Неень шкане республикань общеобразовательной учреждениятне поладыть важодемаст дистанционной лувсо. Эйдень кужотнесэ панжозь дежурной группат. Начальной класстнэнь туртов маень 12-це чистэ саезь ушодовсть каникулат. Кода тонавтнить покш класстнэ ды кода юты школань баягинень меельце гайгемась, теде пачти МР-нь Образованиянь министрась Галина Явкина:
– 5-11-це класстнэ тонавтнить дистанционной лувсо маень 22-це чис. Те карми тонавтнемань меельце чи, сыненст ёвтасызь иень оценкаст.
Школань прядыцятнень туртов баягинень меельце гайгемась ютавтови аволь кода свал. Те, нама, ризнэвти, ансяк мезеяк а теят. Тедеде минь ютавттано онлайн-линейка. Сон карми маень 23-це чистэ 10 чассто. Школань прядыцятне совить интернетс, косо тенст ёвтыть лембе ды паро валт.
9-це классо тонавтницятнень туртов тедеде госэкзамент а кармить. Аттестаттнэнь максызь оценкаст коряс.
Маень 25-це чистэ 11-це классонь тонавтницятнень ушодови консультационной важодемась. ЕГЭ-ть кармить максомо ансяк сетне, кить молить тонавтнеме вузов. Бути школань прядыцясь а моли вузов – ЕГЭ тензэ максомс а эряви. Зярдо кармить ЕГЭ-тне – теде пачтятано седе тов. Тень коряс карми РФ-нь Правительствань кармавтома.
Меельце шкане Интернетсэ кармасть нолдамо манчемат-фейкть, косо пачтить, сентябрянь 1-це чистэ тонавтнемась карми дистанционной лувсо. Те манчема! Илядо кеме! Совседе Образованиянь министерствань официальной сайтс, косо путозь виде информациясь. Дистанционной лувось зярдояк а полавтсы школасо тонавтнеманть. Кемтяно, сентябрянь 1-це чистэ эйкакштне озыть парта экшс.