Сёксень васенце читнестэ паксясо нуемань тевтне прядовома лангсот. Августось казсь лембензэ апак жаля. Истямо пертьпельксэнтень васняяк кенярдыть мода лангсо важодицятне: сюрось кенерсь ды урядави шкастонзо. Варматне ды пиземетне эзизь мадсте мода ёжос карксамова касозь колозтнэнь. Чарькодеви, коське шкане товзюронь пурнамось канды ансяк мельспаро, мезеяк а ацирьгавты, тейть эсь теветь састынькине ды ёвтак сюкпря кастозь норовонть кис.
«АПО Элеком» компаниясь – Мордовиянь покш хозяйстватнестэ вейкесь. Тесэнь комбайнёртнэ кортыть, эрявольть ансяк кавто-колмо маней чить ды нуемась ули прядозь. Кадовськак нуемс 200 гектарт яровой товзюро. Озимойтнеде жо озавтозельть 2500 гектарт. Сёксенть ушодовомантень тесэ пурназельть весе кснавось, те 43 гектарт, шужось – 1372 гектарт, эйстэдест пиянь пидема шужось – 400 гектарт.
Паксяванть ардомсто неинек, кода пиже парсеекс ацавсть моданть ёжова лисиця озимойтне. Сындест пеледест ламось уш видезь, те малав 1700 гектарт.
Виктор Паулкин агрономось од, важоди омбоце ие. Прядызе Н. П. Огарёв лемсэ университетэнь Аграрной институтонть. Эри Саранскойсэ, важодеме жо ардтни тиринь ёнксов – Сырезьвелев.
Виктор Вячеславовичень валонзо коряс, тедеде сюрось пек виев, малав 50 центнерт ве гектарсто. Олгось паксятнестэ тапаряви тюкс, сон мейле моли фермав ракшатнень алов ацамокс. Товзюродонть мейле кадови пурнамс ансяк силосокс кукурузанть, те 500 гектарт. Пурнамонзо кармить маласо читнестэ. Весе сюрось ускови элеваторс, тундонь видьметне усковить Трофимовщинань складов. Тосо сортовасызь, анокстасызь сы иень видемантень.
Теде мейле паксятнес кадови ламбамо якстерькаесь, кона свал пурнави меельцекс. Эйстэдензэ видезь 2000 гектарт. Мартонзо паксятнестэ саеви чиньжарамоськак, конадонть тедеде 700 гектарт.
Александр Викторович Ермаков важоди «АПО Элеком» ОАО-со комсьветее иеть. Сон – МТС-нь прявт. Техниканть лангс а пеняци, мекевлангт, шны эйсэнзэ. Валонзо коряс, комбайнатне паксясо важодить парсте, эрзянь цёратненьгак сялдомс а савить, вечксызь эсь тевест, шкат а таргсить, чарькодить, эрьва минутась пек питней. (Ней чарькодеви, мекс мартонок кортнеме валгонесть а мельсэ – салатано питнейдеяк питней шкаст).
Александр Викторович башка тешкстынзе икеле молицятнень. Неть – Дмитрий Сергеевич Ёлкин, Вячеслав Александрович Сазонов, Александр Иванович Макаров. Одтнэяк, сынст лангс ванозь, бажить важодеме а седе беряньстэ: тонавтнить эрьванть пельде улемс паксянь алкуксонь азорокс – бажить моданть вешеманзо содамо ды шкастонзо эрьва тевенть топавтомо. Неень шкасто паксясо важодить вете комбайнат.
Комбайнатнень малава ютамсто, вейкенть удало рединек «МОРДВА» ашо тюссо сёрмадовксонть. Теевинек содавиксэкс азоронзо марто. Те ульнесь Александр Ефремов, 23 иесэ од цёрась, кона тиринь велесэ важоди 2014 иестэ саезь. Абунгадынек, зярдо карминек содамо, комбайнасо ушодсь важодеме (васня лездыцякс) натой 14 иесэ! Ды теде мейле ковгак ве ёнов эзь туе. Мерсь, вечксы эсь тевензэ, чачома моданзо, ды те аволь чаво валт. Цёрась теке тиринь ломанде корты эсь комбайнадонзо, паряк, секскак сась тензэ мель тешкстамс истямо вал эйзэнзэ. Ванодо, келя, кода эрзятне маштыть важодеме сэнь менель ало сырнень паксясо... Школадо мейле од цёрась тонавтнесь Кемлянь аграрной колледжсэ. Ансяк эсензэ алкуксонь тонавтыцякс сон лови вейке сыре комбайнёронть, кона тонавтокшнызеяк важодеме (эрязкалеманть пачк стувтынек кевкстемс лемензэ). Сонзэ эйсэ цёрась а стувтни зярдояк ды кирди мельсэ-превсэ весе кармавтоманзо. Комбайназо Сашань таштыне, ансяк важоди вадрясто. Лиякс а цидярдоволь 12 часонь перть иневенчекс уемс певтеме паксятнева.
Цёрась мерсь, тиринь велензэ зярдояк а полавтсы ош лангс. Нама, стака важодемань вечкиця од ломанть ней вастат чуросто.
Седе сыретнень ютксто кортнинек Андрей Алексеевич Анохин марто. Комбайнасо сон важоди 1984 иестэ саезь. Цёрась ловови эсь тевсэнть васенцетнень ютксо. Чачсь Ромодановасо. Школадо мейле тонавтнесь Ромодановань аграрной профтехучилищасо. Андрей Алексеевич пек ёроков эрьва тевсэ. Нуемадо мейле озы «Кировец» тракторс сокамо, тунда лиси культивировамо, ве валсо, видемадо икеле аноксты моданть. Тельня ушоды техникань витнеме-петнеме. Лиясто важодемс савкшны фермасояк. Неяви, ломанесь пии-палы эсь тевензэ кис. Ламонь а кортниця, сэтьме, пек а вечки прянь шнамо ды ломань икеле прянь невтнеме. Ансяк казямо келей кедьлапанзо ды санов рунгозо кортасть те ломанденть, кода меньгак тевде а пелицядо ды певтеме оймесэ тевень кисэ палыцядо. Сонсь истя корты эсь тевдензэ:
– Бути куватьс арась меньгак тев, а те эрси тельня отпуском шкасто, натой мелем моли важодемань кис, истя пек вечкса эсь техникам ды андыця модам. Эдь минек важодемась ушоды тундонь самсто ды моли ловонь прамс.
Весе комбайнёртнэ пек кенярдыть виев норовонтень, конань казизе те иень кизэсь. Ансяк нусмакалить вейкень кувалма, арасть од ломанть, конат бу савольть паксяв важодеме. Куш тесэ зарплататнеяк ошонь коряс пек покшт.
Кевкстинек Андрей Алексеевичень, кодамо бу максоволь совет од ломантненень, ды сон, сельмесэ кемема марто, мерсь истя:
– Кадык тонадыть тиринь модазост, а тукшныть ковгак паронь вешнеме, тесэяк пек вадря эрямось. Мода лангсо важодезь, кияк а кирди нужачи.
Эх, неть валтнэнь бу пачтямс виев рунгонь кандыцятненень…
МАРИНА АГАФОНОВА