Инжекс «Элеком» АПО-нь «Трофимовщинское» отделениясо
«АПО "Элеком» ОАО-нть юрс совить зярыя отделеният. Вейкесь эйстэст – Ромодановань райононь «Трофимовщинское» отделениясь. Аволь умок минь пачколинек тов ды вастневинек важодицятнень марто. Тосо тевтне лаказь лакить, иень эрьва кодамо шкане моли пси важодема.
Иван Александрович Базакин важоди «Элеком» АПО-со велень хозяйствань производствань коряс прявтонь полавтыцякс. Сон пачтясь, сынст организацияст касты ламо культурат: товзюро, шуж, силосокс кукуруза, ламо иень тикшеть. Тедеде сюрось чачсь вадря. Вейке гектарсто сынь пурнасть 40,5 центнерт. Неень шкане таргить ламбамо якстерькаенть. Сондензэ видезь 2 тёжат гектарт. Весе культуратнестэ сехте ламо озавтыть якстерькайденть. Малав пелензэ уш таргизь. Зярс а усксить заводов. Вана манейгады, прядовить пиземетне ды рудазось, якстерькаенть покш КамАЗтнэ кармить усксеме Ромодановав.
«Трофимовщинское» отделениянь фермасонть кастыть-кирдить скалт, букат, вазнэть – малав 900 прят.
– Сы иестэ арсетяно панжомс од ферма, ков кельгить 200 скалт. Бажатано кастомс ловсонь производстванть. Теде башка, эрявить витнемс-паролгавтомс ташто ферматнень. Минек кедьсэ важодить 34 ломанть. Фермасонть – 25. Нама, эрявить тенек кадрат: скалонь потявтыцят, скотникть, механизаторт. Эрьва косо велень хозяйстватнес эрявить ломанть. Од ломантнень арасть мелест роботамс велесэ, куш зарплататнеяк тесэ парт. Велень хозяйствась – те масторонь продовольственной безопасностесь. Минек туртов важодиця специалисттнэнь стака муемс. Эрьва ломаненть кисэ мелявттано, – ёвтни Иван Александрович.
«Элеком» АПО-сь мейсэ машты лезды эсь райононь мобилизованнойтнень роднятненень-раськетненень. Лездасть вейке семиянень газонь ветямсто, тосо азорось тусь доброволецэкс специальной военной операциянь топавтомо.
Уришка велесэ скалонь фермань прявтокс важоди Вера Ивановна ДАВЫДОВА. Эрзянь авась чачсь Ицялбуень Кендя велесэ. Тонавтнесь Кемлянь велень хозяйствань техникумсо зоотехникекс. Сонзэ прядомадо мейле кучизь важодеме Ромодановань райононь Трофимовщинав. Сеске ладизь фермань прявтокс. Теске лиссь мирденень, чачсть кавто эйкакшонзо. Ней уш сон 35 иеть роботы фермань прявтокс.
– Меельце шкане минек потявтовкстнэ кассть. Колмоксть потявттано тёлкатнень, панжинек группа, косо кирдевить тёлкатне. Сынь максыть малав 24 литрат ловсо. Весемезэ кирдтяно 310 скалт. Ловсонть ускить «Саранский» ловсонь комбинатов, эрьва чистэ машинась сакшны валскень 7-8 чассто. Важодеме сакшнотано валске марто 5 чассто. Чокшне – 4 чассто ды малав кавксо часос. Тесэ свал моли пси важодема: скалонь потявтыцятне туить, эсь тевс кундыть ракша мельга якицятне. Минек кедьсэ роботыть скалонь вейксэ потявтыцят ды вейке полавтыцяст, ветврач, осеменатор, учётчик, механик, ваз мельга якицят ды седе тов. Ули мелем шнамс неть ломантнень ды ёвтамс тенст сюкпрянь валт. Тевест теить парсте. Зарплатанть тенек пандыть вадря ды шкастонзо, аламодо кепедизь пандоманть. Ней важодеманок седе шождалгадсь. Ладязь кормораздатчик, сон анды ракшатнень валске марто ды чокшне, максни комбикорм. Потявттано аволь кедьсэ – ули молокопровод. Кинь ули мелезэ – се важоди ды тевде ковгак а орголи. Колмо иеть мартонок прявтонок И.А. Базакин. Сон парсте содасы тевензэ, зярдояк а юты важодицянть вакска. Весе мелявкстнэ ды стакачитне лангсонзо, – пачтясь Вера Ивановна.
