Покш Березникень муниципальной райононь васоло велетнестэ вейкесь Алу велесь (рузкс тензэ мерить Чёрная Промза). Кезэрень документтнэсэ пачтяви: ушодкс те эрямо таркась саи умонь 1624 иестэ. Архивсэ ванстовиця конёвтнень коряс, XVII пингестэ сон совакшнось Алатырень уездэнтень, шкань ютазь – Симбирской губерниянь Орданьбуень уездэнтень. Те шканть перть ламо полавтомат ульнесть, конат ладясть масторсонок уликс событиятненень, эрямо лувонтень.
Эрьва веленть эсензэ историязо, эсензэ чачозо. Кезэрень шкасто лиятнеде явовсть сеть, косо ломантне алкукс маштсть виевстэ важодеме, кардазсо ламо ракшань трямо, кудо икельксэст ваньксстэ кирдеме, садпиресэст ламо эмежень кастомо. Неть обуцянь ёнкстнэ пек ладить Алу велень эрицятненень. Тосо, колхозсо важодемадо башка, мекштькак кирдсть, вирьстэ пичеойгак пурнасть.
Васов аволь эрьва велесэ ломантне неть а шожда тевтнень топавтсть. Алу велесэ жо эрьва кодамо важодемас (кода икелеяк, истя нейгак) ламот бажить. Неть читнестэ сындест, те велень ломантнень эрямонь койдест ды неень шкань тевдест кортнинек Парынзэле велень поселениянь прявтонь полавтыцянть (Алу велесь сови тов) Татьяна Михайловна Адушкина марто.
Тешкстасынек, велесэ тевтнеде свал пек ламо. Кодамо энялдома, кевкстема марто ансяк а сыть сонензэ.
Татьяна Михайловнань тевензэ певтеме. Невтемакс, кизна китнень чирева зыянов тикшенть леднема, тельня китнень-янтнэнь ловдо ванськавтомат, кинень справка сёрмадома, лия кодамояк документ анокстама. Виде, улить эштё ламо истят кевкстемат, конатнень ванкшномсто-топавтомсто Парынзэле велень поселенияв эли Покш Березникень муниципальной райадминистрацияв кучовить пшкадицятне те эли тона тевенть решамга.
Видьстэ меремс, велень поселениянь прявттнэнь ды сынст полавтыцятнень тевест пек ламо, а вана праваст ды ярмакост овсе аламошка.
Неень шкане пштистэ аштить азортомо кудотнень, модатнень ды пайтнень кемекстамодо кевкстематне. Татьяна Михайловна те покш важодеманть топавтызе шкастонзо. Теде башка, кемекстынзе икелень колхозонь гаражтнень ды зданиятнень.
Татьяна Михайловнанень васенце энялдоманок ульнесь истямо: нурькинестэ ёвтнемс эседензэ.
– Монь чачома ёнксось – Дубёнкань буень Поводелесь, тосо, ламо эйкакшонь триця семиясо ютась эйкакшпингем. Тетянень-аванень, Михаил Иванович ды Устиния Максимовна Куняевтненень, аволь шожда эрямонь ки савсь ютамс. Эйкакштнеде ульнинек ветененек. Сизьгеменце иетнестэ, зярдо кулось тетям, сехте вишкинентень вейксэ ковт ансяк ульнесть, монень жо колмо иеть топодекшнесть. Кода стакаль сеть шкатнестэ аванень, арсян, башка толковамс а эряви. Весементь цидярдызе, кастымизь-кепедимизь. Кода кортыть эрзятне, пильге лангс стявтымизь. Школанть прядомадо мейле туинь тонавтнеме Саранскоев, ульнинь студентэкс Н. П. Огарёв лемсэ Мордовской государственной университетэнь велень хозяйствань факультетсэ. Эрямонь тевекс кочкия «зоотехния» специальностенть. Студентэкс улемстэ лисинь мирденень. Михаил Петрович эрий ялгам Парынзэлестэ. Сон истя жо прядызе те вузонть «агрономия» специальностенть коряс.
