Понедельник, мая 17, 2021
Важное

Тиринь покштянок туртов сюкпрянь ёвтазь, минь чачинек масторонть лангс, карминек уцяскавсто эрямо маней менеленть ало. Монь ули мелем ёвтнемс эсь покштядон – Герасим Максимович Богатовдо. Сон ульнесь колмо войнань участникекс ды маштовсь Ине Отечественной войнань иетнестэ Курской дугань тюремасонть.

Покштям 1914 иестэ од цёракс вастызе Масторлангонь васенце войнанть. Те войнастонть велявтсь тиринь кудов ды урьвакстсь, саизе никс велень вадря тейтеренть – Храмова Марфа Михайловнань, кона седе тов кармась улеме монь тетянь авакс, мейле – миненек сырькаекс. Од полатне кармасть састыне пурнамо эсест кудост. 1919 иестэ чачсь васень цёраст, Андрей. Ансяк кецямс полатненень кувать эзь саво, ушодовсь Гражданской войнась, ды покштянок таго саизь фронтов. Сонензэ савкшнось тюремс Средней Азиясо басмачтнень каршояк.

Вана, окойники, прядовсь Гражданской войнась, покштянок таго велявтсь тиринь велев. Мерят, ушодовсь сэтьме шкась, конась мольсь аволь кувать. Шкась ульнесь кодамо-бути а чарькодевикс. Покштянь ды сырькаень семиянть кадызь допрок вачодо: саизь кедьстэст алашанть, скалонть, реветнень, саразтнэнь, кардонть ды сюро марто утомонть. Эйкакштнеде семиясонть сестэ уш ульнесть кото. Кода улемс? Кода а куловтомс сынст вачодо? Мезде эйкакштнень андомс? Косто муемс менькс?

Герасим Максимович сыргась важодеме ве ёнов. Сон кавксть ульнесь Сахалинсэ, тосо важодсь портсо, важодсь Ташкент ошонь ведьгевсэ, сисем иеть Московонь ТЭЦ-сэ ульнесь кочегарокс. Эйкакштнень мельга ваномо сестэ сырькаенек туртов лездасть покштянь кавто сазоронзо – Ольга ды Варвара, конатнень марто вейсэ печтясть те стака ды вачо шканть.

Вана сась 40-це иесь. Эйкакштне аламонь-аламонь кассть-кепедсть, эйстэст уш кармасть улеме кавксо. Сехте покшонть, Андрей цёраст, саизь армияв. Тосто сон сёрмадсь, границянть лангсо аволь сэтьме. Шкась мольсь, сась 1941 иень кизэсь, Андреень валтнэ видельть. Июнень 22-це чистэ ушодовсь Ине Отечественной войнась, конась масторонь ломантнень туртов кандсь ламо сельведть ды покштояк покш зыян… Таго ломантнень эрямо лувост полавтовсь, весень мельсэ-превсэ чарась ансяк вейке мелявкс – кода изнямс ятонть?

Войнань васенце ковстонть саезь октябряс покштянок эсензэ Паракина велестэ Сура леенть чирев усксесь алашасо ломанть Сурской ванстомань сооружениятнень строямо, штобу а нолдамс Сура лейчирень тона ёнов фашисттнэнь, а уш ноябрясто сон тусь фронтов.

Од иенть каршо полкось, косо служась покштянок, ушодсь Москов ошонть ванстомо. Мейле сынь олякстомтызь Смоленскоенть ды ламо оштнень, конатнень сайнизь фашисттнэ. Войнасо покштянок артиллеристэль, секскак сонензэ савкшнось воёвамс икельце рядтнэсэ.

Историясь ёвтни, эсест удалов потамосост фашисттнэ чумондсть минек якшамо телетнень, секскак, икелев молеманть кадызь седе лембе шкантень – кизэнтень. Советской командованиясь жо теде косто-бути марясь ды кармась фашисттнэде икеле анокстамо каявомантень. Немецтненень кадовкшнось ансяк идемс пряст. Лиссь истя, сыненст эзть лезда минек кизэнь пси читнеяк, секскак савсь тенст потамс.

Весе парсте содасынек, Курской тюремась мольсь 50 чить (июлень 5-це чистэ саезь августонь 25-це чис). Се шкастонть Украинасо, Ахтырка ошонть маласо, 1943 иень августонь 20-це чистэ немецень снарядось понгсь видьстэ минек покштянь артиллерийской расчётонтень… Седе тов, зярыя шкань ютазь, минь карминек содамо, кото артиллеристтнэнь ютксто колмотне маштозельть, конатнень ютксо ульнесь минек покштянок – Богатов Герасим Максимович, колмо ялганзо стакасто ранязельть.

1943 иень сентябрясто Паракина велев сы покштянок маштовомадо берянь куля. Пек стакаль малавикстнэнень тенень кемемс, эдь тетявтомо кадовсть урозокс кавксо эйкакшт! Весе кудоютконь стакачитне сатотсть сырькаенек лавтовонзо лангс. Зяро стакачи савсь тензэ неемс, зяро салов сельведть савсь тензэ валомс, ансяк сонсь содась…

Вана кежей войнась прядовсь, таго сась сэтьмечинь шка. Ансяк комсь иень Изнямонь чинтень, маень 9-це чистэ, Герасим Максимовичень малавикстнэнень сась сёрма, конанть кучокшнызь «якстере следопыттнэ» (истя се шкане лемдсть поисковиктнень). Сёрмась кучозель сырькаенек лемс Украинасто, Сумской областень Ахтырской райононь Вышевесёловской кавксо иень школасто, кучицянзо ульнесть школань тонавтницят эсест тонавтыцяст марто. Сёрмасонть сёрмадозель: «Уважаемая Марфа Михайловна! Ваш муж, Богатов Герасим Максимович, защищая наше село от фашистских захватчиков, геройски погиб в августе 1943 года».

Те сёрманть кучомадо мейле «якстере следопыттнэ» сеедьстэ кармасть тенст сёрмалеме, сырькаемгак ды тетямгак яла каршост сёрмалесть. «Якстере следопыттнэ» эрьва кенярксчис кучильть сёрмат эли открыткат, тердсть инжекс Украинав, штобу эсенек сельмсэ неемс сеть таркатнень, косо покштянок воёвась, косто муезельть сонзэ ловажанзо. Ды минь, сонзэ малавикс раськензэ, ветексть ульнинек Украинасо маень Изнямонь 9-це чистэ, штобу седейшкава ледстямс ды модас сюконямс вейсэнь калмонть икеле покштянок туртов. Эйсэнек тосо свал пек вадрясто ды лембестэ вастсть, каванясть тантей ярсамопельде, ютавтнесть мартонок экскурсият, невтнесть вадря концертт…

Ламо иеть ютасть се шкастонть, ялатеке покш мельспаросо ледстнетяно сеть валдо вастовоматнень ды кодаяк а саеви превс, мезе ней моли тосо…

Минек раськень фотоальбомсонть нейгак ванстовить сеть фотографиятне, конатнень эйсэ вейсэ ванкшнотано, ледстнетяно се шканть. Весе тень неезь, седееть пешкеди сэредькстэ, ды теке шкасто покш каштанчисэ аштетяно эсенек покштянок кувалма, кона максызе эрямонзо валдо эрямонть кис. Секскак минь, сонзэ нуцьканзо ды малавиксэнзэ, зярдояк а стувтсынек валдо лемензэ – Богатов Герасим Максимовичень!

Мила Богатова

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».