Алёна Логинкина вана уш сисем иеть важоди С. В. Катков лемсэ Республиканской клинической больницясо. Сон топавты медсестрань-анестезистэнь тевтнень. Валонзо коряс, теке мерят, исяк сась тей роботамо. Сисем иетне ливтязь ливтясть, эзть марявояк.
Сонзэ важодемась аволь шождатнестэ, ламо дежурстват, кедьганзо ютыть стакасто сэредицят, кинень куроксто эряви максомс медицинань лезкс.
Од тейтересь чачсь Орданьбуень Орозбие велесэ. 9-це классонть прядомадо мейле мольсь тонавтнеме Орданьбуень медицинской колледжев. Медицинань профессиядонть сон ламо марсесь Валя патянзо пельде, кона эрямонзо перть важоди врачокс-педиатракс. Валентина Васильевна Солдатова сонськак зярдо-бути ушодсь важодеме медсестракс. Тона ёвтнесь, кодамо те вадря, лезэнь кандыця ды мельстуиця тевесь. Алёна эзь пелекшне верень неемстэ (кода эрси лия ломантнень), эзь тандадокшно сэредицядо. Сынст классто колмонест мольсть тонавтнеме медколледжев. Се иестэнть бюджетэнь отделения арасель, секскак савсь тонавтнемс ярмак лангс. 2011 иестэ саезь 2015 иес сон тонавтнесь «Сестринское дело» специальностенть коряс.
– Васень шкасто весемесь марявсь стакакс ды а чарькодевиксэкс. Эрявсь ламо тонавтнемс теориянть. Эрьва занятиясто весень кевкстнесть. Ансяк зярдо ушодовсь практикась – весе мелявкстнэ ёмасть. Васня тонавтнинек тееме внутримышечной инъекцият. Кедтне сорность, а мейле тонадовсь. Венас пупамс марявсь пек стакакс: а бути а понгат? Орданьбуень больницясо практиканок ютась процедурной кабинетсэ, саилинек ломантнень верь. Меельце курссо практика ютынь Саранскоень 3№ больницясо хирургической отделениясо, – ледстни Алёна васень шканть ды пейди эсензэ лангсо.
Медицинань практикань ютамодо мейле сонзэ тердизь тов важодеме. Истя Алёна ушодсь роботамо анестезиологиянь ды реанимациянь отделениясо. Эрьва кодамо таркасо од тевень ушодомась маряви стакакс. Васенце шкастонть Алёнанень ламо лездасть врачтне ды медсестратне: тонавтсть, ёвтнесть, кода ды мезе. Сонгак эзь чатьмоне, кевкстнесь, бути мезесь эзь чарькодеве. Кияк эзь покорда, толковасть. Ськамот сэредицянть марто а кадтадызь. Свал моли вейсэнь, командасо важодема.
– Минек отделенияв понгить сетне, кинень эряви максомс экстренной лезкс. Те: киньгак марто мезеяк теевсь: верень чудема, томбавкст, потмонь органонь сезевемат, саемга, авариядо мейле; кинь пек валгсь давлениясь; кинь ёжозо маштсь. Теде башка, тенек ускить ломантнень операциядо мейле. Минь пштистэ вантано, кода сэредицятне сыргозить наркоздо мейле. Вантано давлениянть, пульсонть, верьсэ кислородонть мельга. Бути операциясь стакаль, ломантне аволь сеске стявить пильге лангс, аштить минек кедьсэ, зярс ёжост виеми. Истя жо операциянь шкасто аштетяно врачтнень вакссо, тейтяно сень, мезе мерить. Тосо эрьва мезенть мельга эряви пштистэ ваномс. Свал топавттано врачтнень кармавтоматнень, – пачтясь медсестрась.
– Кода роботыде ковидэнь шкасто?
– Минек больницясь теевсь госпиталекс. Пек стакаль. Од орма. Кода мартонзо тюремс, мейсэ лецямс, кода панемс? Минь эринек больницясонть, ламо дежурстват. А кона шкане ульнесь озамскак. Монськак стакасто сэрединь те ормасонть. Ковидэсь токшинзе весень – сыретнень, одтнэнь, эзь вано киньгак лангс. Отделениясонок ИВЛ-нь аппаратсо аштесть кемгавксово ломанть. Ульнесть истят, кинь тевелявост коронавирусось пек сэвекшнинзе, ансяк сынь стясть пильге лангс. Стакасто сэредсть сетне, кинь онкология, сахаронь диабет. Весень ульнесь покш мелест эрямс, энялдсть идемс. Минь, кода маштынек, оймавтынек ломантнень ды теинек весементь, мезе эйстэнек аштесь. Сэредицятнень озавтылинек, андылинек, кортнилинек мартост. Монень те шкас стака ледстнемс неть читнень-ветнень. Шождасто сэредицят анестезиологиянь ды реанимациянь отделениясо а эрсить. Роботамс стака, тесэ тевтеме зярдояк а аштят, ансяк монь мельс тукшны, – ёвтни Алёна. Мелят сон ютась квалификациянь кастомань курсат, ней медсестрань васенце категориязо.
Важодемадо мейле сон капши кудов, косо эйсэнзэ учи мирдезэ. Оймсема читнестэ, конат эрсить чуросто, сынь ардыть велев малавиксэст туртов. Орозбиесэ эрить Алёнань тетязо-авазо, сазорозо, ялаксозо ды вечкевикс бабазо.
Татьяна МАТОРКИНА