Пятница, марта 29, 2024
Важное

Эйдень кужось – те мастор, конась пешксе мазычиде ды валдо мельде-арсемадо. Тесэ свал качады тантей чине, кенкш лангсо весень вастыть вадря ды свал мизолдыця воспитательтне.
Эйдень кужосо эрьва важодицясь – артист, артыця, кедьчелькев ды эрьва мезес чарькодиця ломань. Ансяк вана сынст прявт тевест – эйкакштнень вечкемась. Лиякс жо а кода, эдь самай вечкемась ды цидярдомась – прявт лездыцят эйкакштнень трямосо-кастомасо. Воспитателень профессиясь сехте прявт ды эрявикс. Те тевсэнть важодицясь – те ломань, кона тонавты эйкакштнень эрямонь вешематненень, мельга-мельцек аноксты сынст школантень ды кеми, сынь касыть алкуксонь ломанекс.

Самай истятнэнь ютксо Орданьбуе ошонь комбинированной ёнксонь «Колосок» СПО-нь «Теремок» эйкакшонь кужонь МБДОУ-нь воспитателесь Татьяна Михайловна Ижойкина. Воспитателекс сон важоди 2012 иестэнть саезь, теде икеле роботась тонавтыцякс ды истя жо эйдень кужосо эйкакштнень марто топавтсь физической культурань коряс инструкторонь тевенть.

Татьяна Ижойкина чачсь-кассь Орданьбуе ёнксонь Кеченьбие велесэ. Школанть прядомадо мейле апак кавтолдо кочкизе тонавтыцянь кинть ды кармась Чувашия Республикань Алатырень педагогической колледжень студенткакс, кочкизе «Вишка классонь тонавтыця» специальностенть. Шкань ютазь, уш воспитателекс важодемстэ, чарькодсь, эсь содамочитнень эрявить ламолгавтомс, ды ней сон М.Е. Евсевьев лемсэ МГПУ-нь педагогической ды художественной тонавтнемань факультетэнь ветеце курсонь студентка (тонавтни заочна).

– Татьяна Михайловна, мекс тынь кочкинк те тевенть?
– Эйкакштнень марто важодемась монень свал вечкевиль. Школасо тонавтнемстэ ванылинь тонавтыцятнень лангс ды ладинь эсь прям сынст таркас. Ды эштё вишка классо тонавтнемстэ кемекстыя эстень: касозь, карман важодеме эйкакш марто!

Шкань ютазь те бажамось топавтовсь. 2003 иестэ Татьяна Михайловна сась Кеченьбиень основной общеобразовательной школав ды аравтозель вишка классонь тонавтыцякс. Тесэ ушодовськак сонзэ профессиональной кизэ. Тонавтыцякс сон роботась зярыя иеть, мейле семиянек тусть эрямо Орданьбуев. Татьяна тосояк топавтсь бажамонзо ды кармась важодеме эйкакштнень марто – физкультурань коряс инструкторокс «Улыбка» эйдень кужосонть. 2012 иестэнть саезь сон роботы воспитателекс.

...Валске марто уш эсь кенярксост ды мелявксост марто Татьяна Михайловнанень капшить сонзэ воспитанниктне. Кие-бути прась ды коцькердявсь, кие-бути вансь тандавтыця мультикть эли ардтнесь инжекс, кинень-бути рамасть од налкшке… Самай сонензэ, эсь омбоце аваст туртов, эйкакштне пачтить эсь сехте покш бажамост ды панжить потмоёжост. Вишкинетне, вейке вейкень лоткавтозь, ёвтнить: «Монь курок чачи ялакскем…», «Монень Якшаматясь кази кискине…», «Минь тетянь марто аванень раминек казне…», «Монь бабам таго симсь таблеткат, вана касан, карман врачокс ды весень лецясынь»...

Татьяна Михайловна – педагог покш буквасто. Сон свал творческой вешнемасо. Эрьва занятиянть бажи ютавтомс истя, штобу туевель мельс эйкакштненень, снартни панжомс сынст мелест артомантень ды лия шкинемантень. Эйкакштнень марто эрьва вастовомась – сюпавчинь вешнема марто алкуксонь налксема-путешествия. Вана сынь эсь воспитателенть марто Северной полюссот ды теевить содавиксэкс ашо овтотнень марто. Лия чистэнть группась «содавтсынзе» лембе мастортнэнь. Ды истя свалшкане, эрьва чистэ. Эряви содамс, мезе эряви эйкакшонтень, содамс, мейсэ кепедемс мелензэ, штобу аволь уле шка кольнемс, озоровамс ды сёвномс лиятнень марто. Эряви содамс, кода лездамс вишкинентень эсь ёрокчинть лангс ливтемасо ды снартомс тееме истя, штобу шкань ютазь сонзэ эйстэ лисевель вадря ломань.

