Февралень 9-це чистэ Покш Березникень районсо ютавтовсь Эрзянь ды мокшонь раськетнень регионъютконь общественной вейсэндявксонь исполкомонь президиумонь промкс, ков истя жо тердезельть Кочкуровань райононь раськень тевтнень коряс важодицятне.
Те делегациясонть исполкомонь президиумс совицятнеде башка ульнесть Мордовия Республикань Прявтонь Администрациянь, региононь министерствань ды ведомствань важодицят. Те промксонтень тердезельть республикасо тиринь кельсэ лисниця газетань, журналтнэнь прявт редактортнэ.
Чинь повесткас совавтозельть ламо кевкстемат, конатнень ютксто васень таркас аравтозельть тиринь келень ды литературань тонавтомась, койтнень-кардатнень ванстомась, демографиянь стакачитнень витемась ды истя седе тов.
Саранскоень инжетне васняяк састь Покш Березникень Шугуровань средней школав, косо неень шкасто тонавтнить кото велестэ 34 эйкакшт, сынст ютксто 22 – эрзят ды 12 рузт. Тонавтыцятнеде кеветее ломанть.
Неть цифратнень тенек ёвтынзе школань прявтось Иван Ларькин. Иван Фёдорович нурькинестэ пачтясь школанть историядонзо, конась саи ушодкс 1845 иестэ. Те зданиянтень, конась стявтозель эштё советэнь шкатнестэ, ведьгемень иеть. Тешкстама, сон парсте ванстовсь ды тонавтыцятнень ёндо тесэ тееви весемесь, мезе вийсэст, сеть аламо эйкакштнень содамочист ламолгавтомга, эрьва кодамо пелькстамосо ёрокчист невтемга.
Инжетнень вастомсто ёжомарямост кепедизь Шугурова велень «Эрзяночка» народной фольклорной ансамбляс совицятне, конань прявтсо Юрий Семёнов.
Седе тов минек тердимизь школань музеев, ков пурназь кезэрень эрьва кодат ламо экспонатт. Ледстневи, умонь сизьгеменце иетнестэ сонензэ путсь ушодкс Шугуровань средней школань историянь предметэнь тонавтыцясь Валентина Михайловна Арапова. Мельвановикс тонавтыцянок, ловт, весе эрямонзо алтызе вечкевикс тевенть топавтомантень. Васня сон историянь кабинетсэ тейсь кезэрень ули-паронь пурнамо таркине, конась аламонь-аламонь пештевсь ды сась тензэ музеень теемадо арсема. Шугурова велень эрицятне мезе ансяк эзть кандо те музеенть сюпалгавтомга. Течи тей эрьва сыцясь чопавти кезэрень ды советской шкантень, бути эряви, Валентина Михайловна ютавты экскурсияяк.
Тешкстасынек, те школасонть тонавтыцятнень вийсэ теезь аволь вейке истямо тарка, конань вельде тесэнь эйкакштне теевить содавиксэкс сеть ломантнень марто, кить ульнесть те школанть прявтсо ютазь пингестэ. Теде ёвтни народной образованиянь музеесь, косо келейстэ невтневить те школань малав весе тонавтыцятне.
Аволь ансяк историянть домкасто тонавтнить те школасонть, истя жо покш мель явить тиринь келенть ды литературанть тонавтомантень. Неть предметтнэнь ветить Нина Кузьминична Манина ды Анна Ильинична Ромашкина. Сынст тонавтницяст изнякшныть райононь, республикань ды весероссиянь пелькстамотнесэ. Невтемакс, те школань тонавтницятне невтизь содамочист «Живая культура: традиции и современность» весероссиянь научно-исследовательской тонавтыцянь конференциясо, «Родной язык в моей семье» республикань конкурссонть-презентациясонть, Мордовия Республикань тонавтницятнень «Шаг в будущее» научно-образовательной форумонь «Родное слово» секциясонть, «Край родной, на век любимый» республикань тонавтницятнень ютксо пелькстамосонть, «Знаменитые люди Мордовии» номинациясонть ды ламо лиятнесэ.
Нина Кузьминична Манинань тонавтницянзо лиссть изницякс «Одарённые дети – 2019» раськеютконь форумонь кочкамонь турсо «Театральная» номинациясонть «Ков пурнат-сэрнят» кезэрень сценканть невтеманзо кис. Эйкакштне истя жо вейсэ тонавтыцяст марто анокстасть Кузьма Абрамовонь шкинемантень алтазь «Абрамовонь ловноматненень», конат ютавтозельть республикасонть, налксизь Кузьма Абрамовонь «Эрьванть эсензэ ормазо» пьесасто саевксэнть.
