Республикань паксятнесэ сюротнень нуемась моли уш колмоце ков. Аграрийтне пурнасть 1 млн 700 тёжат тоннадо ламо сюро. Неть эштё аволь меельце цифратне. Вейке гектарсто средней урожайностесь 40,7 центнерт. Васенце таркасо сюронть коряс ашти Кадошкинань районось, тосо вейке гектарсто саезь 50,2 центнерт.
Кода молить паксянь тевтне Покш Игнатбуень «8 Марта» ООО-со (сонзэ прявтсо важоди Н. И. Куманёв), теде тенек ёвтнесть предприятиясонть. Минек вастымизь агрономось Валерий Евгеньевич Левщанов. Сон ёвтнесь, мезе видсть, мезе зяро чачсь, мезе лангсо важодить ней.
– Тедеде, кода икеле иетнестэяк, паксятнень видинек эрьва мейсэ. 1600 гектарт озимой товзюро, 2 тёжат гектарт шуж, 1,5 тёжат гектарт яровой товзюро, 2100 гектарт ламбамо якстерькай, 200 гектарт рапс, 300 гектарт зёрнакс кукуруза ды 800 гектарт – силосокс. Норовось вадря, кецявты велень трудийтнень. Озимой товзюрось – вейке гектарсто 45 центнерт, шужось – 39, яровоесь – 57 центнерт. Невтевкстнэ парт. Мелень иенть коряс 10 центнердэ седе ламо урожаесь. Пивсынек 233 тёжат 680 тоннат сюро. Сюронть усксинек «Элекомс», Саранскоень элеваторс, Орданьбуень хлебоприёмной пунктов, пештинек эсенек складонок. Те иестэ раминек сюронь нуемань кавто комбайнат – ACROS 585 ды Т-500 (сон Ростсельмашонь). Од машинатнень марто тевтне седеяк парсте молить. Сюронь нуемасо весемезэ важодсть малав 25 ломанть: комбайнёрт, механизаторт, – ёвтни агрономось.
Ней кадовсь таргамс ламбамо якстерькаень гектартнэнь, ды паксятнесэ эштё ашти силосокс кукурузась. Тикшесь весе анокстазь.
Зярдо пачкодинек Ташто Чамзань паксятнес, цёратне нусть меельце гектартнэнь. Ёжост паро, иесь вадряль, сюротне кенерезь, коськеть.
– Мон чачинь ды эрян теске, Чамзасо, – ушодызе кортамонзо комбайнёрось Евгений Васильевич Дорофеев. – Тонавтнинь Покш Игнатовань ПТУ-со механизаторокс. Нама, служинь армиясо – минек шкань цёратнень эрямосо те ульнесь васенце таркасо. Эрямом перть важодинь эрьва косо, эрьва кодамо ёнкссо. Чарькодинь, чачома таркадо паро мезеяк арась! Комбайнань руль экшс васенцеде озынь 14 иесэ цёрынекс. Васня лездынь покш цёратненень. Пштистэ ванынь мельгаст, мезе ды кода теемс, кунсолынь сынст. Ней уш паксянь тонавтыцян тоначисэть. Свал ёвтан тенст сюкпря. Неть – Федя лелям Фролов, Михаил Зайкин – лангсонок покш ульнесь. Ды вана 30 иеть важодян комбайнасо. Пек вечкеви монень те тевесь, оймень коряс. Цёрамгак озась комбайнас.
Эряви меремс, Е. В. Дорофеев сонськак максы превть одтнэнень, тонавты нуемань салавачитненень. Ней мартонзо комбайнасо ардтни Дмитрий Астафеев. Сон тонавтни Саранскоень электромеханической колледжсэ. Нилеце кизэ нуи комбайнасо ды те тевесь мелезэнзэ пек тукшны.
Содазь, весе нуезь сюрось ловови ды онкстави. Кортнинек минь предприятиянь весовщикенть мартояк. Александр Николаевич Бочкарев кемень иеть топавты тевензэ, онкстни-сёрмали пурназь сюронть.
