Россиянь военной спецоперациянть ютамонь шкастонть поладови Мордовиясто гуманитарной лезксэнь ильтямось Донбассонь ды Луганской республикатнесэ эрицятненень. Ярсамопельтнень, хозяйственной товартнэнь ды строительной материалтнэнь пурныть весе вейсэ башка ломантне, промышленной ды велень хозяйствань предприятиятне, строительной организациятне, духовенствась.
Истямо паро тев ДНР-нь ды ЛНР-нь ломантненень аволь умок тейсь «Норов» Агропроизводственной фирмась, сынь тов ильтясть аволь ансяк эсест хозяйствасо теевиця экологиянь коряс ванькс продукция, истя жо ламо эрьва мезе рамсесть лавкатнестэ. Малав кавтосядт тёжат целковоень питнес ули-паронть сынь ильтизь эсест транспортсо спецоперациянь ютавтомань границянть видьс. Теде башка, кода пачтинек тиринь газетань лопатнесэ, «Норов» велень хозяйствань фирмась те иень тунда тосто сазь зярыя семият сайсь эстест эрямо ды важодеме. Течи минек редакциянь инженек «Норов» Аграрно-производственной фирмань генеральной директорось Дмитрий Александрович ПОЗДНЯКОВ. Максстано сонензэ вал:
– Неень шкане ламо кортави ды тееви Россиянь военнойтнень спецоперациянть коряс. Апак кавтолдо мерян, сон ушодовсь шкастонзо ды ютавтови тевень-лувонь содазь.
Сень, мезенть минь течи редятано СМИ-тнень вельде, те, васняяк, ломантнень эрямост, тосо уликс инфраструктуранть ванстомась. Неть тевтне кортыть седе, минь а явнотано эсенексетнень ды аволь эсенексетнень.
Тешкстаса, минь эстенек саинек ниле семият, кить понгсть истямо стакачис. Меельце кавксо иетнень перть Луганской Республикасо сынст эрямодост кунсоломсто, пек стака марямс, кода тенст савсь майсемс. Неть сеть ломантне, кинень колоньгемень, ведьгемень иеть, сынст улить эйкакшост, сынст эрямост кисэ пек мелявтыть тетятне-аватне. Вейке семиясо кавто эйкакшт пек вишкинеть. Невтемакс, колмо иесэ цёрыненть лангс ванат (сон чачсь аволь сэтьме иетнестэ) ды редят вишкиненть сельмстэ покш ломанень варштавкс. Ансяк те вейке варштавксось минек кармавты улемс седеймарицякс. Эдь миненек аволь ялатеке, мезе карми те цёрыненть ды ламо эштё тосо уликс эйкакштнень марто.
Койсэнь, миненек а эряви кадовомс мельтемекс те кажонть коряс. Весенень чарькодема, эдь кортамось моли аволь ансяк Донецкой ды Луганской республикатнеде. Кортамось моли Рузонь мирдэнть.
Рузонь мирэсь – те аволь ансяк рузтнэ. Неть: Мордовиясо, Чечнясо, Татарстансо ды ламо лия республикатнесэ эрицятне. Весе сеть, кинь ули мелест эрямс сэтьмечисэ, кить вейсэндявить ды теить весементь минек питнейчитнень ванстомга. Видьстэ меремс, спецоперациясь невтизе тенек, кить арсиця ломанть, конат аштить нравственной принциптнень кисэ, кить жо анокт куш кода сёпомс, кода алкукс ютыть тевтне. Сынь манчить эрьва эскельксэнь теемстэ аволь ансяк вейкест-вейкест – весень.
Кие соды, кода бу улевель сестэ, бути шкастонзо аволь ушодово те спецоперациясь. Нать, улевель ков седе берянь. Нейгак, спецоперациянть ютавтомсто, секе тев редявить тамашань тевть минек масторонь границятнень лангсо. Ледстясынек истят оштнень кода Клиницы, Брянск, Белгород. Те весе минек маласо, те – Россия. Тосо эрить рузонь ды лия раськень ломанть. Ризксэнтень, тосо секе тев колсеви сынст сэтьме эрямось.
Тешкстаса, аволь пек умок «Норов» Аграрно-производственной фирманть пельде минек солдаттнэнень ильтинек благотворительной лезкс, пачтинек сонзэ Украинанть марто границянтень Белгородской областенть видьс. Минь чарькодтяно, кода а шожда тосо неень шкане солдаттнэнень, ансяк сынь теить весементь тосонь ломантнень эрямост ванстомга.
Неть событиятнеде марязь, миненек седеяк покш мель явома од ломантненень, патриотической лувсо сынст кастомантень.
Невтемакс, эсь коллективсэнек минь од ломантнень марто, кинень 22-26 иеть, ютавтнетяно вастовомат, конатнесэ бажатано толковамс тенст а чарькодевиця кевкстематнень. Неть: од механизаторт, водительть, трактористт. Виде, те важодеманть эряви ушодомс эйдень кужосто, школасто саезь.
Эряви толковамс одтнэнень, кодамо шкасто течи эрятано, штобу сынь парсте содавлизь историянть, кода стака ульнесь минек тетятненень, покштятненень Ине Отечественной войнань шкастонть. Кодамо эрявикс тев минек солдаттнэ ды офицертнэ топавтыть ней, спецоперациянть ютавтомсто.
Кодамо лезкс течи эряви минек ёндо? Каршо валось истямо: эрьвась эсензэ таркасо кадык алкукс топавты эсь тевензэ. Невтемакс, кодамо профессиясо ломанесь аволь важоде: сюро касты, эйкакшт тонавты, ломанть леци, статьят сёрмады, лавкасо микшни – кадык эрьвась эсензэ тевензэ топавты кода эряви, кода веши неень шкась. Бути эрьвась юткстонок неть вешематнень топавтсынзе, те карми улеме сехте покш путовксокс. Те арсеманть ёвтызе тенек масторонь Президентэсь аволь умок Россиянь кенярксчинть тешкстамсто. Ушодозь тевенть эряви прядомс, ансяк бу а лоткамс пеле ки лангс. Тень ловозь, миненек эрьва ёндо эряви лездамс кода моральна, истя материальна. Васняяк, весементь теема ломантнень эрямост паролгавтомга, седе ламо вадря тевть эрицятнень лезэс, штобу сынь авольть маря стакачить эрьва чинь тевтнесэ. Лездамс вейке-вейкенень, а сёвномс, улемс седеймариця, паро ломанекс. Эдь тень кисэ кодаткак ярмакт пандомс а эряви. Те весе ашти минек эйстэ. Тонадомс вейке-вейкень чумонь нолдамо, а явомс мель сенень, мезесь а тукшны мелезэнек, ды бажамс теемс седе ламо паро тевть!