Ули меленек ёвтнемс скалонь потявтыцятнеде. Сынст чист ушодови аволь кода минек. Стить пиже зорява, чоподава, капшить потявтомо. Неть виев аватнень арасть оймсема чист. Фермасо важодемадо башка, кенерить теемс кудонь тевесткак, весень улить семияст, эйкакшост, пирест ды хозяйстваст.
Наталья Геннадьевна ЯКОВЛЕВА фермасо роботы 1999 иестэ саезь. Эрьва чинь валске марто ды чокшне сон потявты 70 скалт. Сайни 1 тонна 800 кг ловсо. Скалтнэ малав весе одт, ансяк весть вазыязь. Секскак мартост эряви ламо озямс. Эрьвась максы чизэнзэ 24 литрат ловсо. Кода корты авась, эрьва скалонть, кода ломантненьгак, эсензэ обуцязо. Кие кунсолыця, кие – аксун. Кинь марто эряви чевтинестэ, кинь лангс жо эряви кепедемс вайгель. Ды сестэ Нарядкатне, Кнопкатне сеске кунсолыть потявтыцяст.
Ольга Владимировна ХРАМОВА чачсь теске, Уришкасо. Школанть прядомадо мейле тонавтнесь Саранскоень техникумсо секретарекс-референтэкс. Теске лиссь мирденень. Фермав сась важодеме 1996 иестэ учётчицакс. 1999 иестэ, декретстэ лисемадо мейле, кармась скалонь потявтыцякс. Ней сон потявты 50 скалт. Сонзэ кедьсэ истя жо васенцеде вазыязь скалтнэ, раужо-сёрмав тюсонь-породань.
– Мон фермав сынь 17 иесэ. Васенце шкастонть пек стакаль, мейле тонадовсь. Икеле весе теилинек кедьвийсэ, андынекак эйсэст кедьвийсэ. Ней улить кормораздатчикть. Минь ансяк пурнатано певерезетнень. Ловсонть потявты молокопровод, сон трубава туи холодильникс. Мезеяк тенек кандтнемс а эряви, – ёвтни Ольга Владимировна. Сергей Евгеньевич мирдезэяк важоди фермасо слесарекс-механикекс. Храмовтне – ламо эйкакшонь триця семия. Сынст ниле эйкакшост. Васенце цёрантень 25 иеть, сонзэ уш эсензэ семиязо ули, эрить Московсо, важоди полициясо. Тейтерест – М.Е. Евсевьев лемсэ МГПУ-нь студентка. Эштё вейке цёрынест тонавтни Пушкинань школасо омбоце классо, сехте вишкинентень, тейтернентень, – вете иеть. Авань капиталонть лангс Храмовтне рамасть велесэ кудо, сонзэ витнить ды паролгавтыть. Кардазсо кирдить-кастыть тулякат, вазт, саразт, ули 40 соткат пирест. Ламо лезды тенст Ольга Владимировнань авазо, сон зярыя иеде икеле тусь пенсияв. Ашти эйкакштнень марто ды лезды эрьва мейсэ.
Анастасия Валерьевна ЧУДАЕВА истя жо Уришкань. Сон колмо иеть тонавтнесь Ромодановань СПТУ-со. Велявтсь мекев велев, лиссь мирденень. «Элекомсо» кармась важодеме од тейтернекс. 2008 иестэ васня саизь важодеме скалонь потявтыцятнень полавтницякс, мейле ютавтызь группас. Ней сон техник-осеменатор ды истя жо лиясто потявтни скалт. Эрьва валске марто сон стякшны 4:30 чассто, скалтнэнь потявтомо ушодыть 6 чассто, теде икеле андсызь, алксост тенсесызь ды ванськавтсызь тарканть.
Фермасонть ули «Хозяин» ИСРК-12 кормораздатчик. Сон човори сенажонть, силосонть, комбикормонть ды лия мезенть. Истямо тантей ярсамопельде чизэнзэ зярыяксть андыть скалтнэнь ды вазтнэнь. Кормораздатчиксэнть важоди Михаил Николаевич Винокуров. Те агрегатось аволь весть лиснесь изницякс «Велень хозяйствань сехте паро машина» Весероссиянь конкурссо.
Татьяна Маторкина
Фототне Эдуард РЕТУНСКИЕНЬ