Четверг, августа 05, 2021
Важное


Май ковось ламонь туртов кенярксчинь ков – Тундонь ды трудонь покш чить, Изнямонь чи, пиже Троиця ды тонавтнема иень прядовома. Ансяк аволь весе содыть, кодамо раужо чи ули те тундонь ды кенярксов ковсонть…


1938 иень маень 23-це чистэ ютасть «сталинэнь репрессиянь» минек раськень интеллигенциянь маштоматне. Те шкас те темась талновты ламонь, репрессированной ломантнень эйкакшост ды нуцькаст, весень, кить ванныть Россиянь трагедиянь сехте кежей шканть. Варштасынек историянть.

А лововияк, зяро ломань лангс стяко манчесть. Васенцекс чумондомс понгсь эрзянь ды мокшонь раськень интеллигенциясь. Минек ёнкссо школатнень кармасть панжтнеме 1920-30-це иетнестэ, сёрмас эзть сода. Седе, кодат стакачить ды мелявкст ульнесть тонавтыцятнень, конатнень кучизь эрзянь ды мокшонь велетнева, парсте ёвтневи Леонид Макуловонь «Учительница» книгасонть. «Вана Мордовияськак, ансяк 1934 иестэ тензэ макссть автономной республикань статус, ушодсь виевстэ важодеме. Республикав тердезельть тонавтозь ды содавикс ломанть, конат анокт максомс паро содамочить, кепедемс мокшэрзянь культуранть».

Ёвтнетяно ломантнеде.

Вана ансяк зярыя лемть, конатнень вачкодизь васенцекс: ансяк панжозь педагогической институтонь прявтось А.Ф. Антонов, эрзянь васенце профессорось А.П. Рябов, профессиональной васенце ютавтыцясь В.П. Рябов, Мордовиянь судебной системань ладицясь, дипломатось-международникесь Т.В. Васильев, учёнойтне Ф.И. Петербургский, С.И. Сумбаев ды ламо лият, эрзянь ды мокшонь культурань научно-исследовательской институтонь прявтось И.С. Поздяев (псевдонимезэ Сибиряк) ды тосонь важодицятне. Писательтне: И.П. Кривошеев, Я. Григошин, Ф. Чесноков, П. Левчаев ды лият.

Пётр Левчаев чумондозель 1938 иестэ политической статьянь коряс, кие соды мезень кис ульнесь Колымасо. Пекстамодонзо мейле кулось вишка цёрынезэ, ризкстэнть тусь эрямосто авазо. Колымадо мейле арестовизь эштё весть ды кучизь Северэв «свалшкань поселенияв». 1955 иестэ ютась реабилитация.

Чумондомась истямоль: «Финнэнь разведкав шпионажонь кисэ». Арседе тынсь, мезе сась превезэст – буто Саранскойстэ Хельсинкив мода потмова кинь чувома. Мейс ульнесть репрессиятне? Сынь пельсть, ломантне превиить, кармить чарькодеме: косо видечись, а косо манчемась. Секскак васенцекс кармасть истожамо важодицятнень, превейтнень, интеллигентной ломантнень. Мордовиясо ламо маштсть велень эрицят. Кинь ледизь, кинь панизь васов, кие кулось лагерьсэ… Маштозель 651 священнослужитель.

Те шкане минек масторонь весе вийтне ветясть тюрема «народонь яттнэнь» марто. Те – эсь раськенть каршо покш преступления. Валт а муят, кода лемдемс сынст апаро тевест.
Кода ютась «тевтнень стряпамост» коряс роботась? Чумондомань коряс арсезель теемс орган, козо совасть НКВД-нь ломань, прокурор ды секретарь. Шкань ютазь кармасть лемдеме сонзэ «тройкакс». Те органось кочкась чумондома – ледема эли лагерьс панема. «Нормакс» ульнесть чизэнзэ вете «признаниятне». Чарькодеви, чумондовицятне, тонавтыцятне, писательтне, сокицятне-видицятне, натой студенттнэ ды школань тонавтницятне, эзть кеме чумондомантень ды чаво валтнэс. Сынь ацирьгалесть: истямо тев арасель! Кевкстнематне мольсть зярыя часонь перть. Тень пингстэ чавность ды нарьгасть ломантнень лангсо.

Саранскойсэ те лувонть сайнизе НКВД-нь вейке начальникесь, ундоксонзо дворянонь. Самай сонзэ пингстэ кузтемлангсто ёртызь поэтэнть Григошинэнь нинзэ. Сонзэ ульнесть ниле эйкакшонзо ды сакшнось роботань вешеме. Красовский марто вастовоманть парсте ёвтнизе И.П. Кривошеевень низэ Анна Семёновна. Мирденть бажасть чумондомс 58-це статьянть коряс, ансяк тенст кодаяк эзть муеве алкуксонь чумондомат. Туемс ледеманть эйстэ тензэ лездась Бериянь «самось», кона нолдась указ «58-це политическоенть» коряс нолдавтомс пекстазтнень.

Тевс нолдасть «крёст» нарьгамонть. Илья Петровичнень эрявсь венстязь кедьсэнзэ кирдемс шампанскоень кавто суликат, конат пештязь леень чувардо. Кодак ансяк кедтне аламодо новолить сталмодонть, ушодыльть пильгесэ-кемсэ чавомо. Пстиесть пря лангаяк.
Ломантнень маштсть тумонь табуреткасо, повасть кшнань каркссо, озавтнесть прянзо лангс велявтозь стулонь ве пильге лангс. Сехте тандавтыця нарьгамось – кшнинь молоткасо пря ланга чавомась.
Ежовонь панемадо ды Бериянь самодо мейле «народонь яттнэнь сехте покш кундыцятнень» учось текесь. Саемга, Саранскоень НКВД-нь прявтось Ванд, зярдо чарькодсь, репрессиятне – Россиянь сехте паро ломантнень истожамо, кармась ютамо каршо. Бажась муемс видечи весе тевтнесэ. Сонзэ пекстызь ды ледизь.

Сталинэнь репрессиянь шкатнестэ сехте пек понгсь республикань раськень культурань элитантень. Пекстазель Мордовиянь Писателень союзось, лоткасть лиснеме эрзянь ды мокшонь кельсэ журналтнэ. Те ульнесь раськень культурань ёмавтома. Сынь бажасть истожамс кельтнень. Тейсть весементь, ломантнень интеллектуально-нравственной ёжост улевель алкинекс.

Репрессиятнесэ чавовсь Фёдор Чесноков писателесь. 18 иес пекстазель Яков Кулдуркаев, тосто сась аволь шумбра ломанекс. Ялакстнэ Рябовтне тейсть покш путовкс минек культурантень. Анатолий Павлович эрясь ансяк 44 иеть, тейсь покш тевть – келень коряс малав 30 научной важодемат, культурань коряс ламо тевть ветясь Московсо. 1938 иень маень 23-це чинь вестэ сон ды ялаксозо, лия валдо прев ломантне ледезельть Саранскоень НКВД-нь тюрьмасо. Кулозтнень ёртнесть латкос ды те шкас те таркась апак муе.

Ней сась шка муемс, косо сынь калмазь. Ванстовсть архивтне. Малавиксэст – весе сыре ломанть ды а содыть, ков сюконямс. Покш тев ветить поисковой отрядтнэ, тень кис тенст сюкпря. Тенень эряви явомс мель весенень. А эряви чатьмонемс те стака шкадонть, таргамс лангс амазый тевтнень.

Анжелика Горбунова,
Россиянь Писателень союзонь член.
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».