Шугуровань средней школань тонавтыцятнень ледстнемаст коряс, колоньгеменце иетнестэ «Вайгельне» драмкружоконтень аволь ансяк те велень эрицятне пурнавкшность, истя жо тов сакшность шабрастояк. Паро, неть койтне-кирдатне велявтсть, теньсэ покш путовксозо Нина Кузьминичнань ды тонавтыцянь весе коллективенть. Теевезь коень коряс школасонть сеедьстэ ютавтневить содавикс писательтнень, поэттнэнь, Мордовиянь культурасо важодицятнень марто вастовомат. Эрьва иестэ ютавтови эрзянь келень ков.
Ветешка иеде икеле сон невтизе ёрокчинзэ «Всероссийский мастер-класс учителей родных, включая русский, языков» региононь пелькстамосонть, конась ульнесь Саранскойсэ, теде мейле – Московсо. Кавто иень перть участвовась «Мордовия Республикасо эрзянь ды мокшонь кельтнень коряс сехте паро тонавтыця» пелькстамосонть, косо максозель тензэ призёронь тарка.
Теде башка, Н. К. Манина вети ламо общественной робота. Сон – Эрзянь, мокшонь раськень регионъютконь общественной движениянь первичной организациянь секретарь, ГИА-со эрзянь келень ды литературань коряс тонавтницятнень важодевксэст ванкшномань комиссиянь прявт, этнодиктантонь пурныця-ютавтыця.
Нина Кузьминична сеедьстэ эрси Покш Березникень муниципальной районсо, республикасо ютавтовиця выставкатнесэ, фестивальтнесэ, декоративно-прикладной творчествань выставкатнесэ.
Те вастовомасонть инжетненень невтезель Серафима Люлякинань «Печкин рот» эрзянь кельсэ сценкась. Вана истят эсь тевест вечкиця тонавтыцят важодить те школасонть.
Текенень поладсынек, 2019 иестэ Шугуровань школасо панжовсь «Точка роста» образовательной центрась. Тевс нолдавить истят общеобразовательной программатне, кода: информатика, ОБЖ, технология. Сынст вельде седе домкасто тонавтневить вере ледстязь предметтнэ, ютавтовить исследовательской ды проектэнь коряс важодемат. Меельцекс, Шугуровань тонавтницятне невтсть инжетненень мелень витиця концерт.
Эрзянь ды мокшонь раськетнень регионъютконь общественной вейсэндявксонь Исполкомонь прявтось, МР-нь Правительстванть юрсо НИИ-нь директоронь полавтыцясь, профессорось Юрий Александрович Мишанин те школань тонавтыцятненень ды тонавтницятненень макссь казнекс книгат.
Покш Березниксэ промксонть ушодовомадо икеле эрзянь ды мокшонь раськетнень регионъютконь общественной вейсэндявксонть пельде путсть каштаз ды цецят Славань аллеясо Ине Отечественной войнасо маштовозтненень алтазь кеврунгонтень.
Седе тов исполкомонь заседаниясь поладовсь Покш Березникень Культурань-досугонь центрасо. Тешкстасынек, те мазый зданиясь теезь «Культура» национальной проектэнть вельде.
Культурань-досугонь центранть ванкшномсто инжетне редясть ламо кедьчелькев ломанть, налкшкень теицят, киштеме-морамо тонавтницят, спортсо виест невтицят.
Исполкомонь промксонть панжизе ды ветясь Юрий Александрович Мишанин. Кортамось ульнесь сыця кочкамотнеде, культурасо ды образованиясо тевтнеде, кельтнень домкасто тонавтнемадо, тиринь кельсэ газетатнень ды журналтнэнь лангс сёрмадстоманть виевгавтомадо ды истя седе тов.
Исполкомонь промкссонть эрзянь келень тонавтыцятненень ды культурасо важодицятненень максозельть Сюкпрянь сёрмат ды казнеть. Истя жо эзть кадово апак тешкста сеть, кинь малавиксэст течи топавтыть долгост СВО-нь таркатнесэ ды ламо эйкакшонь триця семиятне.
Меельцекс невтезель концерт, конань анокстызь Покш Березникень райононь артисттнэ. Кода свал, пси цяпамосо вастозель «Парынза» народной фольклорной ансамблясь ды лиятне.
Валентина Юдина