Эрьва районсо, велетнесэ, посёлкатнесэ культурань учреждениятне – мельстуиця таркат, косо ломантне ютавтыть юткошкаст, оймсить, якить концерттнэс ды лия вастовоматнес. Меельце шкане республикасонок стявтозь культурань зярыя од кудот, таштотне – одс витнезь-петнезь. Сынст ютксо Покш Игнатовань райононь Культурань кудоськак.
Витнемадо мейле сонзэ панжизь 2019 иестэ. Клубтне ды культурань центратне паролгавтовить «Культура» национальной проектэнть вельде. Кодамокс кармась Покш Игнатовань Культурань кудось, кода эри течи, теде тенек ёвтнесь сонзэ прявтось Ирина ГАЛАНОВА.
Ирина Николаевна чачсь Покш Игнатбуень Кучкаева рузонь велесэ. Школанть прядомадо мейле тонавтнесь Н. П. Огарёв лемсэ МГУ-нь биологиянь факультетсэ. Кемготово иеть важодсь Кучкаевасо химиянь ды биологиянь тонавтыцякс. Ульнесь пионервожатоекс. Ютавтсь эйкакштнень марто эрьва кодат кенярксчить ды вастовомат. Се шкастонть натой яксесть концерт марто фермав. Животноводонь кудосо эрьва середасто школань тонавтницятне невтнесть концертт. Сон морсесь школань тонавтыцянь ансамблясояк. 2008 иестэ кармась важодеме районсо од ломанень тевтнень коряс инспекторокс. 2016 иестэ ладязель Культурань кудонь прявтокс.
– Икеле тесэ ульнесь «Аврора» кинотеатра. Витнемат вестькак арасельть. Кода сынь тей важодеме, тандадынь: ков понгинь?! Эрьва нупальсэнть якшамо, латось чуди, стенатне певерить. Пиземе шкане весе ведесь чудсь клубонть потс, эрьва косто кольгсь. Подвалось пешксель ведте. Тень лангс апак вано, ломантне важодсть, ютавтсть эрьва кодат кенярксчить! Натой кияк эзь кеме, кармить полавтовомат ды учови тенек витнемась. 2018 иень август ковсто ютынек лия таркав ды уш иень ютазь, 2019 иень сентябрясто, совинек витнезь Культурань кудонтень. Весемезэ ютавтозельть 60 млн целковойть. Рамазель эрявикс оборудования, мебель, станокт ды материалт. Ней минек алкуксонь дворец! Мазый ушо ёндо, пек вадря потстояк. Залонок покш, тесэ 236 таркат, артозь лембе тюссо. Ули эсенек котельной, коштось свал лембе. Инжетнень кувать тонавтынек кайсемс оршамопелест, сынь тонадсть аштеме шубасо-суманьсэ, икеле якшамоль. Ней Культурань кудосонть эрямось лаказь лаки. Тесэ ютнить райононь кенярксчить, театральной путовкст, эрьва кодат концертт, мастер-класст, выставкат, важодтяно «Пушкинэнь карта» мартояк. Покш Игнатовав концерт марто сакшныть Мордовиянь государственной филармониянь артисттнэ, минек содавикс ансамблятне ды театратне.
– Ирина Николаевна, кодат коллективть важодить Культурань кудонть юрсо?
– Минек кедьсэ улить зярыя коллективть, конатнень коряс аштетяно каштанчисэ, конат ламо иень перть кецявтыть ваныцяст. Неть: «Рябинушка» ветеранонь народной ансамблясь, «Толнэ», «Калинка», «Светлица» морамонь ансамблятне, ули «Добры молодцы» цёрань ансамбля. Истя жо эйкакшонь зярыя коллективть – «Карамель», «Веселушки», «Калинка». Паро валт ёвтавлинь ськамост морыцятнень лемс: Наталья Темасова, сон прядсь Тольяттисэ консерватория, Ольга Полякина, тонавтнесь Саранскоень культпросветучилищасо, Татьяна Асманкина. Неть аватне ветить эйкакшонь ансамблятнень.
Кода а ледстямс райононь лия ансамблятнень? Эрьва велесэ ули культурань эсест сюпавчист. Андрелесэ – «Истоки» фольклорной ансамблясь ды «Лейне» народной театрась. Мордовиясо те вейкине истямо народной театра, спектаклят путнить эрзянь кельсэ. Кода учить сынст велень ломантне, кода ваныть! «Шумбрат, Мордовия!» фестивальсэ Андрелень артисттнэ невтсть эрзянь свадьбань кой. Теде икеле сакшность тенст «Культура» телеканалсто, косо теить «Земля людей» фильманть. Сынь мельспаросо вастызь, анокстасть эрявикс атрибутика, кочкасть кудо, косо ютасть съёмкатне, неень шкане аволь эрьвась анок тердемс эстензэ кудов ве ёндонь ломанть. Покш сюкпря тенст!
