Республикань велень хозяйствань предприятиятнесэ моли теле лангс пиже коромонь анокстамось. Аволь умок минь ульнинек Кочкуровань муниципальной районсо, содавтынек «Норов» Аграрно-производственной фирманть ды вастовинек Мордовиянь икеле молиця велень хозяйствасонть важодицятнень марто.
Кода тенек пачтясь «Норов» Агрокомпаниянь группатнень прявтось, МР-нь Госсобраниянь депутатось Александр Ильич Поздняков, эрьва тевенть топавтома шкастонзо. Видеманть прядовомадо мейле тосо поладови велень хозяйствань культуратнень мельга якамось ды теле лангс коромонь анокстамось. Теке шкасто течи «Норов» Агрофирмасо покш мель явови Семилейсэ сюронь ванстомань ды тевс нолдамонь комплексэнть ды Красномайской отделениянь территориясо комбикоромонь заводонть теемантень. Ледстясынек, заводсонть кармить нолдамо гранулированной кором тувотнень ды куркатнень андомс. Тосо часозонзо карми нолдавомо 10 тоннат кором, те объектэнть питнезэ 250 миллионт целковойть.
Паро, республикасонок улить истят хозяйстват, косо аволь ансяк видить-кастыть, истя жо арсить седе, кода неень шкань вешематнень мельс саезь тевс нолдамс ды паролгавтомс коромонть. Эдь ансяк сестэ ламолгавтови ды тееви паро качествань сывелесь, ловсось ды эйстэнзэ нолдавиця продукциясь. «Норов» Агрофирмасонть ютазь иестэ теезь продукция 630 млн целковоень питнес.
Снимкасонть: «Агрофирма «Норов» ООО-нь производствань коряс генеральной директоронь полавтыцясь Максим Веряскин ды предприятиянть механизаторось Владимир Сонин.