Эрзянь ды мокшонь раськень драмань театрасо ютась кенярксчинь промкс, конась алтавсь «Сятко» ды «Мокша» журналтнэнь 95 иетненень. Сынь кармасть лиснеме се шкастонть, зярдо эштё арасель кемекстазь мордовиянь автономияськак.
Мелесь нолдамс эрзятненень журнал ёвтазель 1928 иень апрелень 5-це чистэ партийной роботниктнень весесоюзонь совещаниясо. «сятконь» васенце номертнэ лиссть Самарасо. Седе мейле, зярдо теевсь Мордовской автономной областесь, журналонть кармасть нолдамо Саранскойсэ.
1941 иестэ «Сятконть» лоткасть нолдамо, сонзэ таркас 1941 иестэ саезь 1956 иес лиснесь «Изнямо» литературно-художественной альманахось. Теде мейле журналось лемдезель «Сурань толт». «Сяткось» васенце лемензэ ало одс кармась лиснеме 1965 иестэ.
Журналонь лопатнесэ лиснесть минек поэттнэнь ды писательтнень васенце покш произведенияст. Тесэ нолдавсть минек литературань ушодыцятнень ёвтнемаст, повестест, романост, стихест ды валморост. Те: Ф. М. Чесноковонь, П. С. Глуховонь, Т. А. Раптановонь, А. Д. Куторкинэнь, К. Г. Абрамовонь, В. М. Коломасовонь, Я. Я. Кулдуркаевень, И.П. Кривошеевень ды ламо-ламо лиятнень. Эрьва кодамо иестэ журналонь редакторокс важодсть содавикс писательтне. Течи «Сятконь» редакторось – Татьяна Васильевна Разгуляева.
«Сяткось» – эрзянь литературань ды культурань невтиця. Сон полады койтнень, конат кемекстазельть икелень иетнестэ. Тесэ лиснить эрзянь, финнэнь-угрань писательтнень прозань ды поэзиянь произведенияст, очеркть, публицистикань, историянь, минек раськень кезэрень шкадо фольклоронь материалт, ули юмор ды сатира, ловныцятнень пельде сёрмат, фотографият, художниктнень артовкст.
Ловныцятне мельспаросо учить вечкевикс рубрикатнень: «Проза. Поэзия», «Драматургия», «Очерк. Публицистика», «Критика», «Литературась ды эрямось», «Фольклор», «Учительтненень лездамга», «Од вайгельть», «Вишка ловныцятненень», «Сэме». Теде башка, журналось ёвтни ловныцятненень Мордовиянь ды сонзэ томбалень содавикс ломантнеде, ютавты мартост интервьют.
Юбилеень кенярксчистэнть лембе валонь ёвтамо сакшнось МР-нь Прявтось Артём Здунов. Сон ваннызе выставканть, косо невтевсь журналтнэнь весе эрямонь пингест.
«Неть изданиятнень историясь кеместэ сюлмавозь Мордовиянь историянть марто. Сюконятано редакциянь коллективтненень, внештатной корреспонденттнэнень, печатень ветерантнэнень ды весенень, кить теить изданиятнень мельстуицякс. Эрзянь ды мокшонь ламо писательтнень творческой кист ушодовсь национальной изданиятнень лопатнесэ. Весе сехте вадрясь, мезе ули эрзянь ды мокшонь литературатнесэ, васенцеде нолдазель неть журналтнэнь лопатнень лангсо. Те аволь ансяк эрзянь ды мокшонь, истя жо Россиянь литературань сырнень фонд», – кортась
МР-нь Прявтось Артём Здунов.
Журналтнэ весе седейстэ теить эсь тевест – ванстыть келенть, раськень ёжонть. Сынь вейсэндить минек ёроков од ломантнень. Весе те лезды кирдемс ялгаксчинь сюлмот Россиянь лия раськетнень марто, регионтнэнь, косо эрить эрзятне. Республикань Прявтось башка валсо тешкстызе: цифровой технологиятнень пингестэнть литературань изданиятненень эряви саемс те тарканть, ёвтнемс седе, кода эрзятне ды мокшотне эрить шабра ёнкстнэсэ.
А. А. Здунов кортамосонзо башка мель явсь национальной кадратнень анокстамонтень: «Мордовиянь государственной университетэнь журналистикань отделениясонть ней арасть раськень подгруппат. Арсян, республикань кавто вузтнэсэ, МГУ-со ды МГПУ-со, эряви совавтомс дисциплинат национальной журналистикань коряс. Эряви арсемс уш ней, кие карми важодеме те ёнкссонть 20–30 иетнень ютазь».
Паронь арсемат истя жо ёвтасть МР-нь Госсобраниянь Председателесь Владимир Чибиркин, МР-нь Правительствань Председателень васенце полавтыцясь Игорь Фрейдин, Эрзянь ды мокшонь раськень регионъютконь общественной вейсэндявксонь прявтось Юрий Мишанин.
