Четверг, августа 05, 2021
Важное

Аволь умок минек редакцияв совсесь учёноесь Владимир Кузьмич Абрамов. Сон нолдась од важодема – «Мордовский народ во второй половине ХХ – начале ХХI века (1953-2010)» монография.
Те авторонть меельце изданиязо эрзянь ды мокшонь раськенть ХХ-це пингень историянть ванноманзо коряс. Истямо покш тевенть лездасть нолдамс Россиянь гуманитарной научной фондось ды РФ-нь Образованиянь министерствась.

Историянь наукань докторось, профессорось 1990-це иетнестэ ламо важодсь салавань документтнэнь марто Московонь, Арзамасонь, Нижней Новгородонь, Самарань, Саранскоень, Пензань, Тамбовонь архивтнесэ, истя жо РФ-нь Мордовиява УФСБ-нь архивсэ. Зярыя иень перть стамбарнэ пурнась эрявикс материалт. Тенень лездасть эрицятнень сёрмадстомань (переписень) ловоматне, архивень, официальной статистикань документтнэ, справочной изданиятне ды эсест ломантнень ледстнематне.

Авторось эрьва ёндо ванны республикань эрямонть: кода эрясь велесь ды велень хозяйствась, кодамо ульнесь промышленностесь, транспортось, кудонь стявтомась, общественно-политической эрямось, ламо мель яви раськень политикантень.

В.К. Абрамов пачти, кода мольсть тевтне весе Советской Союзсонть, кодамо политика ветясть масторонь кирдийтне. Кодамо мель явсть Мордовиянтень. Невтеви перестройкань шкась. Ламо иеть ютасть, ансяк стакачитне некеть: те шкас республикань эрицятне тукшныть эрямо лия таркав, вешнить паро важодема.

Паро мельсэ ловнат, кода кассть-кемекставсть 1953-2010 иетнестэ культурась ды наукась. Панжовсть культурань ламо учрежденият, вузт, техникумт.
Книгань покш пелькс алтави эрзянь ды мокшонь национальной движениянь теевемантень. Васня 1989 иестэ панжозель «Вельмема» эрзянь движениянь курось. Седе тов – «Вайгель», мейле – «Масторава». Шкань ютазь истят вейсэндявкст панжовсть республикань томбале, косо эрить эрзятне ды мокшотне. Кода ютасть васенце Инекужотне (Съездт), тедеяк ёвтневи домкасто.

Раськень движениянть вельмевтеманзо вельде Мордовиясо панжозельть Национальной театрась, Национальной культурань институтось, кемекстазель Государственной кельтнеде законось, вельмевтевсь диаспоранть марто роботась. Кармасть явомо покш мель тиринь кельтнень тонавтомантень. Меельце иетнестэ тесэ полавтоматне аволь паро ёнов.

Авторось невти весе эрямонть: стакачитнень ды мелявкстнэнь, асатыкстнэнь ды изнявкстнэнь. Те седеяк талновты ловныцянть. Монографиясь – покш тев. Сон алтави весенень, кие яви мель минек республикань историянтень, сонзэ ломантнень эрямонтень.

Татьяна Маторкина
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».