Неть читнестэ минь вастовкшнынек «Защитники Отечества» фондонь Мордовиянь филиалонь Кочкуровань муниципальной районга социальной координаторонть Ирина Геннадьевна Овчинникова марто. Сон ёвтнесь СВО-нь ветерантнэнь, участниктнень ды сынст семиятнень марто эсь важодемадонть.
– Фондонть ланга васенцеде мон маринь 2023 иень апрелень 3-це чистэ, зярдо минек масторонь Президентэсь Владимир Владимирович Путин сёрмадстсь Указ специальной военной операциянь участниктненень лездамга «Защитники Отечества» государственной фондонть теемадо. Эйсэнзэ тешкставсь, што «вейке вальмань» лувонть вельде кармить решавомо специальной военной операциянь ветерантнэнь, чавовозь участниктнень семиятнень, инвалидтнэнь мелявксост.
Кода корты Ирина Геннадьевна, се шкасто сон важодсь лия ёнкссо ды улемс «Защитники Отечества» фондонь социальной координаторокс кода-бути эзь арсекшнеяк. Зярдо жо пшкадсть тензэ те тевенть коряс, сась мельс варчамс. Каясь яволявтома ды кармась учомо каршо вал.
– Кувать учомс эзь саво, гайневтсть зярыя чинь ютазь, – корты Ирина Овчинникова. – Мон ютынь кортамотнень, сёрмадынь тесттнэнь. Те шкане Саранск ошсо панжовсь «Защитники Отечества» фондонь региональной филиалось, тердекшнимизь те кенярксчинтень.
Эряви ёвтамс, Фондонь специалисттнэнь тонавтомась ушодовсь сеске Указонть сёрмадстомадо мейле. Пурназтне явозельть кавто группава. Васенце кемень ломантне тонавтоманть ютызь майстэ ды уш кундакшность тевс. Лия кеветее специалисттнэ, конатнень ютксо ульнесь Ирина Овчинниковаяк, тонавтнеманть ютызь августсто. Тонавтнемань васенце пельксэсь мольсь Народной хозяйствань российской академиясо, минек туртов те Нижней Новгородось, седе тов дистанционна курсат ютасть Московсо (В. П. Сербскиень лемсэ институтось) ды меельце пельксэсь таго Нижней Новгородсоль. Тосо эрявсь максомс экзамент, ютамс тестирования. Лиякс меремс, ютамс колмо этапт ды ансяк теде мейле специалистэсь саеви кода социальной координатор.
– Тонавтнеманть ютамодо мейле кундынь тевс. Монь аравтымизь «Защитники Отечества» фондонь Мордовиянь филиалонь Кочкуровань райононь социальной координаторокс, – ёвтни Ирина Овчинникова. – Важодеманть ушодынь эсь целевой группанть тонавтнемасто, теевинь содавиксэкс специальной военной операциянь ветерантнэнь марто, карминь содамо сынст мелявкстнэнь ды талновтыця кевкстематнень. Мартост вейсэ карминек ванномо, кодат сынст документэст уш улить, мезе лангсо жо эштё эряви важодемс, пурнамс эрявикс конёвтнень. Минек, социальной координатортнэнь, васень тевенек – ёвтнемс СВО-нь участниктненень, боевой тевтнень ветерантнэнень ды чавовозтнень малавикстнэнень социальной лезксэнь максомань ёнкстнэде, налогонь, коммунальной услугатнень кис пандомань льготатнеде ды лия кевкстематнень коряс консультациясь ды лезксэсь.
Башка мель явови чавовозтнень семиятнень марто важодемантень. Соцкоординаторось сынст туртов васень лездыця ды самай сонензэ эряви мартост теемс сюлмот, ладямс важодеманть. Теемс тень аволь свал шожда. Весе парсте чарькодтяно, ломантнень марто, конатне ёмавтызь малавиксэст, важодемс а шожда. Ирина Овчинникова эрьва семиянть марто важодеманть ладямсто вешни башка ёнкст, кода машты оймавты, муи эрявикс валт. Весе стакачист нолды эсензэ седеенть пачка.
– Семиятненень лездатано боевой тевтнень ветеранонь удостоверениянть теемасо, ёвтнетяно явовиця льготатнеде, кодат эрявить документт сынст максомга. Истя жо весень туртов, кинь марто важодтяно, тейтяно санаториясо-курортсо лецямонть туртов эрявиксэнть. Невтемга, монь ули истямо семия, нись санаториясо эсь шумбрачинзэ вадрялгавтсь январьстэ, мирдесь – мартсто, – ёвтни Ирина Геннадьевна. – Истя жо ютазь иень ноябрясто покш робота ветявсь боевой тевтнень ветерантнэнь диспансеризациянть коряс.
