинть невтемась. «Сёксь» стихотворениясонть максови иень те пельксстэнть мазый артовкс. Авторось видестэ ды чарькодевиксстэ нолды тевс сёксентень ладиця тюстнэнь: «сырнень палят», «тюжа ривезь», «сырнень покольть». Весемесь те парсте лезды вишка ловныцянтень неемс сёксень мазычинть, кармамс сонзэ вечкеме. Тюсонть вельде невтеви сёрмадыцянть ёжозояк. Сон валдо, кенярксов.
Сёксенть невтемга поэтэсь нолды тевс невтемань-ёвтамонь эрьва кодат ёнкст. Карадо каршо путоманть сёрмадыцясь саи, зярдо тешксты сёксенть мазычинзэ: Теке тюжа ривезь, Ушованть ютась.

Олицетворениянть вельде иень шкась невтеви прок ломанекс, кона машты тееме паро тевть: Сёксесь лопат сезнесь, Сырнень палят стась. Вастневиця невтемань-ёвтамонь ёнкстнэ максыть стихотворениянтень лия ёнов а молиця гайгема, теить сонзэ эйкакштнень туртов чарькодевиксэкс.

Юрий АНТОНОВ,
Н. П. Огарёв лемсэ НИ МГУ-нь
филологиянь наукань доктор,
(Поладксозо сы номерсэнть)
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».