Апрелень 16-це чистэ Россиянь ламо ёнкстнэсэ тешкставсь Эрзянь ды мокшонь кельтнень чись. Тиринь келень чись алтави эрзянь содавикс лингвистэнть, педагогонть, общественной деятеленть А. П. Рябовонь ледстнемга. Сонзэ тешкстамо минек республикасо кармасть 1993 иестэ саезь. Россиясо, паряк, арась вейкеяк регион, косо бу авольть эря ломанть, конатнень туртов эрзянь ды мокшонь кельтне – тиринь. Кенярксчинь вастовома ютась Эрзянь ды мокшонь национальной драмтеатрасо.
Тей сакшнось МР-нь Прявтось Артём Здунов. Сон ёвтась лембе валт эрзятненень ды мокшотненень – сетненень, кить ванстыть тиринь келенть ды культуранть. Кавксть кортамонзо полализе эрзянь кельсэ:
– Куш кодамо кельсэнть ули раськень ёжо, эсь прянь чарькодема, сонзэ изнявкстнэ, превейчись ды покштятнень-бабатнень оймень питнейчитне. Тиринь келентень вечкемастонть ушодови минек эйкакштнень ды од ломантнень тиринь масторонть вечкеме тонавтомась. Минек республикантень эряви ламо важодемс эрзянь ды мокшонь культуранть, кельтнень, койтнень-кирдатнень ванстомаст коряс. Тесэ тееви весемесь, штобу ломанесь эйкакшпингстэ саезь улевель совавтозь тиринь культурантень, явови весеме ёндонь лезкс сетненень, кить ванстыть-виевгавтыть раськень койтнень-кирдатнень, творческой коллективтнень, фольклоронть, раськень промыслатнень ды ремеслатнень.
Ламосо тенень лезды раськень культурань ды кельтнень ванстомань ды сюпалгавтомань коряс региононь программась, конась кемекстазь 2021 иестэ Артём Здуновонь мелензэ коряс. Тедеде республикась карми общественно-политической ды этнокультурной Весероссиянь ды Раськеютконь покш читнень ютавтомань таркакс. Те – «Минь вейсэ» раськень культурань од ломанень фестивалесь ды «Молодежь в этнокультурном пространстве» финнэнь-угрань раськетнень форумось.
Тешкстазель, тиринь кельтнень ванстомасо покш тарка саи школась. Самай тесэ кемекстави тонавтомань лувось, конась содавты эйкакштнень эрзянь ды мокшонь раськетнень культуранть марто, лезды тонавтнемс тиринь кельтнень. Тедеде тешкставить культурань деятельтнень юбилейной чачома чист, конат тейсть редявикс путовкс тиринь кельтнень ванстомантень: 100 иеть чачома чистэст саезь эрзянь поэтэнть-прозаикенть Иван Пиняевень, мокшонь поэтэнть-прозаикенть Александр Малькинэнь, 125 иеть эрзянь поэтэнть ды педагогонть Илья Кривошеевень чачома чистэнзэ саезь. Весе те тешкстави тонавтомань программатнесэ.
Башка мель явозель раськень вейсэндявкстнэнь важодемантень, конат эсь тевсэст нежедить весероссиянь повестканть лангс – явомс лезкс спецоперациянь участниктненень, ладямс вейсэнь важодема покш организациятнень проекттнэнь коряс.
– Минек масторонть туртов раськетнень кевкстематне, апак покшкавтне, кандыть покш смусть. Течи покштятнень-бабатнень ундокстнэнень ды койтненень-кирдатненень велявтомась, раськетнень ютксо чарькодьксчись кандыть башка смусть нациянть ды государстванть вейсэндявомань кемекстамонть туртов. Секскак миненек эряви тонавтнемс вейке-вейкень пельде, ванстомс мелень явоманть ды культуратнень ютксо диалогонть, сюпалгавтомс минек келенть ды культуранть. Кадык эрзянь ды мокшонь раськетне эрить пингеде-пингес, каштанчи марто кортыть тиринь кельтнесэ, – тешкстась Артём Здунов.
Мордовиянь Госсобраниянь Председателесь Владимир Чибиркин ёвтась сюкпря писательтненень ды журналисттнэнень, конат сёрмадыть тиринь кельтнесэ. Сон тешкстызе, те кенярксчись вейсэнди весень, кинь уцяскаст сюлмавозь эрзянь ды мокшонь раськетнень марто, кинь ундоксост аштить эрзянь-мокшонь моданть лангсо.
– Тиринь келенть содамось – те сюпавчи! Эрзянь ды мокшонь раськесь тейсь покш путовкс Россиянь ды Мордовиянь социально-экономической виевгавтомасонть, алкукс ашти минек Отечестванть кисэ, – мерсь Владимир Чибиркин.
Вал сайнесь РФ-нь Федеральной Собраниянь Федерациянь Советэнь сенаторось, РФ-нь Финнэнь-угрань раськетнень ассоциациянь прявтось Пётр Тултаев:
– Минек масторсо кавтосядто ламо кельть. Сынст ютксо пингетнень перть эрить эрзянь ды мокшонь кельтне, минек раськетне. Сынь эзть човоряво, эзизь ёмавто эсест пряст ды течи аштить минек масторонь кельтнень сюпавчинь редявикс невтемакс. Келенть эряви вечкемс, содамс ды кортамс эйсэнзэ, бажамс тонавтнемс сонзэ.