Вузонть прядомадо мейле кучимизь важодеме Покш Березникень «Чернопромзинский» колхозов, косо сисем иеть топавтынь зоотехникень тевенть. Теке шкасто заочна тонавтнинь Н. П. Огарёв лемсэ МГУ-нь биофаксо. Неть содамочитне пек тень маштовсть, зярдо карминь важодеме школасо, те велень эйкакштнень туртов ветинь биологиянь ды химиянь уроктнень.
Велесэнек школанть пекстамодо мейле аравтымизь Алу велень поселениянь прявтокс. Зярдо минек ёнкссо кармасть тевтнень одс ладямо (реформирование сельских поселений), кармавтымизь Парынзэле велень поселениянь прявтонь тевень полавтыцякс. Текень пингстэ сави топавтомс сеть тевтнень, конат течи талновтыть Алу велень эрицятнень.
– Татьяна Михайловна, кода велесэнк топавтовить социальной кевкстематне, кинень ломантне пшкалить медицинской лезкс мельга, ули-арась фельдшерско-акушерской пунктонк?
– Алкукскак, неень шкане те тевесь пек эрявикс, эдь велетнесэ эрицятнень ютксто седе ламотне сыре ломанть. Икелень школань зданиясонть, администрациядонть башка, аштить библиотекась ды медпунктось. Галина Паракшина фельдшерэсь эри Парынзэлесэ, эрьва чистэ сакшны минек велев важодеме. Галина Вячеславовна парсте содасынзе аволь ансяк сынсест эрицятнень, истя жо ормасткак. Ламотнень сон тердтни медпунктов, пек сыретненень ды стакасто сэредицятненень якси кудов.
Лиясто гайневтить тензэ телефононь вельде, кевкстнить, мезе теемс? Васняяк сон оймавтсы ормалгадозенть, ёвты, кода эряви ветямс прянть, сонсь жо куроксто сырги содавтомонзо, эрявикс лецямопелень кандомо, врачтнень кармавтоматнень топавтомо.
Велень библиотеканть прявтсо Валентина Александровна Тюрькина. А мезть сёпомс, тундосто сёксес велень эрицятнень арась шкаст книгань ловномс, садпиресэ, кудоютксо тевтнеде певтеметь. А вана телень кувака чокшнетнестэ аволь ансяк книгат ловныть, вейсэ библиотекаренть марто эрьва кодат мероприятият анокстыть.
– Инескеть, ёвтнеде улить-арасть важодема таркат велесэ эрицятненень, ламо-аволь эсь кардазсост ракшань кирдицятнеде?
– Виде, велесэнек свал эрицятнень ютксо од ломантнеде пек аламо. Сеть, кинь эштё виест сатыть важодемс, эрьва чистэ ардтнить Покш Березникев, Чаунзань нармунень фабрикав, Дубёнкань кирзаводов. Тейтерь-аватнестэ ламотне важодить соцроботникекс, якить ськамост эрицятнень ды стакасто сэредицятнень мельга.
Умонь шкасто саезь минек велень эрицятне свал кирдсть ламо ракшат. Виде, икеле малав эрьвань кудосо ульнесть скалт, вазт, тувот, нармунть, куш сынст андомс ульнесь аволь шожда. Тикшень анокстамось пек стакаль, аволь эрьва велесэнть сатокшность ледема таркатне, ней жо анокстак, зяро мелеть! Неень шкане минек велесэ скалтнэде аволь ламо, тень таркас ламот кирдить вазт, тувот ды лия ракшат. Истятнэнь ютксо Г. А. Тарчуткин, В.В. Макушкин, Б. Д. Вдовин ды лиятне. Вана И.А. Слушкин аволь ансяк ракша мельга яки, истя жо нешкепирезэяк ули. Мекшензэ улить Красная Поляна посёлкасонть (сон истя жо сови минек территориянтень) Д.И. Вантяйкинэнь. Тешкстаса, Дмитрий Ивановичень эрямо тарказо Саранскойсэ, сон жо свал эри те посёлкасонть ды топавты вечкевикс тевензэ.
