Вторник, ноября 30, 2021
Важное


Те иень сёксня топодсь ие се шкастонть, кода минек республикасо панжовсь Региононь управлениянь центрась. Шкась невтизе те организациянть эрявиксчинзэ, сон теевсь Мордовиянь эрицятнень ды властень кирдийтнень ютксо «сэдекс» стакачитнень вейсэ изнямсто.


Кода мерсь те ведомствань прявтось Андрей Барашихин, весе те шканть перть кемекстазельть ды ванкшнозельть 32 827 пшкадемат, конат састь республикань эрицятнень пельде. Сынст ютксто 10 052 «Госуслуги» порталонть вельде ды 22 775 соцсеттнень. Андрей Ивановичень валонзо коряс, пшкадеманть коряс каршо валось ломанентень сы колмо часонь перть. Республикань эрицятне редить те важодеманть лезэвчинзэ ды седе сеедьстэ кармасть пшкалеме местной властень органтнэнень. Истя, 2020 иень октябрясто пшкадематнеде ульнесь 581, те иень теке жо шкантень сынь ламолгадсть – 1301.

– Эрьва чистэ ванкшнотано кулятнень, конат сыть тенек «Госуслуги» порталонть ды «Госуслуги. Решаем вместе» мобильной приложениянть вельде, – мерсь Андрей Барашихин. – Неть сеттнень вельде пшкадематне явовить, васняяк, сеньсэ, сынь седе курок ванкшновить, совить «фаст-треки» специальной подкатегориянтень. Ютазь иестэ истят яволявтоматнеде ульнесть 8997, те 89,9 % весе пшкадематнестэ, конат ванкшновить седе эрязасто.

Текенень сон поладсь, ютазь иень октябрясто саезь ЦУР-нь аналитической блоконь специалисттнэ лангс ливтсть 66 информационной тандавтомат (угрозат) ды 173 зыянов тевть.
Эрьва недлясто Мордовия Республикань Прявтонтень пачтявить информационно-аналитической документтнэ седе, кодамо стакачи марто вастневить минек республикань эрицятне.
Минь эштё эзинек стувто, кодамо кажо лисекшнесь те иень кизна П. Г. Смидович лемсэ заповедниксэнть. Васняяк эрицятненень эрявсь видестэ пачтямс пожардонть, кода тосо ютыть толонь мадстемань коряс тевтне. Кодашка зыян кандокшнось республикань районтнэсэ эрицятненень даволось, зяро ломанень кудотнесэ яжавкшность латотне, каладокшность эрямо таркаст.

Эрямонь стакачитнень лисемстэ ломантне а свал содыть, кинень пшкадемс лезкс мельга, ней ламот тонадсть апарост чамдомс интернет вельде. Невтемакс, экшенть самонзо марто Мордовиянь кавто велетнесэ – Орданьбуень Тургенева посёлкасо ды Темниковань Андреевка велесэ – эрямо таркатнес кувать эзть максо лембе. Те кевкстемась истя жо витезель нурька шкас.

Региононь управлениянь центрань специалисттнэ ютавтсть колоньгеменде ламо тонавтнемань мероприятият исполнительной властень органтнэнь, местной самоуправлениянь органтнэнь, Н. П. Огарёв лемсэ Мордовской государственной университетэнь студенттнэнь марто. Истя жо тов совасть лия организациятне, конатнень ульнесь мелест седе ламо содамс, кода вейсэ сыненст пшкадицятнень марто лисемс те эли тона стакачистэнть. Неть тонавтнематнесэ весемезэ ульнесть 500 ломанть.
Теде башка, Н. П. Огарёв лемсэ МГУ-нть ды «Диалог-Регионы» АНО-нть ютксо кемекстазель вейсладямонь документ. Сонзэ коряс МР-нь Региононь управлениянь центрась карми важодеме вейсэ университетэнть марто интернет-коммуникациянь, социологиянь, политологиянь ёнкстнэнь коряс.
Мордовия Республикань Региононь управлениянь центрась эрицятнень марто аволь ансяк изни стакачитнень, истя жо ломантненень пачти седе, мезе сынст се шкастонть сехте пек талновты, лезды седе курок витемс асатыксэнть, ёвты, ков эряви пшкадемс зыянов тевенть лисемстэ.

Аволь умок Мордовиянь эрицятненень ды инжетненень ЦУР-нь специалисттнэ анокстасть истят чат-ботт: «Навигатор абитуриента», «Турист – 13» ды «Спорт – 13».
Те иень майстэ саезь ЦУР-нть ушодксонзо коряс тевс нолдави #Мемориал победы – 13 спецпроектэсь. Сонзэ коряс республикасонок витневить ды одкстомтовить памятниктне, обелисктне, конат теезь Ине Отечественной войнань участниктненень. Аволь умок Региононь управлениянь центрась теевсь информационной партнёрокс Саранскойсэ велоинфраструктурань тееманть коряс. Сонзэ эрямос совавтомс арсеви 2022 иестэ.

Течи Региононь управлениянь центрасонть пурнавсь тевензэ парсте содыця, свал одонть вешниця команда, конась анок лездамс весенень, кить а содыть, кода витемс те эли тона асатыксэнть. Содадо, эряви ансяк пачтямс талновтыцядонть соцсеттнесэ, «Госуслуги» порталсо эли «Госуслуги. Решаем вместе» мобильной приложениянть вельде.

Валентина Юдина
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».