Районсонок улить зярыя гармонистт, конат свал анокт лездамс, самс концертэв, ардомс ковгак ве ёнов. Неть: П. А. Мамаев, А.Н. Наумов, Е. А. Шунеев, Валерий Комов, Валерий Дудорев. Самай сынь морсить «Добры молодцы» ансамблясо. Горки велень Культурань кудонь прявтось Г.В. Моисеева панжсь музеень нупаль, велень эрицятне кандсть эрьва кодат экспонатт. Вармазейкасо ули ансамбля ды эри минек викшницянок Л.Н. Козлова. Киржемансо гигерьстэ эрьва мезень тейнеманть тонавтнизе М. Н. Ендолова. Сон викшнизе райононь картанть. А аштетяно ве таркасо, свал ков-бути тердить, свал ардтнетяно кода эсенек республикань покш читнес, истя жо Мордовиянь томбалев. Ялгаксчи кирдтяно шабра Нижегородской областенть марто.
– Кодат кружокт ветявить кедьсэнк?
– Культурань кудосонок аволь ансяк киштемкат ды морамкат, кода арсить ламот. Тесэ панжозь зярыя кружокт, студият ды секцият: човалясто кодамонь, гончаронь тевень, кодамонь стансо кодамонь, викшнемань, киштемань, артомань. Сынст ветить минек артисттнэ. Саемга, Максим Кутуров вети графикань коряс артоманть, сон морсияк. Кодамонь стансонть важодить «Рябинушка» ансамблянь аватне. Сынь тесэ ютавтнить эрзянь Роштованть, панить пештинеть ды эйсэст весень каванить. Хореографиянть вети А. И. Занкин, сон тонавты вишкинетнень мазыйстэ киштеме.
Ули эсенек стамонь мастерскоенек. Икеле оршамопельтнень тенек стасть Саранскоень ательетнесэ. Ней минсь, сты тенек Е. Г. Абушева. Маласо шкасто бажатано панжомс вишка музейне, косо кармить невтневеме гармониянь ды баянонь коллекциятне. Те тевсэнть котьмить Н.И. Макаров ды П. А. Мамаев. Максокшнынек натой газетав яволявтома, кадык ломантне а ёртнить музыкальной инструменттнэнь, кандыть тей миненек.
Культурань кудонь фойесэ эрьва ковсто панжовкшны кодамояк выставка. Районсонть аволь аламо сырнень кедь ломанть, ули мель содавтомс весень творчестваст марто. Паро мельсэ вастозель землякост, МР-нь народной художникенть Анатолий Барговонь выставкась. Ней тесэ викшнезь картинат. Сынст викшнинзе Л. В. Учаева. Сон важоди поликлиникасо эйкакшонь медсестракс.
Ноябрянь 23-24-це читнестэ Нижней Новгородсо ютась Russian Event Awards событийной туризмань раськеютконь XII-це премиянь финалось. Самай тов пачколесь Покш Игнатовань Культурань кудоськак. Сынст «Раськень озкс» проектэсь сайсь колмоце тарка «Лучшее этнокультурное событие» номинациясо.
– Минь уш омбоцеде невттяно прянок те премиясонть. Ютынек финалс ды тердимизь Нижней Новгородов. Сыргинек 12 ломанть, «Толнэ» ансамблясь ды лия артистэнек, весе эрзянь оршамопельсэ. Невтинек презентациянок. Арседе тынсь, кода ёвтнемс Раськень озксто? Тосо эряви улемс ды неемс эсь сельмесэ! Кирвазтинек раськень штатол, ловнынек Инешкипазонтень пшкадеманть, каванинек кшиде ды медте. Ёвтнинек, кода озксов сакшныть эрьва кодамо ёнксонь инжеть, кода ускить мартост мода ды почодыть сонзэ. Мейле ютыть паксяванть кедте кедьс кундазь вейсэнь кирькссэ, морыть «Вирев молян» моронть. Морынек тосо миньгак ды каванинек букань ямдо.
Косто ансяк те конкурсонтень эзть сакшно! Мартонок пелькстасть Симферополень, Пермень, Кировонь, Якутиянь инжетне. Кой-кить каванясть пидезь барандо, дигадо, весе бажасть дивавтомс жюринть. Эзинек учнеяк, омбоце чистэ яволявтымизь изницякс! Пек кецнинек, – ёвтни Ирина Николаевна.
Сындест башка, Мордовиясто тешкстазельть «Соотечественники» рузонь драмань театратнень раськеютконь фестивалесь ды С.Д. Эрьзя лемсэ изобразительной искусствань музеесь «От музея до музеона» проектэнть кисэ. Сынь сайсть эсь номинациясонть омбоце таркат. Раськеютконь премиясонть пелькстасть 297 проектт Россиянь 53 регионсто ды Белоруссиясто. Весе те ютавтови минек масторсо туризманть виевгавтомга. Эрьва региононтень ули мезе невтемс, ули мейсэ дивавтомс васолдонь инжетнень.
Татьяна Маторкина