Минек масторсо, арсян, а муеви ломань, кона а содасы Емеля ланга ёвксонть. Сонзэ вариантонзояк зярыя. А вана МР-нь Някань театрасо февралень 9-це чистэ 39-це школань 4-це «В» классонь тонавтницятне невтизь те мазый ёвксонть од лувтнень коряс – «По щучьему веленью по новогоднему». Те ульнесь омбоце путовкс «КультПроСвет» АНО-нь «Мордовская республиканская детская библиотека» ГБУК-нь «Теремок - Библиотека детского театра (БДТ)» проектэнть вельде, конантень максозель Культурань инициативатнень Президентэнь фондонь грантось.
Ледстясынек, «Теремок» васенце ёвксонть эйкакштне невтизь декабрянь 1-це чистэ, сондензэ минь сёрмалинек. Неенсесь васенценть коряс ульнесь седе стака – эйсэнзэ седе ламо геройть, сон мольсь часонь перть, аволь 30 минутат, ды эйкакштненень савсь тонавтнемс байтяк репликат ды киштемат. Тешкстама, вишка артисттнэ топавтызь эсь тевест пек парсте – кияк эзинзе стувто валонзо, эзь неяво а талнома, а виздема. Мерят, эрямост перть ансяк текень тейстькак – сцена лангсо налксесть. Ды, кода кортыть, эрьва парсте топавтозь тевенть мельга ашти покш важодема. Те важодемась васняяк прась 39-це школань 4-це «В» классонь ветиенть лангс – Ирина Евгеньевна Исуповань, конанень эрявсь явномс эйкакштнень юткова рольтнень.
«Эйкакштненень пек мельс тусь васенце налксемась, секскак сынь паро мельсэ кундасть омбоце путовксонтень. Тесэ натой пачколинек ордалемаскак. Прявт героень рольтнеде а пек ламо, а вана эйкакштнестэ малав эрьвась вешсь аравтомс неявикс рольс. Весемезэ классонок 29 эйкакшт ды эрьванть парсте содаса, кие мезес машты, кие кона тевентень седе ёроков. Савсь ламотнень ладсемс-оймавтомс, кортнемс мартост эрьва роленть эрявиксчидензэ. Мерян, бути весе кармить прявт геройть, сестэ лия тевтнень кинень тейнемс, конат седеяк мазылгавтыть путовксонть? Истя аламонь-аламонь энгамсть», – мизолдозь кортась Ирина Евгеньевна. Истямо ладсо, Емелянь ролентень кочказель Илья Зубов – музыкальной школасо тонавтницясь ды «Карусельки» эйкакшонь вокальной студиянь артистэсь. Принцессакс кочказель Ксения Лысова, инязорось – Ян Захаров, Кикиморакс путозель Дарья Каргина, Яга бабакс ульнесь Мария Калинтеева ды лият. Меельцекс лиссь Якшаматясь, конань налксизе Арсений Яхин.
«Мордовской республиканской эйкакшонь библиотека» ГБУК-нь научной важодемань коряс прявтонь полавтыцясь Светлана Грибова толковизе, мекс путовксонть невтемс кочказель февралень 9-це чись: «Самай Чилисемань ковкерьксэнть коряс ушодовсь Од иесь, ды ансяк ней сась Дракононь алкуксонь иесь, секскак минь поладтано тешкстамо те сехте вечкевикс покшчинть ды арсян весенень тагояк чопавтемс ёвконь ёжонтень».
Сюкпрянь валт ёвксонть путоманзо кис ёвтазельть МР-нь Государственной някань театрань прявтонтень Евгений Романовскийнень, кона эзь моле каршо сценань максоманть коряс, МР-нь заслуженной артисткантень Елена Романовскаянень актерской мастерствань коряс занятиятнень кис, 39 № школань прявтонтень Сергей Терёшкиннэнь, кона эсь пельдензэ ёвтась сюкпря классонь ветиентень Ирина Исупованень ды эйкакшонь библиотекань важодицятненень, конатнень ушодксост вельде топавтовськак те проектэсь.
Марина Агафонова