Минь поладтано вастовоматнень Мордовиянь районтнэнь прявттнэнь марто, косо эрить ловныцянок, ды течинь инженек – Ромодановань муниципальной райононь прявтось Сергей Ведяшкин. Сергей Валентинович а весть тешкстась, сонзэ улить эрзянь ундоксонзо, тетязо-авазо – эрзянь ломанть, сонсь кортамо а пек машты, ялатеке кой-мезе чарькоди.
Минь эзинек карма ютавтомо тензэ экзамен тиринь келенть коряс ды ушодынек кортамо васняяк седе, мезе тееви те ёнкссонть эрицятнень туртов.
Тешкстама:
Ведяшкин Сергей Валентинович чачсь 1973 иестэ Ромоданова посёлкасо. Школанть прядомадо мейле тонавтнесь университетсэ юристэкс. Сонзэ эрямонь ды важодемань кизэ сюлмавозь ансяк тиринь райононть марто. 1996 иестэ саезь 2004 иес роботась тесэнь администрациянь эрицятнень трудонь ды занятостень отделэнь прявтокс, 2004-2005 иетнестэ администрациянь тевтнень управляющеель, седе тов 2015 иес аппаратонь прявтоль. Мейле ниле иеть важодсь муниципалитетэнь прявтонь васенце полавтыцякс. 2019 иестэ кочказель Ромодановань райононь прявтокс.
Китнеде
Тедеде районсонть «Содействие развитию автомобильных дорог регионального, межмуниципального и местного значения» федеральной проектэнть лувсо витневить ниле объектт: Пушкина велесэ Центральной ульцясонть 1,06 вайгельбень кувалмосо кись, конань «Комплексстрой» ООО-сь арси прядомс июленть самс. Уш анок кись, конась юты Промышленной шоссеванть, Советской ульцястонть саезь Ромоданова посёлкасо чугункань кинь переездэнть видьс. Витнезель 1,1 вайгельбешка. Эйстэнзэ аволь васоло, кавто апокшке переездтнэнь ютксо, витнезельть эштё 330 метрат. 400 метрань кувалмосо килангось вельтязель асфальтсо Садовая ульцястонть саезь Полежаевень ульцянь киулонть видьс. Сы иестэ эштё одкстомтовить китне Белозерьясо ды Ромоданова посёлкасо.
«Жилище» федеральной ды региональной проектэнь «Обеспечение доступным и комфортным жильем и коммунальными услугами граждан Российской Федерации» программанть лувсо мелят ушодсть витнеме Ромоданова посёлкань Лесная, Дружбы, Мира, Свободы, Ломоносовонь, Гагаринэнь ульцятнева ютыця китнень, косо стявтовить од кудот. Теи те тевенть «МАПО-ТРАНС» ООО-сь, конась бажи прядомс икелензэ путозь задачанть 2024 иестэ.
Белозерьясо строяви од школа
Ромодановасо ули истямо веле, косо эрицятне аволь аламолгадыть, мекевлангт, иеде иес касыть – те Белозерье татаронь велесь. Тосо чачить эйкакшт, од семиятне а бажить кадомс тиринь велест, секскак сась шка стявтомс од школа, козонь кельгить 165 тонавтницят. Кода мерсь С. В. Ведяшкин, те проектэсь, конась топавтови «Образование» нацпроектэнть лувсо, пек ответственной, эдь Белозерьянь эйкакштне пек учить сыця иень сентябрянь 1-це чинть, зярдо од школасонть гайгезеви баягинесь.
Пушкина ды Садовской велетнесэ стявтовить оймсема таркат
«Комплексное развитие сельских территорий» госпрограмманть лувсо Ромодановань райононь Пушкина велесэ тедеде арсеви топавтомс покш проект: строямс оймсема од тарка. Тевтне уш молить, ды строицятне арсить кенярдовтомс эрицятнень июнь ковсто. Васняяк витневи Ине Отечественной войнань участниктненень памятникесь, сон тееви мемориальной комплексэкс. Мейле ваксозонзо тееви оймсемань зонась, конась эштё мазылгавтови чувтосо-куракшсо ды цецясо.
