Покш Игнатбуень Ташто Чамза веленть лемезэ теевсь эрзянь Чаунза лемстэ. Теде тешкстазь Д. Пушечниковонь ды А. Костяевень «Книга письма и меры» важодемасонть, конась нолдавсь 1624 иестэ. Кавто пингень ютазь сон ледстяви «Список населённых мест Симбирской губернии» книгасонть, конась нолдазель 1863 иестэ: «Старое Чамзино – деревня удельная из 41 двора Ардатовского уезда».
Ютазь пингень 30-це иетнестэ тесэ пурназель «8 Марта» колхозось. 1996 иестэ саезь те – СХПК. Неень шкасто сон лемдеви – ООО «8 Марта», конань прявтозо – Николай Иванович Куманёв. Предприятиясь покш. Тей важодеме сакшныть, ловт, весе велетнестэ, конат совавтозь Ташто Чамзань велень поселениянтень: Оржаньбуестэ, Отяжелестэ, Спасскойстэ, Моревкасто ды Коммунарсто. Истя жо усксить ломанть Селищасто ды Андрелестэ.
Эрьва веленть эрямозо чуди сэтьме леекс. Теке марто сынь явовить вейкест-вейкест эйстэ. Ташто Чамзав пачкодемстэ миненек каявсть сельмес паро китне, конат теезельть «Безопасные качественные дороги» нацпроектэнть лувсо, ды келейдеяк келей ульцятне. Кудотне кинть эйстэ аштить васолга. Ве ёндо варштамс, те пек вадря – ули козонь содномс сеят. Лия ёндо – кизна вальмалкстнэстэ сави ламо чаво тарка леднемс, тельня – ванськавтомс байтяк лов. Тешкстама сеньгак, велесь пек ванькс, марчт-пурьгине палакст косояк а касыть. Теньсэ, нама, ули велень администрациянть путовксозо – а кадныть веленть тикше потс ёмамо.
Велень администрациясь ашти чувтонь апокшке кудынесэ. Сельмес а каявиця, кинть ёндо кекшезь куракшсо, натой а сеске тенек муевсь. Прявтозо паро мельсэ вастымизь ды мизолдозь ёвтнесь тенек эсь веледест. Неяви, авась важодемазонзо путы весе оймевиензэ. Наталья Владимировна Зайкина важоди Ташто Чамза велень администрациянь прявтокс аволь умок, малав кавто иеть. Ансяк те шканть перть улить од полавтомат. Васняяк, веленть каштанчизэ – те Ине Отечественной войнасо чавовозтненень одкстомтозь кеврунгось ды обелискесь. Ней тосо таркась келейгавтозь, ацазь мазый кевсэ, кавто ёнга путозь эземть, озавтозь чувтот. Мемориалонть стенатнесэ свалшкас тешкстазь 235 лемть, конат максызь эрямост минек масторонть кис. Куншкасонзо ашти бронзасто теезь комавтозь пря марто ушмодей (воин). Сонзэ чачонть лангсо колмошка ковт важодсь содавикс скульпторось Александр Филатов. Памятникенть одкстомтомазо ютась «Комплексное развитие сельских территорий» программанть лувсо.
– Омбоце покш тевесь – самообложениянь ярмактнеде витнезь-петнезь велень калмазыресь. Истя жо одкстомтовсть калмазыртне Спасскойсэ, Отяжелесэ. Седе тов ушодтано витнемензэ Оржаньбуесэяк, – тешкстась Наталья Владимировна.
