«Жилье и городская среда» национальной проектэнь «Формирование комфортной городской среды» федеральной проектэсь ушодызе важодеманзо РФ-нь Президентэнть кармавтоманзо коряс. Истя, Мордовиянь Зубова-Полянань районсо те проектэнтень явить мель Зубова-Полянань, Явасонь ды Уметонь ошонь поселениятне.
Программанть вельде меельце вете иетнень перть общественной ды кудотнень перька таркатнень витнемаст коряс теезь покш тевть. Тень лангс явозельть ярмакт федеральной, региональной ды муниципальной бюджеттнэстэ. Ломантне сынсь ёвтызь мелест, максызь вайгелест – кона тарканть эряви паролгавтомс. Истя, 2021 иестэ Зубова-Полянань райононь эрицятне Весероссиянь рейтингсэ максызь вайгелест Зубова-Поляна посёлкасо культурань ды оймсемань парконть кисэ. Нурька шкас ташто паркось теевсь асодавиксэкс: теезь ялго якамонь вадря яннэть, велосипедсэ ардомань ки, ладязь эземть ды шукшонь пурнамонь паргот. Теде башка, теезь истямо валдомтомка, конась чокшне ланга седеяк мазылгавтызе парконть.
Оймсемань ды культурань парксонть озавтозь чувтт, куракшт ды гортензиянь цецят. Паролгавтомась поладови седе товгак, тедеде тей ускить эйкакшонь налксемань площадка, теить кизэнь эстрада ды оймсемань башка таркинеть.
«Формирование комфортной городской среды» федеральной проектэнть лувсо Зубова-Полянань районсо 2018 иестэ саезь паролгавтозь кудотнень перька 43 таркат. 2017 иестэ пилотной проектэнть лувсо витнезь Герценэнь, Гоголень, Новиков-Прибоень ульцятнесэ 9 кудотнень перька таркатне. 2018 иестэ паролгавтозь Советская ды Тургеневень куротнесэ 8 таркат. 2019 иестэ – Советская ды Тургеневень куротнесэ 6 кудотнень перька. 2020 иестэ – Новиков-Прибоень ульцясо 7 кудотнень перька таркатне. 2021 иестэ – Студенческая ды Тракторной бригадирэнь школа посёлкасо кавто кудотнень вакссо. Ней тесэнь эрицятне кецнить – ули асфальтонь ки ды ялго якамонь таркат, эрьва подъездэнть вакссо мазый эземнеть, неень шкань валдомтомкат.
Уметонь ошонь поселениясо меельце вете иетнень перть витнезь вете кудотнень перька таркатне. Явасонь ошонь поселениясонть 2020 иестэ паролгавтозь Дзержинскоень куросонть кото кудотнень перька таркатне. Федеральной проектэсь карми важодеме 2030 иес.
* * *
Меельце вете иетнень перть Темников ошсо «Формирование комфортной городской среды» федеральной проектэнть вельде паролгавтозь кудотнень перька сисем таркат ды общественной колмо территорият. Кавтотне паролгавтозь «Лучший проект создания комфортной городской среды» Весероссиянь конкурссо изнямонть вельде. Темников ошсо витнезь-петнезь ошонь центральной исторической пельксэсь, Советской Союзонь Героенть С. В. Астраханцев лемсэ паркось, «Раздолье» паркось.
2023 иестэ Темников ошось таго лиссь конкурсонь изницякс. Ней паролгавтови Ленинэнь курось. Сон сюлмасынзе витнезь парктнень ды ошонь центранть. Проектэнть топавтомс явозь 73 млн. целковойть. Неень шкане вешневить подрядной организацият, конат кармить тееме строительно-монтажной тевтнень. Важодеманть арсеви прядомс те иень сёксня.