Октябрянь васенце читнестэ Москов ёнксонь Кубинкасо «Патриот Экспо» выставочной комплекссэ ютавтовсь «Сырнень сёксь – 2022» агропромышленной выставкась. Мордовия Республиканть пельде тов якасть велень хозяйствань ды перерабатывающей промышленностень кемгавксово предприятият. Ды весе сынь велявтсть покш казне марто.
Мордовиянь производительтне тешкставсть дипломсо ды медальсэ, конатнень эйстэ 25 – сырнень, 3 – сиянь ды 3 – бронзань.
Изницятнень ютксо, ды эряви меремс, уш аволь васенцеде, «Агропромсервис» ООО-сь, конась те выставкасонть невтсь «советский тяжеловоз» породань лишменть. Хозяйствась кармась изницякс «За высокие показатели в товарном и племенном животноводстве» конкурссонть.
Кода тешкстызе «Агропромсервис» ООО-нь прявтось, опытной аграрникесь, эсь тевенть вадрясто содыця ломанесь Владимир Ильич Нужнов, «Сырнень сёксь» выставкань участникекс сынст хозяйствась эрси уш зярыя иень перть ды свал сайни васенце таркатнень.
– «Сырнень сёксь» содавикс агропромышленной выставкасонть зярыя иень перть Мордовиянь алашатне сайнить васенце таркат ды вакссост а неить лия конкурентт. Бразилия, Бразилец ды Жангир – неть лишметне заводонть «тештензэ». Ней эштё Романтика. Ды ламот лиятнеяк, бути кучомс соревнованияс, мейсэяк эйстэст а явовить, – тешксты Владимир Ильич.
Алашатнень трямонь-кирдемань заводсонть улемстэ минь алкукс неинек, эрьва лишмесь тесэ – куш нейке выставкав: виевть, мазыйть, эрязат, статнойть. Зярдо жо денникстэнть ливтизь тедедень «Сырнень сёксень» изницянть Романтикань, пелькстамонь судьятнень коллегиянть марто миньгак прынек ве мельс – алкуксонь «теште». Юты, мерят, подиумга, апак капша, апак тално, кадык перьканзо ашти эйкакшонь шалт, те шкане экскурсияс алашатнень ванномо сакшность Саранск ошонь 41-це № школань тонавтницятне. Романтика, мерят, сынст а реди, а мари. Сон кунсолы ансяк эсь азоронть – лишметнень мельга якицянть, прявт зоотехникенть Виктор Серафимович Волковонь. Сон миненек ёвтнеськак Романтика ланга ды кода ардтнесть «Сырнень сёксь» агропромышленной выставкав.
– Романтика чачсь 2010 иестэ. Авазо – Раймонда, тетязо – Кураж. Эряви тешкстамс, лишментень лементь максомсто саевить тетянть ды аванть лемтнень васенце букватне. Истя эрси седе сеедьстэ. Тесэ жо тетянть лемстэ минек буквась а лади, ансяк те мезеяк, прявтось – ули аванть пельде, – ёвтни Виктор Волков. – Лишмесь чачсь-кассь теске, Мордовиянь племенной лишмень заводсонть. Сонзэ пельде минь уш саинек кавксо вашинеть. Вете айгорнэтнень рамизь, колмо эльдинетне кадозь племакс.
Зярдо хозяйствасонть стясь кевкстема «Сырнень сёксь» агропромышленной выставкав алашань анокстамодо, кочказель Романтика. Сон ладясь весе вешематненень – виев, сэрей, эряза.
– Весе алашатнень, конатнень анокстатано кодамояк пелькстамос, минь свал нолдтнетяно ушов, штобу сынь тонадовольть олячинтень, ломантненень, – корты Виктор Волков. – Миненек сеедьстэ сакшныть эйкакшт экскурсияв. Ды алашатне уш весе тонадсть шалтонтень, ломантнень ламочинтень. Романтика марто ламо важодсь Данил Беззубов. Сон тесэ важоди экскурсиятнень анокстамонть-ютавтоманть коряс.
Данил лишмень заводонь лия важодицятнень марто мероприятиянтень Романтикань анокстась косо-бути ковонь перть. Алашась тонавтовсь манежка якамонтень, ломань ютксо прянь ветямонтень, анокставсь килангов.
