Четверг, августа 05, 2021
Важное

Кода тешкстызе РФ-нь Президентэсь Владимир Владимирович Путин: «Сень эйстэ, кода кастсынек од ломантнень, ашти се, сюпалгады-арась минек Россиясь». Те кармавтынзеяк Санкт-Петербургонь эрзянь-мокшонь землячествас совицятнень 2012 иень якшамковсто, Эрзя-мокшонь раськенть Россиянь государствань лия раськетнень марто вейсэндявомань тёжа иетнень тешкстамонть каршо, кемекстамс «Фонд поддержки и развития мордовской культуры в Санкт-Петербурге и Ленинградской области «Шумбрат» аволь коммерческой организациянть.

Фондонь учредителекс кармасть Мордовия Республикасо чачозтне, конат эрить Санкт-Петербургсо, ды истя жо Равчирень финнэнь-угрань раськетнень культурань куншкакурось. Неень шкане Фондонть прявтсо ашти С.П. Артемов.

Фондонть важодемадо ды Ленинградонь областьсэ эрзя-мокшонь раськень койтнень-кирдатнень ванстомадонть минек газетань ловныцятненень ёвтни «Шумбрат» Санкт-Петербургсо ды Ленинградонь областьсэ Эрзя-мокшонь культурань ванстомань-виевгавтомань фондонь президентэнь лездыцясь, эрзянь тейтересь Марина Геннадьевна Романовская.

Марина Романовская чачсь Мордовиянь Ицялонь райононь Ицяло велесэ. Эрямонь китне жо пачтизь Санкт-Петербургов. Тосо сон прядызе Ленинградонь А.С. Пушкин лемсэ государственной областной университетэнть. Ансяк вана ламо иень перть ве ёно эрямось свал ледстиль тиринь таркатнеде, эсь велень мазычитнеде.

– Зярдо теевинь содавиксэкс «Шумбрат» Санкт-Петербургсо ды Ленинградонь областьсэ Эрзя-мокшонь культурань ванстомань-виевгавтомань фондонь президентэнть ды тозо совицятнень марто, эсень туртов панжинь од тарка, косо весе оймесэ марясак тиринь раськень культуранть сюпавчинзэ, ледстясак эсь раськень келенть, – ёвтни Марина Романовская. – Покш мельсэ кундынь Фондонь тевтнес. Эрьва кодат мероприятият, вастовомат, выставкат, конат алтавить эрзянь ды мокшонь раськетнень культуранть, койтнень-кирдатнень невтемантень ламо раськень Санкт-Петербургсонть. Весе те важодемась лезды кирдемс кеме сюлмот лия регионтнэсэ эриця эсь раськень ломантнень марто. Монень жо Фондсо важодемась лезды седе домкасто тонавтнемс тиринь ёнксонь историянть, культуранть, келенть ды эсь эрзянь раськень койтнень.

Мордовияв эрьва самось – од содамочить аволь ансяк монь, семиям туртовгак. Эсь туртов панжтано культурань сюпавчинь од объектт, историянь памятникть ды республикань пертьпельксэнь певтеме мазычитнень.

Фондонть важодемадонзо кортамсто Марина Романовская тешкстызе, кодамо покш мель явови Санкт-Петербургсо ды Ленинградонь областьсэ эриця эрзятнень ды мокшотнень раськень культурань содамочитнень сюпалгавтомантень. Нама, покш важодема ветяви патриотической, духовно-нравственной, спортивной ды лия раськетнень марто сюлмотнень кемекстамонь ёнкстнэсэ. Истя, патриотической ёнкссонть топавтозь зярыя проектт. Васняяк, Невской пятачоксонть путозь Ледстнемань стела. Сонзэ путомазо кармась покш тевекс. Мордовия Республикань прявттнэ содавтызь Ине Отечественной войнасо эсь земляктненень-чавовозтненень те памятникенть ды путсть цецят ды тиринь ёнксонь мода.

Кеме сюлмот Фондось кирди поисковой отрядтнэнь мартояк. Сынь лездыть вешницятненень Мордовиясо чачозтнень кадовксост калмамосонть, конат Ине Отечественной войнань шкасто чавовсть Санкт-Петербургонь моданть лангсо.

Башка мель явови од ломантнень марто важодемантень. Истя, Фондось кармась «Киноуроки в школах» весероссиянь проектэнь участникекс. Сонзэ прявт тевезэ – Россиянь школатнесэ патриотической воспитаниянь коряс занятиятнень ютавтомга тонавтомань ёнкс марто эйкакшонь фильматнень снимамось.

– Эряви меремс, минек Фондонть пек домка важодемазо раськеютконь кевкстематнень коряс, – тешкстызе Марина Геннадьевна. – Фондонтень совицятне, Европань Советэнть тердеманзо коряс, ульнесть делегациянть юрсо, кона якась Страсбургов Изнямонь чинтень алтазь мероприятиятнес. Теке марто меельце зярыя иетнень перть Фондось кеместэ сюлмавозь Донбассонть марто. 2017 иень таштамковсто Луганской Народной Республикань прявт ошсо ютавтовсть Экономикань II-це форумось ды велень хозяйствань выставкась. Фондонь важодицятне ульнесть официальной делегациянть юрсо.