– Тедеде сюротнень нуеме лиссть июлень 25-це чистэ. Мон лован ды онкстан эрьва машинанть. Комбайнёртнэнь ды шофёртнэнь коряс даннойтнень совавтан реестрас, максан бухгалтерияв. Эрьва чистэ моли учёт, а манявома ве цифраскак, весе улезэ виде. Зярс комбайнатнень вакссто меельце машинась а сы – ковгак а туят таркастот. Те таргавкшны пелевес. Прицеп марто вейке КамАЗось уски 22-23 тоннат товзюро. Шужось седе шожда, – ёвтни весовщикесь.
А. Н. Бочкарев пингензэ перть велень хозяйствасо. Сон чачсь Покш Игнатовасо. Тонавтнесь Н.П. Огарёв лемсэ МГУ-нь велень хозяйствань факультетсэ агрономокс. Вузонть прядызе 1975 иестэ. Важодеме ушодсь эсест райононь Горки велень колхозсо агрономокс, тосо председателекс важодсь орденоносецэсь А.А. Пучков. Седе тов ульнесь райононь прявт агрономокс, райкомонть пингстэ велень хозяйствань отделэнь инструктороль. Ды нейгак, кадык умок пенсиясо, а туеви велень-паксянь тевтнеде.
«8 Марта» ООО-со ансяк кенерсть сюротнень пивсэме, сеске кундасть ламбамо якстерькаенть таргамо. Сондензэ вейке гектарсто арсеви саемс 500 центнерт. Якстерькаенть таргить ниле покш комбайнат. Эйсэст важодить Сергей Сюзьмин, Денис Чибиркин, Александр Кабаев, Иван Сенгаев, Сергей Асманов, Сергей Левщанов ды лият.
Иван Васильевич Куманёв «8 Марта» ООО-в сась сисем иеде икеле. Сон – Андреевкань. Школанть прядомадо мейле тонавтнесь Кемлянь аграрной колледжсэ механикекс. Ней тесэ важоди механизаторокс.
– Истя уш лиссь, важодян ламбамо якстерькаенть кастомасо. Васня тунда видян эйсэнзэ, мейле касовкстнэнь эрьва мейсэ пургсесынек – илязо касо зыянов тикшесь ды илизь сэве унжатне. Ней карминек таргамонзо. Сон чачсь вадря, коштось пароль, эдь якстерькаентень пек пси а эрявкшны. Валнынек шкастонзо, мезеяк берянь эзь педя, ванькс. Монь GRIMME комбайнанть нолдыть Германиясо. Техникась паро, пиземеде а пели, роботамо вечки. Васня, нама, тонавтнинек эйсэнзэ важодеме, ванкшнынек, кода ды мезе. Якстерькаенть таргатано чинек-венек. Ютатано 25-30 гектарт. Комбайнанть потс кельгить 25 тоннат. Каятано якстерькаенть покш буртс. А уш тосто КамАЗтнэ ускить эйсэнзэ «Ромодановосахар» заводов, – ёвтни Иван Васильевич.
Куманёвтне – ламо эйкакшонь триця семия. Нинзэ марто трить-кастыть колмо эйкакшт. Васенце тейтерест уш мирдень кедьсэ, эри Саранскойсэ. Цёраст кармась тонавтнеме Нижний Новгород ошонь Велень хозяйствань университетсэ. Вишкинентень кавксо иеть, сон мольсь омбоце классос. 2005 иестэ Куманёвтне стявтсть эстест кудо, кирдить ракшат. Велесэ сынтемест а кода.
Иван Васильевич корты, неень шкань малав весе од ломантне тукшныть эрямо ошка. Киньгак арась мелезэ важодемс мода лангсо. Ды ялатеке улить зярс истят, кить ве чияк а аштевить ошсо, сынст оймест терди велев, косо чачома модась, кона максы вийть. Самай истятнэнь лангсо кирдевить велетне. Кортамстонок ушодовсь валомо пиземе, кекшинек машинас. Цёратнень тевест жо эзь прядово, сынь поладсть таргамо ламбамо якстерькаенть.
Татьяна Маторкина
Фототне Эдуард Ретунскиень