– Васняяк сонзэ тонавтынек коневозкасо ардомантень. Совавтылинек сонзэ те будкантень, зярсыя кирдилинек ды мекев ливтилинек. Кавто-колмо чинь ютазь те весе мекев теевиль одс, штобу лишмесь тонадоволь ды чарькодевель, коневозкасонть мартонзо мезеяк берянь а лиси, ды ардоволь апак пеле, – ёвтни лишметнень мельга якицясь. – Ды минек весемесь лиссь парсте. Килангсо Романтика прянзо ветясь вадрясто ды выставкасонтькак весементь тейсь кода эряви. Кунсолось мельганзо якицянть Сергей Комлевень, кона ардтнесь мартонзо.
Выставкасонть лишметне кирдевсть денниксэ. Валскень 7 чассто павильонось панжовиль, лишметнень мельга якицятне сынст андылизь ды ванськавтылизь. 9 чассто сыльть ваныцятне, ды ушодовиль важодемась. Кода мерсь Виктор Серафимович, выставкав сыцятне весе уш покш ломанть, ансяк вана «советский тяжеловоз» породань лишметь аламот, кить эйстэст некшнесть. Секскак самай те породанть коряс кевкстнематнеде ульнесть ламо. А эдь неть лишметне – Россиянть каштанчизэ.
– Выставкасонть судьятнень коллегиянтень совасть Бельгиясто ды Германиясто представительть. Сынь домкасто ванность весе онкстамотнень, зяро вашинеть те алашанть пельде, зяро миезь. Гайневтсть племенной центрав ды кевкстнесть, весемесь-арась ашти пачтямотнень коряс, – корты Виктор Волков. – Нама, ламо важодят алашанть мартояк ды судьятнень коллегиянть мартояк. Советской шкасто весементь коряс ульнесь кода-бути седе шожда. Кува-кува аламодо сёпильтькак. А ней Интернетс совак ды лишменть ланга мусыть весе пачтямотнень.
Нама, выставкасонть алашатнень туртов эрьва чистэ максовиль кодамояк задания. Тень туртов теезель манеж, косо весемесь топавтовськак. Вейке чистэнть, мертяно, эрявсь ютамс манеженть перька, омбоцестэнть – ютамс 8 цифранть коряс. Ды весе кармавтоматнень теемстэ васняяк ванови, кода алашась кунсолы эсь азоронзо – мельганзо якицянть.
– Лишметне пек парсте марить, кода мельгаст якить ломантне. Мон монськак ламоксть ардтнинь эрьва кодамо выставкас. Сайнинь айгорткак, эльдетькак. Ды сынь пек парсте чарькодить тонь ёжот – бути а талнат, сыньгак пряст ветить сэтьместэ, кеместэ. Лишметнень эряви вечкемс, – кемексты Виктор Серафимович. – Якамс лишме мельга – тевесь а шожда. Ансяк бути тонеть сынь вечкевсть – те весе эрямос.
Кода тешкстызе хозяйствань прявтось Владимир Ильич Нужнов, предприятиясонть арась вейкеяк ломань, кона бу саволь лишмень заводов ды а вечкевельть тензэ те мазый ды каштан ракшатне. Эдь сынь пек превейть, парсте марить ломаненть оймеёжонзо. Лишме мельга весе якицятне – эсь тевень алкуксонь вечкицят, тесэ тентеме кодаяк.
«Агропромсервисэкс» хозяйствась лемдезель 2005 иестэ. Те ней сон республиканть келес гайгиця велень хозяйствань виев предприятия, конасонть кастовить сюро, ламбамо якстерькай, трявить ракшат, потявтови ловсо, миеви сывель… Ютазь пингень колоньгеменце иетнестэ жо сон панжозель «Начало» совхозонть юрсо кода Мордовиянь 27 № лишмень завод.
Неень шкане хозяйствасонть весемезэ кирдевить 150 алашат, истямо породань, кода советский тяжеловоз, рузонь рысак, арабонь скакун, тракененской ды пони. «Мордовский» конезаводонь алашатнень лемест ней, кода икелеяк, гайгить масторлангонть келес ютавтовиця соревнованиятнесэ ды выставкатнесэ.
Юлия Еремина