Ледстяса, скалт кирдить М.С. Астайкина, мирдть-нить Николай Геннадьевич ды Галина Николаевна Пичайкинтнэ. Сынст истя жо улить вазост ды тувост.
– Татьяна Михайловна, Алу велесэ икеле ульнесть ламо фермерт, кить сайсть эсест лангс неень шкане пек эрявикс тевтнень. Пачтядо сынст ланга, кить неть важодеме вечкиця ломантне, поладыть-арась те тевенть?
– Кода республикасонок ушодовсь фермерэнь движениясь, минек велесэ сеске кото ломанть кундасть те а шожда тевентень. Сынст ютксо ульнесть В. В. Макушкинэнь ды В. И. Панишевень семиятне. Васень шкастонть сынь виднесть сюро ды тикшеть.
Ней Вячеслав Викторович Макушкинэнь ули пилорамазо, сонензэ эрицятне сакшныть пиломатериал мельга. Тешкстаса, Вячеслав Викторович – чевте седей ломань, кие тензэ пшкади лезкс мельга, ков виензэ сатыть, свал лезды. Невтемакс, чувтонь пелькстнэнь ды пилявкстнэнь максы эрицятненень питневтеме.
2015 иестэ Алу велев, мельспарозонок, сась фермер, те – Сергей Александрович Сайгушев. Сонзэ ундоксонзо те таркань, покштянзо-бабанзо, тетязо-авазо те велень. Ней малавиксэнзэ эрить Лямбирень райононь Атемарь велесэ. Сергей Александрович васня велень поселениянь администрациянть кедьстэ рамась 500 гектарт мода. Теде башка, Алу велень эрицятне миизь тензэ модань паест.
Тешкстаса, куш модась овсе минек веленть маласо, ялатеке ламо вийть эрявсь путомс сонзэ видемс-сокамс анокстамга. Эдь паксясь велявтокшнось вирекс, эрявсь таргамс чувтотнень-куракштнень, конатнень сон стякодо максынзе минек велень эрицятненень ды весенень, кинень эрявсть. Паксятнень парсте ванськавтомадост мейле озавтсь неть таркатнес сюро ды вика марто шуж, ламо иень тикше коромокс.
Сергей Александрович раминзе икелень хозяйствань гаражтнень, ушодсь ракшань трямо, ягодань кастомо. Озавтсь ламо инзейть, мелят кизэнь перть эйсэст валнось ды сайсь сюпав урожай.
– Татьяна Михайловна, велень икелень эрицятнень ютксто кить эштё лездыть тиринь таркатнень ванстомань, ломантнень эрямост шождалгавтомань тевсэнть?
– Тешкстаса, минек велесэ арась лавканок, ансяк те а корты седе, што ломантненень а косто рамамс ярсамопельть ды лия эрявикс товарт. Минек эйсэ вановттомо а кадыть башка предпринимательтне. Истя, Дубёнкань буестэ свал тенек сакшныть Мария Ивановна Телегина (ИП «Телегина»), Александр Николаевич Асанов (ИП «Асанов»). Сынь аволь ансяк веле куншкасо аштить ды учнить, зярдо тенст сыть рамицятне. Истя жо сыре ломантненень видьстэ кудо икелев пачтить весе товартнэнь, бути эряви, кудовгак совавтсызь. Ломантне кедьстэст рамить аволь ансяк кши, сал, сахар ды ямкст, истя жо весементь, мезе тенст эряви.
Текенень поладса, миненек лезкс максы те ёнкссо чачозесь-касозесь, республикасонок содавикс предпринимателесь, Ицялонь райононь «Сельхозтехника» ООО-нь гендиректорось Фёдор Борисович Корнаухов.
Эрьва иестэ минек велень эрицятненень кази тиринь «Эрзянь правда» газетанть лангс сёрмадстома минек земляконок – «ВодСтройпроект» ООО-нь директорось Пётр Михайлович Ведяйкин.
Кемтяно, лиятнеяк, сынст лангс ванозь, а кармить стувтомо чачома ёнксост, кармить содавтомо ды лездамо тиринь велень эрицятненень.
– Сюкпря.
Валентина Юдина