Ташто Чамзасо эрицятнеде малав 300 ломанть. Неень шкасто тесэ ули средней школа, косо тонавтнить ансяк 24 эйкакшт. Школась тесэ ловови филиалокс, совавтозь Покш Игнатовань средней школантень. Ули велень библиотека, пек паро Культурань кудо, конань потсо а умок теезель евроремонт. Велесэнть пурназь «Забава» авань ансамблясь. Ды мезесь пек дивавтымизь, ули натой цёрань ансамбляяк. Лемезэ – «Эрзянь цёрат». Эйзэнзэ совить гармонисттнэ А. Н. Наумов ды В. С. Комов, гитарасо седицятне – Николай ды Юрий Дорофеевтне. Вячеслав Степанович Комов важоди школасо ванстыцякс. Сынь, омбоце гармонистэнть Александр Николаевич Наумов марто, Саранскойсэ а весть сайнесть изнямонь таркат «Седяк, гармония!» пелькстамосонть. Свал налксить «Шумбрат, Мордовия!» фестивальсэнть. Александр Наумов истя жо ардтни лия региононь мероприятиятнескак. Лиясто седи чокшне ланга эсь кудонь крыльцяпесэ эли умарьпиресэ. Ломантне кортыть: велеванть ютат – оймеёжонть кенярдовты гармониянь соланя «вайгелесь». Седейсэнтькак неть мазый гайттнеде тееви шожда ды мельспаро …
Велень ломантнень туртов максови медицинань лезкс. Тесэ ули ФАП, козонь недлязонзо кавксть ардтни фельдшер шабра велестэ. Тосо микшнить ормаменькст, истя жо сакшныть врачт диспансеризациянь ютавтомо.
А вана почтась велесэнть пекстазь. Почтань меельце прявттонть мейле, кона тусь эрямо лия таркав, арась киньгак мелезэ кундамс те тевентень. Сюкпря, ули почтальонка. Зярдо машинась сы Игнатовасто, сон явшесынзе газетатнень ды пенсиятнень. Истя жо ковозонзо весть сакшныть электричестванть ды газонть кис пандовкстнэнь саеме.
Наталья Владимировна марто вейсэ важоди сонзэ полавтыцясь Левщанова Галина Петровна. Сон те администрациясонть пек умок – 25 иеть. Ламо иеть важодсь икелень прявтонть Татьяна Николаевна Куманёва марто. Татьяна Николаевна пенсияс лисемс важодсь тиринь велесэ. Сонзэ пингстэ теезель ламо, меельцекс, 2017 иестэ, школанть вакссо панжозель эйдетнень туртов налксема таркась, косо эйкакштне вечкить ютавтомс юткошкаст.
Наталья Владимировна Зайкина вечксы важодеманзо, седеяк пек сень кис, зярдо кодамояк тевесь топавтови педе-пес, сестэ седейсэнть маряви кеняркс, чарькодема – тонь важодемат канды лезэ ломантненень. «Меленек вейке – седе кувать эрязо велесь, од ломантне савольть ды кадовольть тезэнь эрямо», – тешкстась сон.
Ды эдь улить сыцяткак. Саемга, 2014 иестэ Украинасто сась Екатерина Васильевна Анниковань покш семиязо: тетязо-авазо, ниле сазоронзо ды лелязо. Екатерина Васильевна марто теевинек содавиксэкс велень лавкасо. Сон паро мельсэ корты тесэнь эрямодонть ды ломантнеде: «Вастымизь пек парсте, эзинь арсеяк, истя туи мелезэнь велень эрямось. Эйкакштне сестэ ульнесть вишкинеть. Васня тенек макссть эрямо тарка эйдень кужосо. Василий Васильевич мирдем марто сеске лисинек важодеме «8 Марта» ООО-с. Тесэ чачсь колмоце эйкакшонок, сазоромгак зярыя шкань ютазь чачтсь цёрыне».
Куроксто, кода од специалисттнэнень, сыненст стявтсть кудо. Кирдить эрьва кодат ракшат ды путнить пиреть. Ломантне лангаст кортыть ансяк паро валсо. Тевде а пелицят, мелень ваныцят, сынь пек куроксто мусть вейсэнь кель-вал велень эрицятнень марто, конатнень туртов истя жо вечкевсть од эрицятне.