– Мон арсян, эрьва ломаненть улезэ эсензэ тевезэ, конантень сонзэ ули ёрокчизэ, чарькодемазо ды, васняяк, ули бажамозо. Эсь тевентень улезэ призвания, – корты Татьяна Ижойкина. – Минек профессиясонть призваниявтомо кодаяк. Эйкакштне тень сеске марясызь. Бути эйкакштнень марто важодемантень тон а максат весе седееть, весе ойметь ды весе эсь прят, мезеяк а лиси. Те шкас сельме икелень ашти группасо важодемань васенце чим. Неть эйкакшонь чаминетне, конат ваныть лангозот, кие кемезь, кие мелявтозь, ды эрьвань седейс эряви муемс панжомине, эряви ладямс мартонзо ояксчинь кеме сюлмот.
Эйкакштнень марто важодемась пек мельс туиця. Сынь весе аволь вейкеть обуцянь коряс ды эрьвантень эряви муемс кель-вал: кинь-бути марто улемс седе чевтекс, лиянть марто жо лиясто казямокс. Воспитателекс улемс аволь эрьванть лиси, улезэ призваният.

Эйкакштнень марто роботамс истямо лувонть коряс, кода «сынь, важодинь, туинь ды стувтынь», кодаяк а лиси. Педагогонь ёрокчись, эйкакшонь психологиянь содамочись, чарькодемась ды эйкакштнень вечкемась – прявт ёнкст дошкольной тонавтомань педагогонть туртов.
Истя жо Татьяна Михайловна тешксты, воспитателентень эряви свалшкане ламолгавтомс эсь содамочитнень. Вишка «содыйкась» куш кодамо шкасто максы прязонзо сазь кевкстеманть, конань лангс улезэ чарькодевикс ды виде каршо вал. Эряви свалшкане кастомс эсь содамочитнень ды ёрокчинть, тонавтнемс од методикатнень, варчнемс инновационной ёнкстнэнь. Тесэ Татьяна Михайловнань прявт лездыцянзо дидактической материалтнэ, методической пособиятне ды Интернетэсь. Сюкпрянь лембе вал марто Татьяна Михайловна ледстни эйдень кужонь икелень важодицятнень, конат свал максыльть виде ды эрявикс превс путомат ды ёвтнесть эсь важодемань опыттэст. Секскак эйкакштнень сон вишка порасто саезь тонавты улемс видекс, важодемань вечкицякс, валонь кирдицякс ды эсь ялгатнень-оятнень ванстыцякс.

– Мон вечкан ваномо эйкакштнень мельга, кода сынь кандовить вейке вейкенень, ракшатненень, эсь налксемапельтненень. Валдо мельтнень-арсематнень, ялгань вечкемань ёжонть эйкакштнесэ эряви кастомс свалшкане, ансяк сестэ сынст седейтнесэ карми мелявтома пертьпельксэнть ды лиятнень кисэ. Эйдень кужосто сынст эрявить нолдамс вадря оякс-ялгакс, конатненень вейсэ эштё ютама школанть. Зярдояк а эряви важодеманть нолдамс истя, штобу группась явноволь вишка кужинева, конат пелькстыть ды сёвныть эсь ютковаст, – кемексты Татьяна Михайловна.

Эсь эйкакштненень сон сеедьстэ ловны книгат ракшатнеде ды пертьпелькстэнть. Мейле вейсэ кортыть ловнозденть ды тонавтнить вадря тевтненень. Занятиятнень, экскурсиятнень шкасто сон содавты эсь воспитанниктнень содавикс таркатнень марто, ловны стихть, касты эйкакштнесэ эсь тиринь ёнксонтень вечкеманть ды патриотической мельтнень-арсематнень.

Неень шкане Татьяна Михайловна Ижойкинань вановт ало кужонь старшей группась. Кемготово эйкакштнень сон аноксты школантень. Сёрмадомантень, ловномантень ды ловомантень, артомантень ды ламонтень лиянтень тонавтомась ашти воспитателенть туртов васень тевекс. Сынсь тетятне-аватне дивить, кода сонензэ удалакшны оймавтомс сынст. Вадря специалистэнть тесэ мелявкст а лиснить, эйкакштне сонзэ чарькодить валтомо, вановтонь коряс. Секскак тетятнень-аватнень мартояк сон эри кеме ояксчисэ ды чарькодемасо. Сынь сонзэ содасызь кода вадря, эсь тевень содыця специалистэнть, кона сынст эйкакштнень тонавты ансяк паронтень.

Татьяна Ижойкина эсь эйкакштнень марто эрьва кодамо пелькстамонь, акциянь ды флешмобонь свалшкань участникть. Истя жо 2016 иестэ Татьяна Михайловна эсь ёрокчинть невтсь «Иень воспитатель» районной пелькстамосонть, тедеде – «Воспитатель России» раськеютконь пелькстамонь муниципальной этапсонть ды эштё ламот лиятнесэ. Теде башка, сон вети «Эрзяночка» куронть, косо ёвтни вишкинетненень эрзянь келенть, культуранть мазычиде, содавты сынст раськень койтнень-кирдатнень марто.

«Авай, таго тон мельган сыть рана! Мон эштё эзинь налксевеяк, а тон монь кудов саят. Арась мелем туемс! А молян!» – эйкакштнень пельде гайгиця неть валтнэ – те, нама, сехте покш питне эсь важодемантень эрьва воспитателенть туртов.

Юлия Еремина
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».