Фондонь специалисттнэ покш робота теить боевой тевтнень ветерантнэнь эрямонь сэтьме лувонтень тонадомань коряс. Ютавтовить эрьва кодат мероприятият: выставкат, концертт, вастовомат. Те весемесь пек лезды.
Неень шкасто Ирина Овчинникова важоди чавовозтнень ниле семиятнень ды боевой тевтнень вете ветерантнэнь марто. Истя жо лезкс мельга пшкалить СВО-нь участниктне ды сынст семиятне. Ды кода тешксты Ирина Геннадьевна, покш мельспаро, зярдо неть цёратнень нолдасызь отпусков ды сынь сыть сюкпрянь ёвтамо.
Ирина Геннадьевна пачтясь, боевой тевтнень ветерантнэнь ютксо, кинь марто сон важоди, ули тейтерь-ава – те Елена Викторовна Каргина, сон медик. Службанть кандсь медбатсо, идесь минек цёратнень. Февральстэ велявтсь СВО-сто.
– Аволь умок вейсэ СВО-со чавовозтнень семиятнень марто карминек пурнамо а покшке музей. Сон тееви минек райононь 1941–1945 иетнень боевой ды трудовой подвигень музеенть юрсо, – ёвтни Ирина Геннадьевна. – Мон теевинь содавиксэкс музеень прявтонть Людмила Михайловна Силиванова марто ды сынек мельс пурнамс ледстнемань кужине, конась алтави СВО-со ды боевой лия тевтнесэ чавовозтненень. Те тевенть ушодынек 2023 иень октябрясто. Вастневинек маштовозтнень малавиксэст марто, кортнинек, пурнынек эрявикс материалтнэнь. Зярдо куш аламошка мезеяк пурнылинек, семиятнень тердтнинек тей, невтинек, мезе уш теезь, ёвтнинек, кода весемесь карми седе тов. Минек Культурань центрань прявтось Юрий Николаевич Ваньков ёвтась мель теемс Славань аллея ДК-нь коридорсонть.
Минь важодтяно эрьва Героень семиянть марто, конатненень энялдынек максомс геройтнеде ёвтниця материалт, кедьёнкст. Зярс весементь саинек нурька шкас. Истя жо сынст ланга улить сёрмадовкст, конатне арсезь вейсэ тетяст-аваст, нист марто. Медальтнень ды наградатнень а сайтяно, монь койсэ, сынст ванстомат семиясо.
Музейсэнть ютавтневить вастовомат, патриотической мероприятият, эйкакштнень туртов – мужествань урокт. Покш мероприятия ютавтовсь Ленинградонть фашистэнь блокаданть эйстэ олякстомтомань 80 иетненень.
Геройтнень ине тевест ванстомга ды ледстнемга Кочкуровань районсо, кода весе республиканть келескак, панжовить мемориальной лазт, Героень партат. Истя, февральстэ мемориальной лаз ды Героень парта панжовсть Кочкуровань средней школасо. Сынь алтавить СВО-нь участникентень Виктор Владимирович Листраткиннэнь. Цёрась кассь семиявтомо, секскак Орденэсь ды удостоверениясь ванстомга максовсть школантень. Истя жо Героень партат панжовсть Булгаковасо – Кирилл Вадимович Бушуевнень, сонзэ лемсэ тесэ истя жо лемдевсь куро, Красномайской средней школасо – Дмитрий Андреевич Лабушкиннэнь.
– Нама, весе важодеманть топавтан аволь ськамон. Покш сюкпря «Защитники Отечества» фондонь региональной филиалонтень, министерстватнесэ ды ведомстватнесэ важодицятненень. Покш сюкпря Кочкуровань райононь администрациянтень ды прявтонтень Светлана Николаевна Герасимованень. Сыненст мон пшкалян весе лисиця мелявкстнэнь коряс. Специальной военной операциянь ветерантнэнень, участниктненень, сынст малавикстнэнень ды чавовозтнень семиятненень лездамось – те минек вейсэнь тев, – кемекстызе Ирина Овчинникова.
Ирина Овчинникова чачсь Отяжелесэ. Школанть прядомадо мейле тонавтнесь Н. П. Огарёв лемсэ МГУ-со «Технология производства и переработки сельскохозяйственной продукции» специальностенть коряс. Пищевой промышленностень ёнкссонть важодсь кеветее иеть.
Социальной ёнкссо важодеманть марто эсь эрямонть сюлмамга овсе а янкси, роботась тензэ мелень коряс. Сон тешксты, теи покш ды эрявикс тев.
Юлия Еремина