Октябрянь 5-8-це читнестэ Московской областень Одинцовской райононь Кубинка велень «Патриот Экспо» выставкань куросонть ютавтовсь «Сырнень сёксь – 2022» Россиянь агропромышленной XXIV выставкась. Мордовия Республиканть пельде тосо ульнесть велень хозяйствань продукциянь переработкань ды АПК-нь кемзисемге предприятият ды Ицялонь лишмень триця-кастыця заводось. Минек делегациянть прявтсоль региононь Прявтось Артём Здунов.
Уш комсте ламо иетнень перть выставкась ашти агропромышленной комплекссэнть проекттнэнь невтеманть туртов лезэв площадкакс. Мордовиясь, коень коряс, – сонзэ участник. Тесэнь аграрийтнень продукцияст содасызь региононть томбале.
Республикань экспозициянть пурнамсто мель явовсь региононь производствань, экспортонь ды инвестициянь уличинть лангс.
Мордовиясь сови масторонь васенце субъекттнэнь юткс эрьва эрицянть лангс продукциянь прявт видтнэнь производстванть коряс. Алтнэнь ды ловсонь нолдамонть коряс минь сайтяно масторсонть васенце тарка, сывелень нолдамонть коряс – нилеце. Республикась аволь ансяк целанек топавты рынкасонть рамсицятнень вешемаст сывеленть, ловсонть, алтнэнь, сахаронть ды эмежтнень коряс, истя жо 80 % ламо нолдавиця продукциянть пачти региононть томбалев, истя жо 21 масторс. Переработкань комсте ламо предприятиятне экспортс пачтить ципакань-бройлерэнь сывель, эмежень ды ловсонь консервация, алонь продуктат, ансяк керязь розат, макаронань теевкст, сахар, кондитерской продукция.
РФ-нь Президентэнть В. В. Путинэнь кармавтоманзо коряс, пилотной регионтнэнь статуссонть, Мордовиясь эрязасто виевгавты органической продукциянь нолдамонть. Производительтнень ламочист коряс, конатнень улить сертификатост органической производствань вешематнень коряс, минек республикась сови масторонь ТОП-5 регионтнэнь юткс. Течинь чинтень Мордовиянь кото предприятиятнень улить сертификатост органической производстванть коряс. «Биосфера» Мордовиянь предприятиянтень эштё 2009 иестэ Россиясо васенцекс максозель Евросоюзонь органик-стандарттнэнень ладямонь сертификат. Течи те производителесь нолды ведьгеменде ламо видэнь продукция.
Органикань виевгавтомань коряс покш потенциалозо «Мордовские пенькозаводы» предприятиянть, сонзэ лангс савтови минек масторсо пеньковолокнань переработкань 40 %. Республикань стендсэнть производителесь невтизе эсензэ ассортиментэнть, ков истя жо совавтозь ярсамопелень лия ёнов а молиця продукциясь: пиже чипсат, протеинэнь коктейльть, кансёро, ой, почт ды ламо лия мезе.
Мордовиясо органикань производительтненень явови лезкс региононть пельде. Те ёнкссо касоманть туртов ули весемесь, истя жо миемань од рынкатнень саеманть коряс.
«Агропромышленной выставкатнесэ улезэ пек ламо продукция, Мордовиясь тень коряс явови ламот регионтнэнь эйстэ», – мерсь Артём Здунов выставкань стендтнэнь ванномадост мейле. Дивазевемс тесэ алкукс ульнесь мезень коряс, ды Мордовиянь стендэнь ваныцятне тень тешкстасть. «Монь ундоксон республикастонть, сеедьстэ сакшнан «Сырнень сёксентень» ды кеместэ яволявтан: Мордовиянть конкурентэнзэ арасть!» – мерсь выставкань ваныцятнестэ вейкесь.
Мордовиянь Прявтось башка тешкстызе, истят мероприятиятне пек эрявить деловой вастовоматнень туртов – тесэ важодить Россиянь Велень хозяйствань министерствань ды Правительствань прявттнэ. «Те иенть прядтано вадрясто, сюротнень пурнамонть коряс минек рекорд – 1 млн 750 тёжат тоннат, урожайностесь – 38 центнерт гектарсто, те вадря невтевкс. Ансяк агропромышленной виевгавтомань коряс кевкстематнеде эштё ламо – эряви техника, эряви одкстомтома, оборудования. Весе специалисттнэ, конат важодить тень коряс, течи тесэть. Карматано эрязасто важодеме те деловой площадкасонть, – мерсь Артём Здунов. – Ули мезес тонавтнемс коллегатнень пельде. Те опытэнь пурнамонть туртов вадря практика».
Выставканть юрсо республикань ламот предприятиятне тешкставсть сырнень медальсэ. Сынст ютксо «МПК «Атяшевский», «Сыроваренный завод «Сармич» ООО-тне, «Птицефабрика «Чамзинская» АО-сь, «Агропромсервис» ООО-сь ды лиятне. Истя жо Мордовия Республикась тешкставсь «Комплексное развитие сельских территорий» Российской Федерациянь государственной программанть вадрясто топавтоманзо кисэ. «Лучшая практика создания многофункционального объекта в рамках проекта комплексного развития сельской территории» номинациясо сырнень медаль максозь Отяжелень муниципальной райононь администрациянтень. «Эффективная реализация проектов комплексного развития сельских территорий в рамках государственной программы Российской Федерации «Комплексное развитие сельских территорий» номинациясо сырнень медальсэ тешкстазь Орданьбуень райононь администрациясь. Теке жо номинациясонть сиянь медаль максозь Покш Игнатовань райононь администрациянтень, «бронза» – Отяжелень ды Дубёнкань районтнэнь администрациятненень. Истя жо сырнень медальсэ тешкстазь Орданьбуень райононь администрациясь «Лучшая практика привлечения внебюджетных инвестиций на реализацию проекта комплексного развития сельских территорий» номинациясонть, Дубёнкань администрациясь – «Лучшая практика обеспечения комплексного развития сельской территории» номинациясонть.
Теке марто октябрянь 5-це чистэ Мордовиянь Прявтось Артём Здунов «Сырнень сёксь – 2022» агропромышленной выставканть юрсо ютавтсь зярыя важодемань вастовомат, истя жо Россиянь Минсельхозонь, «Россельхозбанконь», «Росагролизингень» руководстванть, «Пегас-Агро» компаниянь представительтнень марто. Кортавсть отраслянтень лездамонь, республикань аграрийтнень туртов велень хозяйствань техникань пачтямонь кевкстематне.
Теде башка, республикань Прявтось кортась «Фос-Агро-Волга» компаниянь руководстванть марто сыця тундонтень велень хозяйствань предприятиятнень туртов удобрениятнень пачтямонть коряс вейсэнь важодемадонть.
Ледстясынек, тедеде Мордовиясь, сюронь рекордонь урожайденть башка, сайсь рекорд пиже кснавонь кастомань-пурнамонь коряс – пивсэзь 6400 тоннат. Текень пингстэ эряви тешкстамс, Мордовиясь – ПФО-со кснавонь вейкине производитель.