Аволь умок Покш Березникень райононь Симкина велесэ ульнесь мелень витемань покш кенярксчи: Роштовань (Христорождественской) храмонь колокольнянть светямось, эйзэнзэ баягатнень кепедемась.
Тешкстасынек, ниле иеде икеле эрзянь кезэрень те велесэнть Орданьбуень ды Отяжелень епархиянь епископонть Вениамин Владыканть (РЕД. ней - Кронштадтонь епископось, Санкт-Петербургонь епархиянь викариесь, Свято-Троицкой Александро-Невской Лаврань наместникесь) баславамонзо коряс панжозель велень мазылгавтыця, оймень ванськавтыця Пазонь кудо. Эштё сестэ Симкина велень эрицятне мерекшнесть, ней тенек карми эрявомо колокольня. Ней апак сёпо мертяно, сынсь ансяк содасызь те храмонь настоятеленть Каллиник игуменэнть марто, зяро мелявкст ды стакачить ульнесть те уцяскав чинть малавгавтомга.
Ледстневи, кодамо мельспаросо тенек пачтясть те велень эрицятне, зярдо теизь фундаментэнть сы шкань колокольнянть алов, шкань ютазь кармасть чапомо сруб, церькованть ваксс тейсть кудыне. Аволь аламо шка эрявсь баягань рамамс ярмаконь пурнамонтень, эрьва целковоень максыцянть кисэ озномантень… Пазонть лезксэнзэ вельде весе тень цидярдызь.
Кодашка мельспаро ульнесь, зярдо сыргасть баягатнень (святынятнень) мельга Воронеж ошонь Анисимов лемсэ баягань валыця заводов, косо тейсть тенст эрьва кодамо покшолмань кото баягат, сехте покшонть сталмозо 150 килограммат. Симкинав пачтямодост мейле сынь васня нурька шкас ванстовсть церьковасо.
Талновтыця шка. Вейсэнь озномадо мейле пурнавозтненень пастырень вал марто пшкадекшнесь Кронштадтонь епископось Вениамин Владыкась. Седейшкавань валонь ёвтамсто сон те тевенть лемдизе Симкина велень храмонть туртов кувать ледстневиця чикс.
«Храмось – те пек мазый тарка, – мерсь Владыкась тов сыцятненень пшкадемстэ. – Видьстэ меремс, эзинь арсеяк, истя курок топавтови те паро тевесь. Пазось лездась. Баягань гайгемась – те Пазонть марто ойметнень вейсэндямо, сонзэ тердеманзо вельде карматадо сакшномо храмов». Вениамин Владыкась ёвтась сюкпрянь валт весенень, кить лездасть топавтомс те паро тевенть.
Тешкстасынек, те кенярксчинтень Симкина велень куншкакурос пурнавкшность районсонть служиця священнослужительть, храмов якицят, строительть, кить лездасть те паро тевенть топавтомсто. Истя жо тей сакшность сеть, кить умок уш а эрить тиринь велесэнть, ялатеке истят покш читнестэ седеесь сынст терди чачома таркав. Ков виест сатыть, лездыть эсь ёнксонь эрицятненень.
Баягатнень кепедемадост икеле Вениамин Владыкась васенцекс макссь баягань гайть, конась марявсь кезэрень веледенть васов. Малав сядо иеть, икелень церькованть пекстамодо мейле, сон эзь марсеве Симкинасо. Теде мейле сон весень тердинзе истя жо вачкодемс ды кунсоломс сонзэ гайгеманть. Вейке-омбоце мельга те таркантень ютасть сыренек-однэк. Кие сэтьместэ, кие седе виевстэ макссь гайгеманть. Тень лангс апак вано, сехте эрявиксэсь – эрьванть седейс кирвазевель Пазонтень алкуксонь кемемась, паро тевень топавтомо бажамось, вейке-вейкенень лездамось. Лиякс те весе стяко!
Валентина ЮДИНА