Минек героинясь чачсь Орданьбуень Баеньбуе велесэ. Сон вишка шкасто саезь бажась улемс тонавтыцякс. Учителекс важодсь Анатолий Васильевич Кудашкин, Янань покштязо. Баеньбуень школасо сон ветясь история. Янанень ульнесть ансяк ниле иеть, зярдо тона тусь эрямостонть. Чарькодеви, паро ладсо а ледстяви тензэ. Ялатеке кирди мельсэнзэ, кода тензэ казекшнесь налкшке.
Школасо тонавтнемстэ Яна свал явсь мель весе кенярксчитненень. Сон ульнесь вастовоматнень ветицякс, сонськак сцена лангсо ловнось стихть. Весть школазост сакшность Н. П. Огарёв лемсэ МГУ-нь филологиянь факультетстэ профориентационной тевень коряс. Ёвтнесть вуздонть, тонавтнемадонть. Мартост ульнесь Низовка велень студенткась Алеся Клементьева, кона мелень кепедезь пачтясь университетэнь эрямодонть (истя лиссь, мейле Алесят-Янат теевсть паро ялгакс ды натой эрястькак вейсэ). Те вастовомадонть мейле кавтолдоматне ёмасть, Яна кочкизе филологиянь факультетэнть, куш васня арсесь историческойденть.
– Васенце шкастонть монень марявсь стака. Васенце курссо пандемиядонть пельие тонавтнинек дистанционной лувсо. Саранскоенть парсте эзия сода. Паро, лездасть ялгатне, эзть аште ве ёно тонавтыцятнеяк. Мейле тонадовсь тень. Ней мизолдозь ледстнян се шканть. Вана уш колмоце курссо тонавтнян «Филология» ёнксонть коряс, эрзянь ды мокшонь кельтнень ды литературань профильсэнть, – ёвтни Яна.
Меельце шкасто минек регионсо ульнесть од ломанень зярыя форумт: Од ломанень весероссиянь промкс, волонтёронь промкс, «Марса-Вейсэ», Финнэнь-угрань раськетнень интеллектуальной творчествань регионъютконь фестиваль ды лият. Яна ульнесь эрьвасонть. Интеллектуальной фестивальсэнть сон важодсь литературань семинарсо.
– Мельспароль теевемс содавиксэкс МР-нь Писателень союзонь правлениянь прявтонть, поэтессанть Татьяна Швецова марто. Сон тердимим эрзянь од сёрмадыцятнень семинаров. Тосо васенцеде ловнынь эсень ёвтнеман. Сёрмадынь уш зярдыя, ансяк ковгак эзинь кучне ды киненьгак эзинь невтне. Бажинь чарькодемс ды содамс: истя-аволь истя теян, парсте эли аволь сёрмадозь, кодамо карми ломантнень мелест. Вастымизь парсте, теевинь содавиксэкс лия автортнэнь марто. Те монень ульнесь паро урококс, кода кортыть, паро эскелькс икелев, – корты студенткась.
Мелят Яна пелькстась конкурссо, косо эрявсь Эрзянь келень чинтень ловномс стихотворения ды снимамс видеос. Пелькстамонть ютавтсь Равчирень Финнэнь-угрань раськетнень культурань центрась. Сон ловнызе Александр Араповонь «Кармавты шкась» произведениянть ды саизе васенце тарканть.
Истя жо мелят од тейтересь пелькстась «Мисс Осень» фотоконкурссо, косо саизе васенце тарканть (сонзэ ютавтсь «Маяк» газетась).
Яна а стувтни тиринь веледензэ. Сонзэ нейгак тердтнить кенярксчитнес, конат ютавтовить велень Культурань кудосо – Од иесь, Авань чись, Сыре ломанень чись, Изнямонь чись. Тосо сон ловны стихть эли жо вети покш чинть. Велесэ эйсэнзэ свал учить малавиксэнзэ: тетязо-авазо – Светлана Николаевна ды Эдуард Анатольевич, сынь важодить Орданьбуень светотехнической заводсо. Янань ули Алёна сазорказо, кона тонавтни школасо. Эштё вейке покш учицязо – Клавдия Михайловна бабазо. Сон васенце превс путыцязо, оймавтыцязо. Ошсто самсто Яна капши содавтомс бабанзо ды покштянзо. Вечкевикс нуцьканзо Клавдия Михайловна кавани каштом ямдо, вишнянь, умарень, пангонь прякадо. Сон, аволь кода велень лия ломантне, каштомонзо эзизе максо калавтомс. Истя, кодамо тантей каштом ям сон пиди – кияк а машты.
Аволь пек умок эрзянь тейтересь панжсь «ВКонтакте» социальной сетьсэ «Эрзякс» группа. Зярс тосо аволь пек ламо ловныцят. Яна тосо сёрмады эрзякс, путни мазый фотографият. Ды те пек тукшны ломантнень мельс. Мезть сёпомс, Интернетсэ пек аламо таркат, косо пачтяви эрзятнеде, минек эрямодонть, косо гайги келесь. Те пек паро ушодкс, вадря невтевкс лиятненень. Ломантне ёвтыть тензэ сюкпрянь валт. Те седеяк максы вийть ды од мельть-арсемат.
Юткошкасто Янань вечкевикс тевезэ – фотографиянь тейнемась. Снимси ломанть, пертьпельксэнть. Теде башка, пек вечки стихень ловноманть. Кунсолы ды ваны, кода ловныть лиятне, кодамо сон, художественной декламациясь, тонавтни пельдест, варчни эсензэ виензэ. Ды бути велесэ тердить ловномо кенярксчистэ – паро мельсэ моли.
Ней студенттнэнь ютыть каникулат. Сынь оймсить тонавтнемадонть кудосо малавиксэст марто, пурныть вийть седе тов. Арсетяно тенст кеме шумбрачи, паро эрямо, парсте тонавтнемс ды молемс ансяк икелев!
Татьяна Маторкина