Тундонть ушодовомсто, зярдо пертьпельксэсь аламонь-аламонь вельми кувака телень якшамотнеде мейле, тешкстави сехте мазый ды лембе кенярксчись – Тейтерь-авань раськеютконь чись. Мазый, ёроков, эряза ды превей аватне – семиянь юр, государствань неже. Сынь кастыть эйкакшт – масторонь вандынь чинть, виевгавтыть экономиканть ды промышленностенть, вадрялгавтыть эрямонь социальной ёнксонть. Мезе иля сае, куш косо ули путовксост. Течи минь содавтадызь велень хозяйствань ёнкссо важодицятнень марто, ёвтнетяно «Сабанчеевское» ООО-нь тейтерь-аватнеде.
Наталья Владимировна Калинина – «Сабанчеевское» ООО-нь прявт бухгалтерэнь тевень топавтыця. Те профессиясонть роботы малав комсь иеть ды лови сонзэ сехте вадрякс.
Наталья Владимировнань важодемань кизэ ушодовсь Таразбуень «Труд» СППК-сонть. Васень шкастонть ульнесь ГСМ-нь складонь прявтокс, зярсыя роботась лавкасо микшницякс. 2005 иестэ кундась бухгалтерэнь тевентень, конанть покш мельсэ топавты течияк.
Од порасто кочкавт профессиясь Наталья Владимировнань туртов кармась эрямонь тевекс. Сон мельспаросо васты важодемань эрьва чинть, топавты вечкевикс тевенть. Ды кемексты, покш уцяска, зярдо важодемась канды кеняркс.
Наталья Владимировна истя жо уцяскав ни ды ава. Мирдензэ Михаил марто сынь вейсэ уш 29 иеть. Калининтнэ трясть-кастсть кавто цёрат. Покшось, Михаил, важоди МВД-нь ёнкссонть, вишкинесь, Александр, ней юты служба армиясо. Аваст-тетяст туртов сынь кеме неже, кемема ды эрямонь смусть.
– Эрьва аванть туртов покш уцяскакс ды прявт питнейчикс ашти семиясь, – корты Наталья Владимировна. – Монь эсеньгак кастсть ды вишка шкасто тонавтсть эсь кудораськень аравтлувтнень, койтнень-кирдатнень ванстомо ды ней весементь бажан максомс эсь эйкакштненень, штобу эрямосонть сынь улевельть алкуксонь ломанекс, эсь семиятнень туртов кеме нежекс.
Татьяна Николаевна Козина – хозяйствань прявт экономист. Роботы тесэ малав кеветее иеть.
Татьяна Козина вишка шкасто саезь несь эсь прянзо цифратнень марто важодемасонть. Ловомояк курок тонадсь, школасояк математикантень явиль ков седе покш мель лия предметтнэнь коряс. Секскак школанть прядозь, прянзо кувать эзь яжа сы шкань профессиянть кочкамга. Мольсь тонавтнеме Саранскоень кооперативной техникумов, кочкизе «Бухгалтерский учёт и финансы» специальностенть. Тонавтнемань шкась ливтясь куроксто. Велявтсь тиринь Отяжелень районов. Важодемасо эсь прянзо варчнизе ламот ёнкстнэсэ – ульнесь микшницякскак, роботась страхованиянь тевсэнть, сывелень комбинатсо. Мейле велявтсь тиринь велев ды ушодсь важодеме Аловелень хозяйствасонть. Те шкастонть ливтясть уш малав кеветее иеть.
Эряви меремс, Татьяна Николаевнань мирдезэ Валерий Михайлович истя жо важоди «Сабанчеевское» ООО-со. Сон водитель, мельганзо кемекстазь УАЗ автомашинась.
Татьяна Николаевна эсь семиядонзо корты вечкезь, сэтьме мизолкс марто. Валерий Михайлович марто содавиксэкс теевсть Отяжелесэ лавкасо роботамсто. Цёрась совась мезень-бути рамамо ды сеске редизе ёлганя тейтерьканть. Лембе варштавксозо жо овсе солавтызе седеензэ. Од ломантне вастневсть иешка ды налксесть свадьба. Татьяна Николаевнань ды Валерий Михайловичень касыть кавто эйкакшост. Покш тейтерест Светлана тонавтни М. Е. Евсевьев лемсэ МГПУ-нь физико-математической факультетсэ, Роман цёраст – зярс школасо, сонензэ 11 ие.