П. Н. Тултаев тешкстызе, региононь прявтонть бажамонзо вельде ветяви покш важодема тиринь кельтнень ванстоманть коряс, истя жо интернетсэ невтемаст коряс.
Кенярксчисэнть явшевсть покш казнеть – тешкстазь культурань ламо деятельтне, республикань тонавтыцятне. РФ-нь Президентэнть пельде общественной тевтнень ды эрзянь-мокшонь культуранть, кельтнень, койтнень-кирдатнень сюпалгавтоманть кисэ Благодарность максозь Эрзянь-мокшонь раськень регионъютконь общественной вейсэндявксонь прявтонтень Юрий Мишаниннэнь. Сон тешкстызе, Мордовиясо ламо тееви кельтнень сюпалгавтоманть коряс, кемекстазь «Национальное достояние Республики Мордовия» премиясь. Юрий Мишанин ёвтась сюкпря республикань тонавтыцятненень эйкакштнень марто важодеманть кисэ, истя жо Мордовиянь Прявтонтень масторонь ламот ёнкстнэсэ эрзянь ды мокшонь раськень ломантнень марто сюлмотнень ладямонть кисэ.
МР-нь Прявтонть пельде Благодарностьсэ казевсть Н. П. Огарёв лемсэ МГУ-нь доцентэсь Е. Ф. Клементьева, Н. П. Огарёв лемсэ МГУ-нь эрзянь ды мокшонь кельтнень кафедрань прявтось М. З. Лёвина, М. Е. Евсевьев лемсэ МГПУ-нь доцентэсь С. В. Богдашкина, М. Е. Евсевьев лемсэ МГПУ-нь доцентэсь Г. А. Натуральнова, Г. И. Сураев-Королёв лемсэ «Келу» фольклорной ансамблянь хоронь артисткась И. А. Рузанкина, Эрзянь ды мокшонь национальной драмтеатрань литературань пельксэнь ветицясь О. В. Белкина.
Анокстызе
Татьяна Маторкина
* * *
Тиринь кельтнень чинтень алтазельть эштё зярыя мероприятият. Апрелень 11-це чистэ Саранскоень Культурань кудосо ютась литературно-художественной чокшне, козонь сакшность раськень СМИ-тнень прявт редактортнэ, школасо тонавтницятне, сёрмадыцятне, морыцятне. Культурань кудонть фойесэ панжозель декоративно-прикладной творчествань выставка. Вастовоманть шкасто весе бажасть кортамс ансяк эрзякс ды мокшокс. Лембе валт кенярксчинть кувалма ёвтасть МР-нь Культурань, раськень политикань ды архивень тевень министрань васенце полавтыцясь Александр Карьгин, Саранск ошонь Социальной политикань департаментэнь Культурань управлениянь прявтонь полавтыцясь Олег Девин, Эрзянь ды мокшонь раськень регионъютконь общественной вейсэндявксонь прявтось Юрий Мишанин. Кортамотне секе-тев полалевсть морамосо.
* * *
Апрелень 12-це чистэ А. С. Пушкин лемсэ Национальной библиотекасо ютась «Эрзянь ды мокшонь кельтне культурань вейсэнь кортамотнесэ» кругловой столесь, косо толковазельть зярыя кевкстемат. Васняяк, кода республикань школатнесэ ды эйдень кужотнесэ моли эрзянь ды мокшонь кельтнень тонавтомась. Кода кельтне эрить-аштить ды тонавтовить университеттнэсэ ды лия регионтнэсэ, кодамо сынст таликаст культурань ды СМИ-тнень ёнкстнэсэ. Кодамо лувсо важодить НКО-тне эрзянь ды мокшонь кельтнень ванстомга ды виевгавтомга.
Вастовомантень сакшность МР-нь Культурань, раськень политикань ды архивень тевень министрань васенце полавтыцясь Александр Карьгин, Н. П. Огарёв лемсэ МГУ-нь филологиянь факультетэнь деканось Иван Рябов. Кортыцятнень ютксо ульнесть М. Е. Евсевьев лемсэ МГПУ-нь раськень келень ды литературань кафедрань прявтось Ольга Налдеева, Н. П. Огарёв лемсэ МГУ-нь эрзянь ды мокшонь кельтнень кафедрань прявтось Мария Лёвина, «Педагог 13.ру» куншкакуронь этнокультурань тонавтомань лабораториянь методистэсь Елена Наумова, Атемарень средней школань мокшонь келень тонавтыцясь Анна Богатырева, Саранск ошонь 35 № школань эрзянь келень тонавтыцясь Елена Князькина, Эрзянь-мокшонь подворьянь-музеень прявтось Светлана Подгорнова, Саранск ошонь 5 № эйдень кужонь воспитателесь Марина Федорова, «Чилисема» журналонь прявт редакторось Елена Барцаева, Россиянь Писателень союзонь членэсь Раиса Орлова ды Пушкинской библиотекань сотрудникесь Валентина Бояркина.