Кода пачти «Российская газета» изданиясь, Россиянь Оборонань министерствась нолдась толковамот мобилизованнойтненень пандовкстнэде. Истя, стрелок должностьсэ рядовоентень максовить 195 тёжат целковойть, взводонь командирэнтень – малав 225 тёжат, батальононь командирэнтень – малав 243 тёжат.

Сехте аламо пандомась – 195 тёжат целковойть. Сон ашти 158 тёжань покшолмасо эрьва ковонь соцвыплатасто (те пельксстэнть налог а саить) ды пандовкстонть, кона ашти воинской должностень, званиянь, иетнень окладонть эйстэ (сехте аламось 37 тёжат целковойть, тестэ саеви 13% подоходной налог).

Военной службань башка условиятнень кисэ эли кодамояк изнявкстнэнь кисэ эрьва ковсто максовицянтень кемекстави эштё пандовкс (Оборонань министранть 2019 иестэ саезь 727№ кармавтоманзо коряс).

Мобилизованноенть банконь картас ярмактне сыть эрьва ковонь 10-це чистэ саезь 20-це чис. Саемга, бути ломанесь служась октябрянь 1-це чистэ саезь 31-це чис, ярмактне те шканть кис кармить пандовомо ноябрянь 10-20-це читнестэ. Мобилизованноенть таркас ярмактнень мереви саемс сонзэ семиянтень, тенень эряви доверенность. Военнослужащеентень мереви теевтемс эштё вейке банконь карта малавиксэнзэ туртов, ансяк педявтозь эсензэ счётс.

Срочниктнененьгак, кить сёрмадстсть иес ды седе ламос контрактт, истя жо пандовить 195 тёжат целковойть.