– Урьвакстомадо мейле велестэ туемадо мельтне кода-бути эзть сакшнояк. Важодема таркат муевсть кавтонек туртов, чачсть эйкакшонок ды шкань ютазь, эрямо таркань коряскак кевкстемась решавсь. Миненек, кода од семиянтень, государствась явсь субсидия эрямо таркань тееманть туртов. Стявтынек вадря кудо ды ладинек эрямонок. Мон уцяскав ава. Вакссон вечкиця ды чарькодиця мирде, мельспаронь казиця эйкакшон. Арази аволь те эрямонь смустесь?! – кемексты Татьяна Козина.
Велень хозяйствасо ламо эрьва кодат профессият. Васенцетнень ютксо ашти агрономонь тевесь. Ламонень маряви, те роботась седе лади ёроков, виев, кеме цёратненень. Теке марто, неень шкасто агрономонь профессиясь эрямонь тевекс кармась ламот тейтерь-аватнень туртовгак. Истятнэнь ютксо превей, эряза, мазый авась – «Сабанчеевское» ООО-нь прявт агрономось Вера Сергеевна Кочурина. Важоди уш зярыя иеть. Те шканть перть ютазь-ардтнезь тёжат вайгельбеть паксят, ульнесть важодемань стака чить ды апак удо веть. Ансяк эсь кочкавт тевденть эзь янксе зярдояк. 2008 иестэ Н. П. Огарёв лемсэ МГУ-нь Аграрной институтонть прядомадо мейле сась эрямо Отяжелень районов. Зярыя иеть важодсь райононь Администрациянь велень хозяйствань управлениясо. Ды ве шкасто лембе ды валдо кабинетэнть полавтызе калиця чи ало ды пулев паксясо важодеманть лангс.
Вера Кочуринанень эрьва ёндо мелень коряс эсь тевесь, вейкесь мелявтовты – аволь истянь зняро шка, кода бу эряволь, кадови эсь семиянть туртов. Мирдензэ Иван марто сынст касыть кавто эйкакшост: тейтерест – Александра ды цёраст – Захар. Аваст-тетяст важодемань свалшкань аюткочиденть эйкакштне вишкинестэ уш кудосо теевсть алкуксонь азорокс. Ды те седеяк кемексты сынст ютксо ояксчинть.
– Паряк, те аламодо а виде, што эйкакштне вишкинестэ тонадсть тееме кудоютконь ламот тевтнень. Ансяк ней мон а мелявтан, сынь аштить вачосто эли тевтеме прянть кайсить. Минек сынь, бути эряви, ярсамскак анокстыть, уликс тевтненьгак тейсызь, – ёвтни Вера Сергеевна. – Монь койсэ, эйкакштнень эряви кастомс истя, штобу вечкемась, чарькодемась, вейке-вейкенень кемемась улевельть васень таркасо. Минек семиясо неть ёнкстнэ аштить прявт питнейчикс. Зярдо ули кемема, вейсэнь эрямось ули шождакс, тынь анокт панжомс мезе-бути од, вейке-вейкень туртов теемс паро. Лиякс а кода.
Юлия Еремина
Вечкевикс ават! Ёвтан тенк седейшкавань поздоровт Тейтерь-авань раськеютконь чинть кувалма! Тынь ванстадо кудосо сэтьмечинть, трятадо эйкакшт, тейтядо покш эскелькст профессиональной ды общественной тевтнесэ. Тынь кармавтадо минек, цёратнень, теемс покш тевть, панжомс ёрокчинек, изнямс. Мельвановикс тейтерь-ават, седейшкава арсян тенк шумбрачи ды изнявкст весе тевтнесэ. Кадык топавтовить мельтне-бажамотне, эрямось свал карми истямокс, кода те покш чись – кенярксов, валдо, пешксе тундонь маней чиде. Уледе уцяскавокс ды вечкевиксэкс! Кенярксчи марто!
Д. Н. Игушкин, «Сабанчеевское» ООО-нь прявт
Реклама. ООО "Сабанчеевское". ИНН: 1303069116. ERID: 3apb1Qrwwr2uBg1Dua5J4GtoEuuUbagmeVDCD45DtHhgo