Сентябрянь 1-це чистэ Ицялбуень Сырезьвелень (Береговые Сыреси) школав васенце классос састь кавто эйкакшт. Неть – Ульяна Сесорова ды Егор Липатов. Сынст мельспаросо вастынзе тонавтыцяст Наталья Викторовна Миронова. Ней эйкакштнень туртов ушодови од эрямо, кармить пурнамо превть ды молеме ансяк икелев.
Те веленть школась икеле ульнесь вейксэ иень. 2006 иестэ ютась школатнень реорганизация. Сырезьвелесэ стявтсть од школа. Шабра Селища велень таштонть пекстызь, эйкакштнень ды тонавтыцятнень ютавтызь тей, школась кармась средней общеобразовательной учреждениякс. Эйкакштнень марто тей састь важодеме Селищань весе тонавтыцятне.
– Течи минек школасо 51 тонавтниця. Меельце иетнестэ маласо аштиця велетнесэ школатне пекставсть, эйкакштнеде аламо. Секскак кавто автобуссо усксетяно тонавтницят Селищасто, Пардэлестэ, Вечкезьвелестэ, Сакулькасто, Полдаськасто, Инелейстэ, Тархановасто. Омбоце классонок арась, эзь пурнаво. 9-це классо тонавтни 11 эйкакш. Вейксэце классто мейле ламот тукшныть, тедедеяк кото тусть, кадовсть ниле тонавтницят. Тонавтнемань те иестэнть улить полавтоманок: учебно-воспитательной тевтнень коряс прявтонь полавтыцякс ладязь Валентина Николаевна Митронина, воспитаниянь коряс прявтонь советникекс – Мария Александровна Поляева. Минек кедьсэ весемезэ важодить кеветее тонавтыцят. Учительтне сатныть. Нама, паро улевель, савольть тенек од тонавтыцят. Од ломантне свал совавтыть эрямонтень, коллективентень мезе-бути од. Минек туемадо мейле эряви кадомс школанть кеме кедьс. Кемтяно, школась седе товгак карми эрямо, вишка эйкакшт эштё улить, – ёвтни тенек Сырезьвелень школань прявтось Вера Романовна Сидельникова.
Эрьва пондельникстэ эйкакштне кепедить Россиянь флагонть, сынст марто ютыть «Эрявикстэ кортамот». Школасонть важодить зярыя кружокт. Райононь эйкакшонь творчествань кудонть пельде робототехникань кружоконть вети А.А. Логинов. Эйкакшонь искусствань школанть пельде – чувтосто керсемань кружок. Сонзэ вети содавикс мастерэсь, тонавтыцясь П. П. Першин. Чувтосто керсеме тонавтнить цёрынетне ды мель тенень явить тейтернетнеяк. Сынь покш мельсэ яксить кружоконтень. Важодемаст невтевить республикань ды регионъютконь пелькстамотнесэ. Пётр Павлович свал бажи саемс эйкакштнень ковгак конкурсов эли ушосо ютавтовиця фестивалев.
Колмоце ие школасонть важоди «Точка роста» естественно-научной ды технологической ёнксонь образованиянь центрась (сон панжозь «Образование» национальной проектэнть лувсо). Занятиятне ютыть 7-11-це класстнэсэ тонавтницятнень туртов, экскурсияв тов сакшныть 5-6-це класстнэ. Эйкакштнень марто важодить колмо тонавтыцят. Биологиянть ды химиянть вети В.И. Абрамова, физиканть – И. А. Аверкин, информатиканть – А.А. Логинов.
Кода пачтясь школань прявтось, школасонть ули весе эрявикс оборудованиясь. Эрьва классо улить тонавтыцянь важодема тарка, ноутбукт. Улить интерактивной лазт, конат лездыть уроктнесэ. Спортзалскак весе эрявикс спортинвентаресь рамазь. Ламо иень перть школась кирди эсензэ пире. Тесэ озавтнить модамарть, чурькат, капстат, морковт, якстерькай. Весе эмежтне молить тескень столовоев, сынь сатыть иень перть. Зярдо минь пачколинек Сырезьвелев, эйкакштне ды тонавтыцятне таргасть модамаренть. Тедеде тесэ, кода лия таркатнесэяк, сон чачсь паро.
– Минек тонавтницятне невтнить пряст республикань ды весероссиянь эрьва кодамо пелькстамотнесэ. Тедеде 8-це классо тонавтницясь Алина Пискайкина казевсь МР-нь Прявтонь премиясо. Сон – Сакулькань. Истя жо эрзянь ды мокшонь келень ды литературань весероссиянь олимпиадасонть улить изницянок. Вадим Пискайкин лиснесь изницякс, Виктория Пискайкина – призёрокс. Сынь вейке семиясто, тонавтнемантень явить покш мель. Аваст, Лариса Викторовна, важоди тесэ тонавтыцякс. Кода-бути Вадим кандсь школав баян, сонсь тонавтни эйсэнзэ налксеме. Кизна ульнесь «Эряк, тиринь кель!» регионъютконь эйкакшонь лагерьсэ. Тосояк парсте невтизе прянзо, кучсть тенек благодарность. Меельце кемзисемге иетнень перть школасонок ульнесть 19 медалистт, – ёвтни Вера Сидельникова.
