Июнень 12-це чистэ Саранск ошонь Советской площадьсэ, 1941-1945 иетнень войнань ды трудонь подвигень мемориальной музеенть икеле, ютавтовсь «Мордовия – фронту!» акциясь. «Молодая гвардия «Единой России» партиянь активисттнэ вейсэ «Z-сети» сообществанть марто Саранск ошонь эрицятнень ды инжетнень туртов ютавтсть мастер-класс кекшемань алтыматнень кодамонть коряс.

«Те пек эрявикс мероприятия. Течинь чистэ седеяк. Сон терди ломантнень явомс тенень седеяк покш мель, эдь кекшемань алтыматне пек эрявить минек боецтнэнень. Вешематне свалшкане сыть эрьва кодамо подразделениясто, секскак лездыцят миненек эрявить. Кекшемань алтыматнень тейтяно пертьпельксэнть ды иень шканть мельс саезь. Штабт улить Мордовиянь ламот районтнэсэ. Саранскойсэ сон ашти Большевистской куронь 81а кудосонть. Эрьвась вийсэнзэ теемс истямо лезкс, конась пек эрявикс», – тешкстызе «Мордовия-Z» волонтёронь сообществань теицясь Ольга Котельникова.
«Минь эйкакштнень марто ютылинек вакска ды арсинек варчамс виенек те эрявикс тевсэнть, – корты Саранск ошонь эрицясь Ирина Савинова. – Тевесь а пек стака, ансяк веши цидярдомачи ды пшти вановт. Ды бути куш аламодо максовтано лезкс минек цёратненень, эряви тень теемс».

Акциянь участникекс кармасть эрьва кодамо иесэ малав 500 ломанть. Мастер-классонть шкасто теезь кекшемань кемголмово алтымат, конатне маласо шкастонть кучовить передовойс.