Саранск ошонь округонь «СпецСервис» муниципальной предприятиясь важоди зярыя иень перть. Сон ламо мель яви ошонь паролгавтомантень. Кизэнек-теленек тесэ свал ламо тевть: ванськавтыть китнень, ялго якамо таркатнень, витнить автобусонь лоткамо таркатнень, урядыть шукшонть, усксить ловонть ды а лововияк, зяро лия тевть топавтыть.
Те организациясь ванськавты ды паролгавты маласо аштиця велетненьгак: Ялганть, Николаевканть, Пушкинанть, Монастырскоенть, Горяйновканть, Озёрноенть ды седе тов. «СпецСервисэнь» прявтокс важоди М. В. Струёнков. Те организациядонть ды сонзэ важодицятнеде ловнодо минек материалсто.
Неень шкане «СпецСервиссэ» анокстыть телентень. Витнить-петнить техниканть. Телень техникадонть 87 единицат. Ошонь Администрациянть лезксэнзэ вельде рамазельть колмо од КамАЗт, вейке КДМ – те коммунально-дорожной машина, кавто вишка тракторнэть – Bobcat, конат тельня парсте ванськавтыть тротуартнэнь ловонть эйстэ. Арсеви рамамс эштё КамАЗт, КДМ-ть ды экскаватор. Аволь умок ульнесь теленень техникань ванкшномась (сон эрси иезэнзэ кавксть), тей сакшнось Саранск ошонь округонь прявтось Игорь Асабин.
– Весемезэ минек техникадонть 112 единицат. Неть: КамАЗт, тракторт, автогрейдерт, бульдозерт, эрьва кодат машинат, ловонь пурныцят (снегопогрузчикть). Подразделениясонок важодить 57 водительть, 42 трактористт, 157 дворникть ды седе тов. Иень перть эрьва чистэ ламо важодема. Ансяк сы тундось – ашолгавттано китнесэ бордюртнэнь, арттано кичирева аштиця пирявкстнэнь (турникеттнэнь). Ашолгавттано чувтотнень. Кизна ветяви киланготнень механической ванськавтома: китне тенсевить, шлявить, ули пылесос марто машинаяк, пурнавить шукштне. Ванськавтовить ялго якамо таркатне (тротуартнэ), автобусонь лоткамо таркатне ды павильонтнэ. Минь керсетяно куракштнень, чувтотнень, коське ды празь чувтотнень. Ошонь куротнева леднетяно тикшенть. Паролгавттано-урядатано эрькетнень вакссо экшелямо таркатнень, косо ломантне оймсить. Кизна ванкшнотано фонтантнэнь важодемаст мельга. Теде башка, урядатано шукшонь контейнертнэнь вакссо ёртнезь шукшонть ды козонь-понгсь тейневезь шукшпрятнень. Сёксня пурнатано празь лопатнень, – пачтясь «СпецСервис» МП-нь структурной подразделениянь ошонь центральной пельксэнь прявтось Е. Н. Агапкина.
Чарькодеви, седеяк ламо тевть тесэ эрсить тельня, зярдо моли кандылов. Те шкане весе важодицятне лиснить роботамо ветькак. Киланготне почодовить салсо-чуварсо (руз. песко-соляная смесь) – нолажа шкане машинатне ардовольть. Валскес, зярдо ушодови, кода кортыть, «час пик», КамАЗтнэнень эрявить урядамс ламо ульцят, васняяк, нама, центральной ульцятнень, кува арды общественной транспортось, мейле – лия куротнень, тротуартнэнь. Лиясто ушось, теке мерят, нарьги, ловось моли чинь перть. Ансяк машинась урядасы – пельчасонь ютазь таго пешкеди ловдо. Важодицятне сонзэ усксить полигонов. Стакачить тейнить кичирева лоткавтозь машинатне, азорост кадсызь ды а капшить сынст саемс.
Од иенень «СпецСервисэнь» важодицятне мазылгавтыть ошонть, понгавтнить цивтёрдыця конструкцият. Стявтнить ошонь районтнэсэ ды маласо аштиця велетнесэ кузт. Истя жо валныть эй – тейнить катокт, ков мельспаросо сакшныть конькасо кирякстнеме эйкакштне ды покштне. Крештениянень эрькетнесэ тейнить экшелямо таркат – купельть. Важодицятне аштить тосо веньперть, каванить экшелицятнень пси чайде ды кашадо.
Маень 1-це чинтень, Изнямонь чинтень, Ошонь чинтень – июнень 12-це чистэ, Саранскоесь эрси пек мазылгавтозь. Те тевенть тагояк топавтыть «СпецСервисэнь» роботыцятне. Сынь понгавтнить флагтнень, шлить-тенсить киланготнень. Бути кенярксчитнестэ эрявить путнемс Советской площаденть ваксс пирявкст – сынь ладсить турникетт ды техника.