Наталья Владимировнань валонзо коряс, сынст велень эрицятнестэ кавтотне саезельть СВО-в: «Вейкенть шумбрачинзэ лавшомгадоманть кувалма нолдызь кудов, а омбоцесь эштё отпусковгак эзь сакшно. Цёратнень ды сынст семияст марто важодемась пек стака – эряви ламо оймевий, штобу ёвтамс седеень оймавтома валт малавиксэст туртов. Кода эрьва аванень, конань улить эйкакшонзо, чарькодеви те сэредьксэсь ды певтеме кисэст ризнэмась».
Вана истя эри те кезэрень эрзянь велесь – кода весе ды истя жо эсензэ лувсо.
Марина Агафонова
Эрьва веленть эрямозо чуди сэтьме леекс. Теке марто сынь явовить вейкест-вейкест эйстэ. Ташто Чамзав пачкодемстэ миненек каявсть сельмес паро китне, конат теезельть «Безопасные качественные дороги» нацпроектэнть лувсо, ды келейдеяк келей ульцятне. Кудотне кинть эйстэ аштить васолга. Ве ёндо варштамс, те пек вадря – ули козонь содномс сеят. Лия ёндо – кизна вальмалкстнэстэ сави ламо чаво тарка леднемс, тельня – ванськавтомс байтяк лов. Тешкстама сеньгак, велесь пек ванькс, марчт-пурьгине палакст косояк а касыть. Теньсэ, нама, ули велень администрациянть путовксозо – а кадныть веленть тикше потс ёмамо.
Велень администрациясь ашти чувтонь апокшке кудынесэ. Сельмес а каявиця, кинть ёндо кекшезь куракшсо, натой а сеске тенек муевсь. Прявтозо паро мельсэ вастымизь ды мизолдозь ёвтнесь тенек эсь веледест. Неяви, авась важодемазонзо путы весе оймевиензэ. Наталья Владимировна Зайкина важоди Ташто Чамза велень администрациянь прявтокс аволь умок, малав кавто иеть. Ансяк те шканть перть улить од полавтомат. Васняяк, веленть каштанчизэ – те Ине Отечественной войнасо чавовозтненень одкстомтозь кеврунгось ды обелискесь. Ней тосо таркась келейгавтозь, ацазь мазый кевсэ, кавто ёнга путозь эземть, озавтозь чувтот. Мемориалонть стенатнесэ свалшкас тешкстазь 235 лемть, конат максызь эрямост минек масторонть кис. Куншкасонзо ашти бронзасто теезь комавтозь пря марто ушмодей (воин). Сонзэ чачонть лангсо колмошка ковт важодсь содавикс скульпторось Александр Филатов. Памятникенть одкстомтомазо ютась «Комплексное развитие сельских территорий» программанть лувсо.
– Омбоце покш тевесь – самообложениянь ярмактнеде витнезь-петнезь велень калмазыресь. Истя жо одкстомтовсть калмазыртне Спасскойсэ, Отяжелесэ. Седе тов ушодтано витнемензэ Оржаньбуесэяк, – тешкстась Наталья Владимировна.
Ташто Чамзасо эрицятнеде малав 300 ломанть. Неень шкасто тесэ ули средней школа, косо тонавтнить ансяк 24 эйкакшт. Школась тесэ ловови филиалокс, совавтозь Покш Игнатовань средней школантень. Ули велень библиотека, пек паро Культурань кудо, конань потсо а умок теезель евроремонт. Велесэнть пурназь «Забава» авань ансамблясь. Ды мезесь пек дивавтымизь, ули натой цёрань ансамбляяк. Лемезэ – «Эрзянь цёрат». Эйзэнзэ совить гармонисттнэ А. Н. Наумов ды В. С. Комов, гитарасо седицятне – Николай ды Юрий Дорофеевтне. Вячеслав Степанович Комов важоди школасо ванстыцякс. Сынь, омбоце гармонистэнть Александр Николаевич Наумов марто, Саранскойсэ а весть сайнесть изнямонь таркат «Седяк, гармония!» пелькстамосонть. Свал налксить «Шумбрат, Мордовия!» фестивальсэнть. Александр Наумов истя жо ардтни лия региононь мероприятиятнескак. Лиясто седи чокшне ланга эсь кудонь крыльцяпесэ эли умарьпиресэ. Ломантне кортыть: велеванть ютат – оймеёжонть кенярдовты гармониянь соланя «вайгелесь». Седейсэнтькак неть мазый гайттнеде тееви шожда ды мельспаро …
Велень ломантнень туртов максови медицинань лезкс. Тесэ ули ФАП, козонь недлязонзо кавксть ардтни фельдшер шабра велестэ. Тосо микшнить ормаменькст, истя жо сакшныть врачт диспансеризациянь ютавтомо.
