Пятница, февраля 03, 2023
Важное

Мордовиянь книгань издательствасо неть читнестэ ульнесь покш кенярксчи – панжовсь Раськень литературатнень центра. Тесэ кармить ютамо писательтнень, од автортнэнь марто вастовомат, стихень ловномань пелькстамот, конференцият ды лия мезе.
Центранть панжомсто ульнесть РФ-нь Федеральной Собраниянь Федерациянь Советэнь сенаторось П. Н. Тултаев, Мордовиянь книгань издательствань прявтось Р. И. Акашкина ды издательствань директоронь советэнь прявтось И. И. Скопина. Вастовомантень сакшность минек писательтне, эйкакшонь журналонь прявттнэ, библиотекасо важодицятне.

– Центрасонть мельспаросо карматано ютавтомо книгань презентацият, писательтнень марто литературань вастовомат, школань тонавтницятнень туртов пелькстамот, – кортась Мордовиянь книгань издательствань прявтось Р.И. Акашкина. Сон жо пачтясь издательстванть важодемадо. Неень шкане пурназь эрзянь ды мокшонь кельтнесэ вишка класстнэнь туртов учебниктне. Те комплект, ков совить учебникть, тонавтомань пособият, программат ды прописть. Сынь кучозь Московов федеральной экспертизав. Теде мейле совавтовить учебниктнень федеральной переченьс. Эйкакштне кармить тонавтнеме аволь пособиянь коряс, – учебникень. Седе тов эрявить теемс учебниктнень электронной версият.

Издательствасо панжозь звукозаписень эсест студия. Сонзэ вельде теевить учебниктнес аудиоматериалт ды сёрмадовить аудиокнигат. Васенце аудиокнигась карми мокшонь поэтессанть П. В. Алёшинань стихензэ марто. Авторось сонсь ловносынзе произведениянзо.
«Живые голоса писателей Мордовии» литературно-просветительской проектэнть вельде студиясонть сёрмадовить минек писательтнень вайгелест. Истя, тей уш сакшность Геннадий Гребенцов, Рая Орлова, Вера Брындина. Те карми паро лезкс школань тонавтыцятнень туртов. Эйкакштнеяк, писательтнень творчестваст марто содавтомга, марясызь автортнэнь алкуксонь вайгелест. Паро казне тейсь «Мордовия» ГТРК-сь. Сон макссь писательтнень марто аудиосёрмадовкст.

Меельце иенть перть книгань издательствась нолдынзе рузонь ютавтовкс марто эрзянь ды мокшонь раськетнень ёвкстнэнь, К. Г. Абрамовонь пурназь сёрмадовкстнэстэ 11-це ды 12-це томтнень. Истя жо теезель «Сырнень коллекция. Степан Эрьзя» электронной книгась-альбомось, сон музыка марто ды максовить музеев ссылкат.
Нолдазельть эрзянь ды мокшонь кельтнесэ мазый открыткат: чачома чинтень, аванень, Изнямонь чинтень ды художественной открыткат: эрзянь ды мокшонь ярсамопельтнеде, оршамопельтнеде, Саранскойденть, Эрьзядо, Сычковдо.

Мельстуицякс лиссть вишкинетнень туртов тиринь кельсэ стенас понгавтовиця азбукатне. Нолдамо лангсо эрзянь ды мокшонь кельтнесэ «Стихсэ азбукась». Автортнэ – Г.Гребенцов ды Р. Орлова.
Ней моли важодема «Мордовская кухня» электронной книганть лангсо, пурнавить пидемань-панемань рецептт. Издательствась ёвтызе мелензэ одс нолдамс «Мордовиянь писательть» кавто томсо книганть. Саемга, лепштят писателенть фотонзо лангс – гайгезеви вайгелезэ. Эряви меремс, книгань издательствасо панжозь проектэнь офис. Истя, изнязь гранттнэнь вельде нолдавить учебникть, книгат-альбомт.
Кода пачтясь Р. И. Акашкина, ломантне вешить эрзянь ды мокшонь кельтнесэ валкст, седеяк пек школань тонавтницятнень туртов. Паро бу сынст нолдамс. Те карми вейсэнь тев МР-нь Правительстванть юрсо гуманитарной наукань НИИ-нть марто.

Те вастовомасонть вейсэнь важодемадо соглашения сёрмадстозель МР-нь Писателень союзонть ды Мордовиянь книгань издательстванть ютксо. Тесэ поладыть нолдамо эрзянь, мокшонь, рузонь, татаронь кельтнесэ книгат.
Меельцекс ульнесь П. В. Алёшинань «Сюконян тиринь масторонтень» книганзо презентациясь. Авторось паро мельсэ ловнось инжетнень туртов седейс токиця стихензэ, конатнень кунсоломсто ламонь эзть кирдеве сельведест.
Кемтяно, Раськень литературатнень центрась алкукс карми писательтнень туртов паро, лезэнь кандыця таркакс, косо автортнэ вастовить ловныцятнень марто, ютавтовить мельстуиця тевть.

Татьяна Маторкина
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».