Эряви меремс, те организациясь кундси ошка чийниця азортомо кадозь кискатнень. Сынст ускить ошонь питомникев. Тосо тенст теить прививка, стерилизация, пилес педявтыть чип ды нолдасызь мекев.
«СпецСервиссэ» важодицятнень ютксто ламот роботыть тесэ уш умок, ули водителень покш стажост. Саемга, Дмитрий Илюшин механизаторось важоди кемзисемге иеть. Кецявты, сакшныть тей од ломантькак. Колмо иеть, кода роботы Николай Цымдянкин. Ней тензэ макссть од КамАЗ. Сон шкастонзо витни-петни техниканть, кирди весементь ваньксчисэ, тевензэ топавты парсте. Ды лиятнень коряскак эрявить ёвтамс ансяк паро валт. Весе вадрясто теить тевест.
Илья Борисович Митряйкин важоди тесэ механикекс ниле иеть. Сон прядызе Н. П. Огарёв лемсэ МГУ-нь Механикань ды энергетикань институтонть. Техниканть ванкшномадо мейле цёрась сонзэ нолдасы эли линияв, эли кучсы витнеме-петнеме. Кедьсэнзэ важодить водительтне ды механизатортнэ.
Ули меленек ёвтнемс водительтнеде. Зярдо минь тов пачколинек, аволь весе ульнесть таркасост, цёратне сыргасть роботамо ошонь килангтнес ды лия таркава. Николай Гельтович ГРЕБЕНЦОВ чачсь Покш Березникбуень Бозаёвсо. Школанзо прядызе Парынзэлесэ. Тонавтнесь Чаунзань ДОСААФ-со. Мейле кавто иеть служась армиясо Дагестансо. Службадо мейле кемголмово иеть важодсь МЧС-сэ водителекс. Седе тов сась роботамо «Спецавтохозяйствав», Октябрьское ЖРСУ-в, конась ней лемдеви «СпецСервисэкс». Васня ардтнесь УАЗ-со, мейле – КамАЗсо. Ней вана, недлядо икеле, макссть тензэ од КамАЗ. Валонзо коряс, од машинасо важодемс седеяк мельспаро.
– Минь ванськавттано, мазылгавттано ошонть иень эрьва кодамо шкане, чить ды веть: шукштонть, лопатнеде, ловдонть, – корты Н. Г. Гребенцов.
Николай Иванович КОЧЕТКОВ важоди тесэ водителекс 2006 иестэ саезь. Эрзянь цёрась чачсь Дубёнкань райононь Берёзовский посёлкасо. Школанть прядомадо мейле тонавтнесь Н. П. Огарёв лемсэ МГУ-нь Аграрной институтсо. Мейле кавто иеть служась армиясо морской пограничникекс. Важодема кизэ ушодовсь «Резинотехника» заводсо. Седе тов роботась «Тепличнойсэ». Ней уш кемготово иеть «СпецСервиссэ». Те шканть перть сон полавтсь ламо машинат: важодсь УАЗ-со, «Волгасо», ГАЗельсэ, ней – «Грантасо».
Алексей Александрович ФИЛЯЕВ чачомань коряс Сыре Шайговань райононь Мельцаны велестэ. Сась тей важодеме 2016 иестэ. Сонензэ сеске максызь КДМ-нть – специализированной машинанть. Те – щётка марто КамАЗ, конась теи китненень механической ванськавтома. Кизна валны-шли, тельня – ловонть уряды. Эрьва чи сон арды тов, ков кучсызь, ды ванськавты ошонть.
«СпецСервисэнь» важодицятне алкуксокс теить-топавтыть тевест. Минек ошонь ваньксчись свал дивавты инжетнень. Минсь, тесэнь эрицятне, паряк, тень а редятано. Ды бути понгтано лия ошов, сеске сельмес каяви рудазось, шукшось, лиякс меремс, ваньксчись аволь истямо, кодамо Саранскойсэ.
«СпецСервис» муниципальной предприятияв эрявить важодицят: КамАЗонь водительть, КДМ – коммунальной машинань водительть, трактористт, погрузчикень машинист, автогрейдерэнь машинист, дворникть. Пшкадемс 55-37-10 телефонганть.
Октябрянь меельце недлячистэ (тедеде 30-це чись) эсь кенярксчист тешкстыть автомобилень транспортсо важодицятне. Ёвтатано тенст седейшкавань лембе валт, кеме шумбрачи, паро эрямо, уцяска!
Татьяна Маторкина
Фототне Эдуард Ретунскиень ды интернетстэ