Кодамо кенярксчи казневтеме? «МР-нь народной поэт» покш лемсэ казевсь «Мокша» журналонь поэзиянь отделэнь редакторось Раиса Орлова; «МР-нь СМИ-нь заслуженной роботник» лемсэ – «Сятко» журналонь редакторонь полавтыцясь Людмила Ломшина; «МР-нь Заслуженной поэт» – Николай Циликин; МР-нь Прявтонь премиянь лауреат – «Сятко» журналонь редакторось Татьяна Разгуляева; МР-нь Прявтонь Благодарностьсэ – «Сятконь» ответственной секретаресь Мария Левщанова, отделэнь редакторось Алина Подгорнова ды лиятне. Журналтнэнь весе важодицятне тешкстазельть.
Мария Левщанова (Еремина) «Сятков» важодеме сась 2006 иестэ, Н. П. Огарёв лемсэ МГУ-нь филологиянь факультетэнь журналистикань отделениянть прядомадо мейле. Теде икеле колмоце курссто саезь студентэнь практиказо ютнесь журналонь редакциясо. Стихень сёрмадомо сон ушодсь школасо тонавтнемстэ саезь. Теде мейле од тейтеренть свал тердтнесть од сёрмадыцянь семинартнэс.
– Сёрмадомасо ёрокчинь кастомантень, чарькодеви, пек лездасть од сёрмадыцянь семинартнэ. Сындест мейле, зярдо тон вастовилить эсеть кондят ушодыцятнень ды содавикс покш тонавтыцятнень марто, сёлмот седеяк виевгадыльть, ды бажить седеяк ламо сёрмадомо. «Сятконь» или «Чилисемань» лопатнень лангсо стихеть лисемась кандыль аёвтавикс кеняркс.
Редакцияв сазь, карминь варчнеме виень вишкинетнень туртов стихень сёрмадомасо ды лия кельстэ ютавтомасо. Неень шкасто ютавтома тевесь саи покш тарка монь шкинемасо. Ютавтнинь рузонь, мокшонь, подстрочник вельде маринь, удмуртонь, коминь, венгрань кельтнестэ стихть ды ёвтнемат. Кода содатано, эрьва раськенть эрямонть лангс эсензэ вановтозо. Секскак лия кельстэ ютавтовкстнэ лездыть ловныцянтень седе домкасто чарькодемс эрямонть, ванномс сонзэ лия ёндо, онкстамс лия онкссо. Редакциясо важодемась кандсь тень ламо астувтовикс вастовомат – кода тесэнь икелень важодицятнень, истя минек литературасонть пек содавикс ломантнень марто. Неть – Александр Арапов, Иван Калинкин, Александр Доронин, Леонид Седойкин, Николай Ишуткин, Андрей Брыжинский, Михаил Брыжинский, Павел Любаев, Числав Журавлёв, Василий Дёмин, Пётр Ключагин ды лият. Ламотнень лемест содылинь эштё школасо тонавтнемстэ, ды сынст марто содавиксэкс теевеманть лован покш чанстекс эсень туртов.
Сынь эсест пельде миненек, одтнэнень, ледстнильть редакциянть ды Писателень союзонть перька сюлмавозь икелень тевтнеде, лиясто мик пейдевтицят, тень эйстэ седеяк лембеть: кода Артур Моро Московсто самсто токиль редакцияв, кода И.Ведяшкин пачколиль эсензэ тонавтницянзо-ципакинензэ марто од сёрмадыцянь семинаров, П. Любаев вечкиль ёвтнеме, кода журналсо лисезь васенце стихензэ кецнезь ловнось мик скалонтень ды реветненень… Эрьвась неть ломантнестэ – минек литературанть сюпавчизэ, сонзэ менельпаксясо валдо ды зярдояк а лепамиця теште. Ды мон, кода «Сятконь» важодиця, аштян мельспаросо, мекс истят тештетнень кирвазтемасо покш путовксозо минек журналонть, – корты Мария Левщанова.
«Сятко» журналонть ули «ВКонтакте» соцсетьсэ группазо, конань сынь ветить зярыя иеть. Сонзэ пек вечксызь тесэнь ды васоло эриця эрзянь ломантне. Журналонть сёрмадстыть Пензань, Самарань, Московонь ёнкстнэсэ, сонзэ ловныть Санкт-Петербургсо, Мурманскойсэ ды лия ёнкстнэсэ.
Журналось полавтневи эрямонть марто. Ансяк прявт тевезэ 95 иетнень перть каднови секесь – сонзэ виезэ ды сехте покш сюпавчизэ – сёрмадыцянзо ды ловныцянзо. Теде башка, кемень иеть «Сятконть» юрсо важоди «ВАЛ» эрзянь од сёрмадыцятнень вейсэндявксось. Те – минек вандынь чинек, поладыцянок ды кемеманок.
Татьяна Маторкина