Екатерина Петровна Ечмаева эри Дубёнкань райононь Поводелесэ. Тедедень тунда сонензэ топодсь 91 ие. Зяро тердсь Мария тейтерезэ самс эрямо мартонзо Дубёнкав – эзь моле. Сонсь яки эсь мельганзо. Пиди-пани ярсамопель, путни пирес модамарть ды сонсь таргси. Теде башка, нейгак покш читнестэ яки озномо церьковав, ламо иень перть постовакшны.
Сонзэ эйкакшпингезэ стакаль. Ды кинь шождаль сестэ? Аваст кулось одсто. Уроз эйдетнень вансь Поля патяст. Мейле тетяст сайсь од ава. Кемень иеть ульнесть тензэ, кода кармась войнась. 1942 иестэ тетянзо, Пётр Иванович Кантанистовонь, саизь войнав. Вете эйкакштне кадовсть сэредиця аваст кедь лангс. Шкань ютазь фронтов тусь васенце цёраст Алексей.
– Войнань иетнестэ пек стака ульнесь. Минь Александра сазором марто якинек веть вирев пенгень-тарадонь мельга, каштомонть а мейсэль уштомс. Пурнылинек пекшень лопат, вараканьбал (клевер), марч – тень эйстэ авам кши пансь. Паро, кирдинек скал, сон тримизь, эзинек куло вачодо. Скалонтень тикшентькак эрявсь анокстамс. Кизна роботынек колхозсо. Тельня якинек школав. Нама, аволь эрьва чи, оршамопельть-карсемапельть эзть сатно. Зярдо лембель – чиилинек школав, якшамотнестэ аштилинек кудосо. Мон прядынь начальной школа, мейле карминь роботамо колхозсо. Эрявсь кодаяк лездамс семиянтень. Ков кучсамизь бригадирэсь – тов мольтяно: нуеме, тикшень ледеме ды седе тов, – ледстни Екатерина Петровна.
1944 иестэ сась тетянзо куломадо куля. Шкань ютазь пачкодсь сёрминеяк, косо тетянзо ялгась, кинь марто тюрсть ятонть каршо, ёвтнесь, кода маштовсь тетяст. Пётр Ивановичень ледизе снайпер. Цёрадонзо, Алексейде, кодаткак кулят арасельть. Сон понгонесь полонс, косто колмоксть оргодекшнесь. Кудов велявтсь живстэ.
– Войнанть прядовомадо маринек паксясо роботамсто. Вай, кода авардсть ды лайшесть сетне, кинь малавиксэст чавовсть… Лиятне кецнесть, пейдсть, кемсть, эрямось полавтови, карми седе шожда, – ёвтни Катя баба.
Е. П. Ечмаева 19 иесэ лиссь мирденень шабрасост эриця цёранень, Михаилнэнь. Свадьбадо мейле пельиень ютазь ильтизе армияв, косо сон служась кавто иень перть. Авась важодсь полеводческой звенасо, мирдезэ – колхозонь пенькозаводсо. Чачтсть-кастсть колмо эйкакшт: Иван, Николай, Мария. Сынь эзть кенере кудонь стявтомояк, кудазорось пек ормалгадсь. Екатерина Петровна якась мельганзо, ансяк эзь идеве тензэ, мирдезэ кулось 35 иесэ.
Ансяк сонсь соды, кодамо довань уцяскась, мезе савсь печтямс, зяро роботамс цёравтомо, зяро стакачи кирдемс ды нужачи. Эрзянь авась цидярдсь. Сон ламо важодсь, путнесь пире, кирдсь ракшат. 67 иес трясь скал! Стявтсь кудояк, косо кувать эрясь цёранзо-урьванзо марто. Колхозсо роботась пенсияв лисемадо мейлеяк. Ламо савсь ризнэмс ды мелявтомс: калминзе кавто нуцькинензэ, кавто цёранзо. Зыянтнэ эзизь синде аванть. Сон кадовсь валдо ломанекс: эрямонь вечкицякс, лиянень паронь арсицякс, весень кисэ мелявтыцякс. Эйкакшонзояк тринзе важодемань вечкицякс, чевте седей ломанекс. Вана кода ёвтни сондензэ Е. П. Ечмаевань ялаксонзо тейтересь Вера Алексеевна Соломонова:
– Екатерина Петровна – тетянь сазорозо. Эйкакшпингстэ мон сеедьстэ яксинь тензэ инжекс. Мекс сеедьстэ? Минь пек вишкинестэ кадовинек ававтомо (вете эйкакшт). Эзь сатно тенек авань лембесь, вечкемась, жалямось. Катя патям жо свал мельспаросо эйсэнек вастсь. Кадовтано кедьсэнзэ удомо, валске марто сыргозтяно – столь лангсо ашти пси каймак, ловсо. Сонсь уш пиресэ пандят кочки. Кона шкане кенериль эрьва ков?! Ды эдь те шкас истямо жо эряза, ков-бути капшиця, свал мезень-бути теиця. Зярдояк тевтеме а ашти. Дубёнкав свал ютыль ялго, а озыль машинас эли автобусос.
Кодаяк а стувтови тень истямо тев: весть тельня кудозонзо совась пурныця ава (ништёй). Сон кромождыль, якиль палка марто, вайгелезэ казямоль. Минь, эйкакштне, тандадынек. Катя патям кецнесь тензэ, теке мерят, роднязо-раськезэ сась! Сон сеске андызе, кортнесь мартонзо, кузтизе каштлангс эжнеме.
Тетям Катя патянь лемдсь «Вармакс». Пек бойкаль. Лиси паксяв тикшень ледеме – цёратнень эйстэ а кадовиль! Тетянень сон мериль «Золотой». Тетянь марто эрясть покш ялгаксчисэ, вейке-вейкенень лездазь, мелень ванозь. Неень шкане чуросто вастат истямо ояксчи.
Ледстнян, кода умоксто ульнесь Инечи. Велень ломантне лиснесть ушов: кецнесть, морсесть, кортнесть. Катя патям нурька морынеть морси.
Комсь иеде икеле, зярдо Катя патянень топодсть 70 иеть, минь весе пурнавкшнынек вейс, сакшнынек ёвтамо тензэ ламо лембе валт. Кие икелень шкасто тешкстыль чачома чить? Сон дивсесь ды кецнесь, эзь тонадо, зярдо явить тензэ истямо мель. Сон минек зярдояк эзь сёвно, эзь тонавто. Ансяк эрямонзо лангс ванозь, кармась тенек алкуксонь ломанень примерэкс. Мон тейтеремгак лемдия Катюшакс.
Катя патям минек туртов пек вечкевикс ды малавикс ломань. Седейсэнзэ свал ули миненек тарка, кази тенек лембе. Сон – Пазонь ломань, истятнэнь эрявить ванстомс, явомс тенст мель ды седейлембе. А стяко Пазось макссь тензэ шумбрачи, кувака эрямо, валдо превть. Пек кецнян, зярдо мартонзо вастневтяно эли гайневттяно телефонга. Весе седейстэ арсян тензэ кеме шумбрачи, паро ды сэтьме эрямо, сюконян весементь кисэ!
Татьяна Маторкина