Покш Березникень райононь Эрзянь Найман велесэ офицерэнть тиринь кудонь стенанть лангс понгавтсть мемориальной лаз. Вастовомасонть ульнесть военнослужащеенть авазо Мария Васильевна, малавиксэнзэ, велень эрицятне, ве классо тонавтницятне, «Защитники Отечества» фондонь филиалонь важодицятне.
Василий Королев эйкакш пингестэ саезь бажась улемс военноекс. Сон парсте тонавтнесь школасо, конань прядомадо мейле мольсь Ицялонь педагогической колледжев. Седе тов кармась тонавтнеме Санкт-Петербургонь Михайловской военной артиллерийской академиясо. Сонзэ прядызе 2020 иестэ. Гвардиянь старшей лейтенантось Королев васенце читнестэ саезь специальной военной операциясоль, ульнесь огневой взводонь командирэкс. Сон чавовсь боевой задачань топавтомсто 2023 иень маень 27-це чистэ. Отвагань ды героизмань невтеманть кис Василий куломадо мейле казевсь государственной покш наградасо – Мужествань орденсэ. Зярыя шкадо икеле офицерэнть тиринь школасо панжозель Героень партась.
«Василий арась ютксонок, ансяк сондензэ ледстнематне свалшкас кармить монь седейсэ, – кортась авазо Мария Васильевна. – Сон эри ломантнень ледстнематнесэ, кить парсте содылизь. Ней велев сакшныця инжетне кармить содамо, те кудосонть чачсь ды кассь алкуксонь герой».