Маень 12-це чистэ масторонь келес тешкстави Раськеютконь медицинской сестрань чись. Те кенярксчиденть икеле чистэнть «Эрзянь правда» газетань журналисттнэ ульнесть «Республиканской онкологической диспансер» МР-нь здравоохранениянь государственной бюджетной учреждениясонть.
Неень шкань од технологиятнень эрямос совавтомаст пингстэ ламо тевть кармасть топавтовомо электрониканть вельде. Ансяк кодамояк научной панжовксонь вельде а полавтови медицинской сестратнень важодемаст.
Валске ранаяк минь сынек Республиканской онкологической диспансерэв. Те лецямонь учреждениясь пек явови сеть лия клиникатнеде, ков ломантне сеедьстэ пшкалить ормаст лангс ливтемань эли жо мадить больницяв шумбрачист ванстомга (профилактикань коряс). Тей жо ломантне васняяк сыть сыненст путозь стака орманть (диагнозонть) марто, лиясто, зярдо эрямо таркань коряс больницятнесэ врачтнень улить кавтолдомаст орманть коряс.
А мезть сёпомс, те поликлиникантень молиця ломантнень ютксто малав весень чачост потмуральть, кода сынсест сэредицятнень, истя жо мартост молицятненьгак. Весе тень редязь-неезь аволь кенярксов ёжомарямост тосонь важодицятненьгак. Кода эзть бажа сынь минек вастомс лембестэ, сеть сельметне, конат эрьва чистэ неить стака ормат, сельведть, пачтясть потмоёжодост. Кода видькстась тенек вейке медсестрась, стака орманть редязь, зярдо неят, ломанентень кадовсь эрямс допрок аламо иеть, ковт, чить, – зярдояк тенень а тонадат. Эрьва ломанень уцяскась прок сардокс сови седеентень, ойментень ды сонзэ нусманя варштавксось кувать кадови ледстнематнес.
Валскень рапортонть ютамодо мейле минь пшкадинек Республиканской онкологической диспансерэнь главной медсестрантень Татьяна Евгеньевна Ботаницинанень. Кевкстинек сеть медсестратнень лемест, кить умок ды парсте важодить те лецямонь учреждениясонть. Тешкстаса, мейсэ пек стакалгавтынек тевензэ. Эдь тесэ эрьва медсестрась бажи важодеманзо топавтомс истя, штобу куш аламодо шождалгавтомс ормалгадозенть сэредьксэнзэ ды каземс тензэ кемема вандынь чинтень.
– Неень шкане минек диспансерсэнть важодить подразделениянь 25 старшей медсестрат, койсэнь, минек профессиясо кинь-бути башка тешкстамс карми а виде, – мерсь Татьяна Евгеньевна. Эдь юткстост эрьвась бажи тевензэ топавтомс истя, кода сонзэ тонавтызь, кода тензэ невтизь наставниктне важодеме ушодомсто. Васень таркас жо весе сынь аравтыть седеймарямонть, чевте, лембе валонть.
Валентина Юдина