Неень шкасто уш эйдень кужосто саезь тонавтыть эйкакштнень, кода видестэ ветямс прянть киланга молемстэ. Ды неть содамочитне тенст кармить эрявомо эрямонь перть.

Мордовия Республикава МВД-нь ГИБДД-нь пропагандань отделениянь важодицятнеяк Саранскоень ды республикань эйкакштнень марто ютавтнить эрьва кодат мероприятият: тонавтомат, пелькстамот ды конкурст.

Невтемакс, аволь умок республикань «Надежда» приютсо эрицятненень теезель экскурсия МР-ва МВД-нь
ГИБДД-нь управлениясо. Пропагандань отделэнь старшей инспекторось Татьяна Сухарева васняяк эйкакштненень ютавтсь экскурсия, сынь ульнесть экзаментнэнь максомань класстнэсэ, кармасть содамо, кодамо иесэ од ломантненень закононь коряс мереви максомс прават автомобилень ветнемс.

Эйкакштне седейшкава ванкшнызь Госавтоинспекциянь историянь музеенть. «Надежда» приютонь воспитанниктне макснесть кевкстемат икелень шкадонть. Сынст ульнесь мелест содамс, кода ютазь пингестэ вансть транспортонть видестэ ардоманть мельга, кодат кедьёнкст нолдасть тевс ГАИ-нь сотрудниктне.

Музейсэнть од ломантне кармасть содамо сеть госавтоинспекциянь сотрудниктнень ине тевдест, кить максызь эрямост служебной долгост топавтомсто ды лиятнень эрямост идемстэ.

Теде мейле эйкакштненень невтезель документальной фильма, косо домкасто пачтязель, кодамо кажос пачти килангонь эрьва участниктнень ёндо правилатнень коламось. Сынст марто эштё весть ульнесь кортамо, кода эряви ветямс прянть китнень трокс ютамсто. Те вастовомасонть налксематнеяк, конат икелепелев анокстазельть эйкакштнень туртов, алтазельть эрямонть ды шумбрачинть ванстомантень.

Меельцекс эйкакштне ёвтасть сюкпря ГИБДД-нь важодицятненень ды алтасть свал топавтомс килангонь весе правилатнень.

Валентина Юдина