Вера Романовна чачсь теке велесэнть. Школанть прядомадо мейле мольсь тонавтнеме Ицялонь педагогической училищав. Седе тов заочна тонавтнесь М. Е. Евсевьев лемсэ МГПИ-нь (ней – МГПУ) физикань-математикань факультетсэ. Васня направлениянь коряс кучокшнызь важодеме Саранскоень школав. Весть вастовсь велень тонавтыцянзо марто (конань лангс ванозь, сон мольськак тонавтнеме учителекс), лембестэ кортасть, тона мерсь, карми туеме пенсияв, кадык сы тарказонзо. Вера Романовна сась ды эштё усксь мартонзо школав важодеме ялгаяк. Васня важодсь вишка класстнэсэ тонавтыцякс, мейле кармась ветямо математика. Кавксо иень ютазь, 1986 иестэ, ладизь школань прявтокс. Сон талакадсь, кудосо кавто вишка эйкакшт. Пшкадсь ававтонзо туртов, конань марто вейсэ эрясть, кевкстизе: мезе теемс, кода улемс. Тона алтась лездамс эйкакштнень марто, ваномс сынст. Ды покш сюкпря тензэ ёвты тень кисэ. Вера Романовна 45 иеть школасо, сынст ютксто 37 иеть – школань прявт.
– Нама, стакачитнеде ламо ульнесть. Ялатеке важодемам пек вечкса. Сакшнан тей валске марто 7 чассто, зярс кияк арась, сэтьме ды ванькс. Тевтнеде ламо ды эряви кенеремс весементь теемс. Чокшнеяк, эрси, кувать кирдеван. Зярдо вечкат сень, мезенть теят, сестэ кодаткак стакачить а неят. Минек тесэ теке кудосо – ояксчи, вейке-вейкень чарькодема. Свал кортнян тетятнень-аватнень марто, ёвтан тенст сюкпря эйкакштнень кисэ, – корты Вера Романовна, кона пек мелявты школанть кисэ. Сон казезь «МР-нь образованиянь заслуженной роботник» почётонь лемсэ.
Малав ниленьгемень иеть тонавтыцянь стажозо Раиса Викторовна Шаляевань. Сон чачсь Селищасо. Прядызе Н. П. Огарёв лемсэ МГУ-нь филологиянь факультетэнь эрзянь отделениянть. Школасо роботамо кармась 1983 иестэ саезь. Селищань школанть ютавтызь тей, сон поладсь важодеме воспитательной тевтнень коряс школань прявтонь полавтыцякс ды вети эрзянь келень урокт. Сырезьвелень школасо тонавтнить човор эрзят ды рузт. 2-7-це класстнэсэ тонавтницятненень недлязонзо весть юты эрзянь келень электив.
– Эйкакштнень марто бажатано седе ламо кортамс эрзянь кельсэ. Уроктне ютыть эрзянь келень кабинетсэ, косо ули весе эрявиксэсь. Паро, нолдавольтькак тенек од учебникть. Эйкакштнень марто моратано, кишттяно, путнетяно сценкат. Эрьва ие тешкстатано Эрзянь келень чинть, – ёвтни Раиса Викторовна.
2012 иестэ кабинетэст сайсь колмоце тарка «Эрзянь келень сехте паро кабинет» республикань пелькстамосо. Р. В. Шаляева 2012, 2023 иетнестэ невтнизе прянзо «Эрзянь келень сехте паро тонавтыця» республикань пелькстамосонть. Совась вете сехте паро тонавтыцятнень юткс. Мелят «Театральное Приволжье» пелькстамосонть эйкакштнень марто невтизь С. М. Люлякинань сценканть, сайсть омбоце тарка.
Школанть юрсо важоди эйдень кужояк. Сонзэ прявтсо – А. Н. Балакина. Тей яксить кавксо эйдеть. Усксить шабра велетнестэ. Сырезьвелесэ, школадонть ды эйдень кужодонть башка, улить почта, клуб, лецямонь амбулатория, кавто лавкат. Эйкакштнень туртов панжозь хоккеень корт. Веленть виевгавтомга покш путовксозо велень поселениянь икелень прявтонть А.К. Пискайкинэнь (ризксэнтень, сон тусь эрямосто). Ней сонзэ таркасо важоди В. Т. Борисов. Тешкстасынек, Сырезьвелентень кандови эштё кевейкее веле.
Татьяна Маторкина
Фототне Эдуард Ретунскиень