2018 иень чадыковсто вейсэ Россиянь Писателень союзонть марто минь ардтнинек Донецкой ды Луганской Народной республикатнес тосонь сёрмадеень организациятнес совицятнень марто вастовомас. Те мероприятиясь пурназель духовной ды литературань ёнкссонть важодеманть кемекстамга. Неть вастовоматнень лувсо 2019 иестэ нолдазель «Донбасс – Россия» книгась.

2018 иень таштамковсто «Саур-Могила» мемориальной комплексэнть икеле ютавтовсь митинг, кона алтавсь немецень яттнэде Донбассонть олякстомтомань 75 иетненень. Мероприятиясонть ульнесть Россиянь ды Украинань оштнень-геройтнень ды воинской славань оштнень представительтне. Минь ардтнинек Санкт-Петербургонь общественной организациятнень пельде.

Истя жо покш важодема ветяви Донбассонь эрицятненень гуманитарной лезксэнь явоманть коряс. Ды покш мельспаросо аштетяно сень коряс, минь лездынек Луганской ды Донецкой Народной республикатнестэ эйкакштненень понгомс лецямо Санкт-Петербургонь клиникатнес.

Эсь панжома чистэнть саезь Фондось кеме сюлмот кирди Санкт-Петербургонь православной общественностенть мартояк. Весе шканть перть теезь домка ды эрявикс робота, ютавтозь ламодояк ламо мероприятият.

– Ды, нама, пек покш робота Фондонь важодицятне ветить культурань ёнкссонть. 2013 иестэ саезь Фондось ашти «Города мастеров» литературань шкинемань, бардовской моронь ды раськень ремеслань фестивалень пурныцякс ды участникекс. Истя, Саранскойсэ ды Санкт-Петербургсо Фондось пурнакшнызе Мордовиянь содавикс артыцятнень Степан Коротковонь ды Алексей Стяпинэнь важодевксэст невтеманть. Истя жо неть оштнесэ невтевсь «Святая, как хлеб, деревенька моя…» Петербургонь фотографонть Юлия Алмаметовань фотовыставкась. Авторось эсь роботатнесэ невти Мордовиянь Ширингуши велень эрямонть.

Минек Фондось лездась Екатерина Огарёвань «Стежки и стёжки» стихотворениянь пусмонть нолдамосо, кона алтави эрзянь раськентень. 2018 иестэ ульнесь книганть презентациязо Пензань областень Старое Дёмкино велесэ ютавтозь «Эрзя, мокша мора» мокшэрзянь культурань фестиваленть шкасто. Седе мейле – Санкт-Петербургонь Раськетнень кудосонть. 2019 иестэ книгась тешкстазель Н. Благов лемсэ регионъютконь поэтической премиянь «Верность традиции» номинациясонть.

Эрзятне ды мокшотне – панжадо седей ды инжень вечкиця-вастыця ломанть. Ды течинь чине тевенек алтавить ояксчинь кемекстамонтень, раськень культурань ёнкссонть важодеманть виевгавтомантень.

Аволь умок Фондонь представительтне важодсть «Равось – ояксчинь лей» раськеютконь этнокультурной экспедициясонть-фестивальсэнть. Марина Романовская истя жо сынст ютксоль.

– Васенцеде те экспедициясонть-фестивальсэнть мон ульнинь 2017 иестэ, – корты Марина Геннадьевна. – Сестэ истямо мельспаро ды каштанчи саимим минек раськетнень кисэ, натой ставтынь эрзянь раськень орнамент марто паля. Ды се шкастонть саезь Санкт-Петербургсо ютавтовиця раськень культурань мероприятиятнес якан ансяк те оршамосонть.

Те иестэнть таго прась уцяска понгомс те экспедициянтень-фестивалентень. Тедеде сон алтавсь Ледстнемань ды славань иентень. Минь ульнинек Саратовань ды Волгоградонь содавикс таркатнесэ, путынек цецят Ине Отечественной войнасо чавовозтненень кеврунготнень икелев. Содамс историянть – васень тев эрьванть туртов. Те лезды улемс вейкине раськекс, кона ашти покш каштанчисэ эсь историянть ды койтнень-кирдатнень коряс. Минь изнинек, секс што ульнинек вейсэ!

Экспедициянть шкасто ютавтозельть ламо вастовомат, косо кортавсь этнокультурной виевгадомадонть, культурань организациятнень, властенть ды НКО-нть ютксо важодеманть кемекстамодо. Истят мероприятиятне, кода «Равось – ояксчинь лей» экспедициясь-фестивалесь, кастыть меленть од проекттнэнь анокстамонтень.

 

Юлия Еремина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».