А вана почтась велесэнть пекстазь. Почтань меельце прявттонть мейле, кона тусь эрямо лия таркав, арась киньгак мелезэ кундамс те тевентень. Сюкпря, ули почтальонка. Зярдо машинась сы Игнатовасто, сон явшесынзе газетатнень ды пенсиятнень. Истя жо ковозонзо весть сакшныть электричестванть ды газонть кис пандовкстнэнь саеме.
Наталья Владимировна марто вейсэ важоди сонзэ полавтыцясь Левщанова Галина Петровна. Сон те администрациясонть пек умок – 25 иеть. Ламо иеть важодсь икелень прявтонть Татьяна Николаевна Куманёва марто. Татьяна Николаевна пенсияс лисемс важодсь тиринь велесэ. Сонзэ пингстэ теезель ламо, меельцекс, 2017 иестэ, школанть вакссо панжозель эйдетнень туртов налксема таркась, косо эйкакштне вечкить ютавтомс юткошкаст.
Наталья Владимировна Зайкина вечксы важодеманзо, седеяк пек сень кис, зярдо кодамояк тевесь топавтови педе-пес, сестэ седейсэнть маряви кеняркс, чарькодема – тонь важодемат канды лезэ ломантненень. «Меленек вейке – седе кувать эрязо велесь, од ломантне савольть ды кадовольть тезэнь эрямо», – тешкстась сон.
Ды эдь улить сыцяткак. Саемга, 2014 иестэ Украинасто сась Екатерина Васильевна Анниковань покш семиязо: тетязо-авазо, ниле сазоронзо ды лелязо. Екатерина Васильевна марто теевинек содавиксэкс велень лавкасо. Сон паро мельсэ корты тесэнь эрямодонть ды ломантнеде: «Вастымизь пек парсте, эзинь арсеяк, истя туи мелезэнь велень эрямось. Эйкакштне сестэ ульнесть вишкинеть. Васня тенек макссть эрямо тарка эйдень кужосо. Василий Васильевич мирдем марто сеске лисинек важодеме «8 Марта» ООО-с. Тесэ чачсь колмоце эйкакшонок, сазоромгак зярыя шкань ютазь чачтсь цёрыне».
Куроксто, кода од специалисттнэнень, сыненст стявтсть кудо. Кирдить эрьва кодат ракшат ды путнить пиреть. Ломантне лангаст кортыть ансяк паро валсо. Тевде а пелицят, мелень ваныцят, сынь пек куроксто мусть вейсэнь кель-вал велень эрицятнень марто, конатнень туртов истя жо вечкевсть од эрицятне.
Наталья Владимировнань валонзо коряс, сынст велень эрицятнестэ кавтотне саезельть СВО-в: «Вейкенть шумбрачинзэ лавшомгадоманть кувалма нолдызь кудов, а омбоцесь эштё отпусковгак эзь сакшно. Цёратнень ды сынст семияст марто важодемась пек стака – эряви ламо оймевий, штобу ёвтамс седеень оймавтома валт малавиксэст туртов. Кода эрьва аванень, конань улить эйкакшонзо, чарькодеви те сэредьксэсь ды певтеме кисэст ризнэмась».
Вана истя эри те кезэрень эрзянь велесь – кода весе ды истя жо эсензэ лувсо.
Марина Агафонова