Июлень 22-це чистэ Отяжелень районось тешкстызе теевема чистэнть саезь 95 иетнень топодеманть. Мордовиянь Прявтонть Артём Здуновонь ды региононь Правительстванть пельде райононь эрицятненень ды инжетненень поздоровт ёвтась премьер-министрась Дмитрий Поздняков.
«Шумбрачи, вечкевикс ялгат! Артём Алексеевич Здунов мерсь, Отяжбуень модась сонзэ туртов тиринь, ды энялдсь пачтямс: «Вечкевикс ялгат! Уледе шумбрат ды кадык Пазось тынк мельга ваны!» Отяжбуесь – те кезэрень мода, конась теезь Московонь государстванть ванстоманзо туртов. Ине Отечественной войнанть шкасто Тиринь масторонть ванстомо стякшность минек покштятне. Отяжбуень моданть лангсо чачсь Советской Союзонь кевейкее Герой. Течи сынст нуцькаст ды правнукост поладыть эсь Отечествань ванстоманть ды кандыть Геройтнень лементь. Тынь, райононь эрицятне, мелявттадо сынст семиятнеде, малавикстэст, явтадо гуманитарной лезкс СВО-нь участниктненень, Россиянь од таркатнень эрицятненень. Сюкпря тенк тень кисэ!» – тешкстась Дмитрий Поздняков.
Региононь Правительствань Председателесь тешкстась, Отяжелень районось истя жо содавикс трудонь ине тевтнесэ: «Социалистической Трудонь кемень Геройть кастсь-трясь Отяжбуень модась. Ды течи тынь поладтадо неть вадря койтнень. Те лезды вадрялгавтомс таркатнень ды строямс социальной эрявикс объектт».
Райононь эрицятненень поздоровт ёвтась Российской Федерациянь сенаторось Пётр Тултаев. Сон тешкстась, Отяжелень районось свал башка таркасоль: «Республикань руководствась свал содась, Отяжелень райононь эрицятне кемевикст, тесэ а манятадызь. Отяжбуень модань вадря историясь кемевти: тесэ ломантне маштыть важодеме. Ёвтан тенк седейшкавань сюкпря тевентень покш мелень явоманть, тиринь модантень вечкеманть кисэ. Отяжбуесэ эрицятне покш мель явить раськень койтнень ды тиринь келень ванстомантень».
Муниципалитетэнь прявтось Константин Николаев мерсь, Отяжелень районось течи а ашти ве таркасо ды райононь руководстванть тевезэ: аволь ансяк поладомс ды ванстомс сюпав койтнень, истя жо топавтомс социально-экономической ды культурань виевгавтомань од ёнкст. «Минек тевесь – седеяк вадрялгавтомс райононть. Те топавтови, бути эрьвась юткстонок карми марямо ответственность тиринь ёнксонть уцясканзо кисэ», – мерсь Константин Николаев.
Отяжелень райононь эрицятненень лембе вал марто пшкадсть МР-нь Государственной Собраниянь депутаттнэ Михаил Подмарев ды Ринат Раимов, Орданьбуень ды Отяжбуень епископось Вениамин, Российской газетань Самарань филиалонь прявтось Арсений Бабенков.
Те чистэнть Отяжелень райононь ламот эрицятне тешкстазь покш наградатнесэ. Казне максозь Михаил ды Екатерина Деровтнень вете эйкакшонь триця-кастыця семиянтень. Кенярксчисэнть истя жо тешкстызь Зоя Яковлевна Потаповань, сонензэ тедеде топодсть 95 иеть. Муниципалитетэнь сехте од эрицясь – Степан Добрынкин – истя жо тешкстазь казнесэ. Благодарственной сёрмат максозь райцентрасо ды Дюрькина велесэ кекшемань алтыматнень кодамонь коряс площадкатнень анокстыцятненень. Кенярксчисэнть тешкстызь специальной военной операциянь кавто участниктнень, сынь састь отпусков. Чатьмонемань минутасо ледстизь Геройтнень, кить чавовсть специальной военной операциясонть.
Кенярксчисэнть тешкстызь Николай Михайлович ды Мария Николаевна Царямкинтнэнь семиянть, сынь эрить вейсэ 50 иеть, истя жо Максим ды Яна Ашаевтнень од семиянть. Казнеть максозь Гулинтнэнь важодемань династиянтень, «Атяшевский» сывелень переработкань комплекссэнть сынст важодемань вейсэнь стажось – 77 иеть.
Алкуксонь казнекс кенярксчинь весе инжетнень туртов кармась «Келу» фольклорной ансамблянь ды Мордовиянь филармониянь артисттнэнь концертэсь.