А вана Садовской посёлкасо карми стявтозь эйкакштнень туртов налксемань площадка, конань подрядчиктне истя жо тейсызь те кизэстэнть.
Эрямо таркадо
– Башка вановт ало районсонть тетявтомо-ававтомо кадовозь эйкакштненень, од семиятненень ды пек эрявикс специалисттнэнень эрямо таркань строямось ды максомась, – ёвтни Сергей Валентинович Ведяшкин. – Тетявтомо-ававтомо кадовозь эйкакштнень коряс спискасонть сёрмадозь 58 ломанть. 2022 иестэ те категориянтень рамазельть колмо квартират. Социальной наймонь договортнэнь коряс минь сёрмадстынек контрактт ниле квартирань рамамс ды мартсто панжоматне уш максозельть од азортнэнь туртов. Тедеде сынст туртов жо арсетяно ушодомс эштё ниле квартирас кудонь стявтомо, зярс анокстатано документтнэнь.
«Обеспечение жильем молодых семей» подпрограмманть коряс районсонть эрямо таркань кис очередьсэ аштить 87 семият, кудот-квартират весемезэ учить 469 семият. Аволь умок эрямо таркань рамамс минь максынек эрямонь сертификат Чернобылень АЭС-ссэнть радиациянтень понгозентень Н. М. Ереминнэнь. Весемезэ 2 миллионт 928 тёжат целковойть.
Федеральной, региональной ды местной бюджеттнэнь вельде арсетяно рамамс кудо наймонь коряс «Аркада-С» ООО-нть пельде Ромодановань поликлиникань прявт медсестрантень Г. И. Нугаеванень. Кудонть строямось уш ушодовсь Мирэнь ульцясонть.
Лезкс спецоперациянь участниктненень
ды сынст
семиятненень
Райононь эрицятне, мейсэ маштыть, лездыть спецоперациянь участниктненень ды сынст семиятненень. Цёратнень туртов секе-тев ильтяви гуманитарной лезкс, конанть усксить райононь волонтёртнэ эсест машинасо. Ильтясть бензопилат, генераторт, ярсамо- ды оршамопельть. Эйкакштне эйдень кужосо ды школасо кучнить тов сёрмат ды артовкст, аватне юткошкасто недлячинь школасо кодыть маскировкань алтымат (сетть). Лезкс максови СВО-нь участниктнень семиятнень туртовгак. Гайневтицятнеде ламо, кинень эряви тикше кудо икеле ледемс эли пенгеть анокстамс, эли ведь ветявтомс – эрьва энялдомась ванкшнови ды топавтови велетнень администрациятнень марто вейсэ.
«Эсенектнень минь а кадсынек! Мезе вийсэнек – тейтяно сынст туртов, эдь неть ломантне алкуксонь геройть ды тиринь масторонь ванстыцят!» – тешкстызе меельцекс Сергей Валентинович.
Тешкстама:
Ромодановань районось теезель 1928 иестэ ды тедедень июльстэ тензэ топодить 95 иеть. Районсонть эрить 18 тёжадо ламо ломанть. Тесэ 12 велень поселеният (весемезэ 49 велеть). Районсонть важодить истят покш предприятият, кода «Ромодановосахар» ООО-сь, конась нолды сахар, ды АПО «Элеком» ОАО-сь, конась теи комбикором. Сехте содавикст кото велень хозяйстватне: ТНВ «ООО «Комсомолец» и К», «АПО «Элеком», ТНВ «ООО МАПО и К», «Комсомолец», «Ромодановское», «Атьма» ООО-тне.
Районсонть ульнесть эрзянь кавто велинеть: Курган ды Курилово. Курганось умок уш ёмась картатнень лангсто, Куриловась жо, козонь чачсть эрзянь содавикс сёрмадыцясь Никул Эркай, журналистэсь Владимир Бажанов, народной артисттнэ, морыцятне Дмитрий Еремеев ды Раиса Беспалова, цють типельди. Кеменьшка иеде икеле тосо эрясть сядошка ломанть, ней седеяк аламо, ды, кода невти эрямось, сонзэ учи Курганонь уцяскась.
Марина Девятова
Фототне авторонть