Отяжбуень Сабанцелень эрицятне иестэ иес неить вадря полавтомат. «Комплексное развитие сельских территорий» программанть коряс велень школанть вакссо теезель спортонь туртов неень шкань площадка вадря ацавкс ды эрьва кодамо тренажёр марто, козонь эсь виест ды ёрокчист невтнеме сакшныть аволь ансяк теке велень, шабра велетнень эрицятнеяк.
Ютазь иень кизна велесэнть витневсь-одкстомтовсь 1941-1945 иетнестэ Ине Отечественной войнасо чавовозтненень кеврунгось. Сон ашти Культурань кудонть ды церькованть маласо. Лиякс меремс, Сабанцелень куншкакуросо теевсь алкуксонь культурно-исторической комплекс.
Ансяк вана весе те мазычинть аламодо колась колоньгемень иеде икеле теезь кись. Нама, зярдо-бути асфальтонь кись велень эрицятнень туртов ульнесь покш кенярксокс. Ансяк вана меельце иетнестэ сон весе порксавсь, ардомс сави састо, секень вант, латкос эшкеват.
Эрицятне ламоксть сёрмадсть эрьва ков, пшкалесть депутаттнэнень, вешсть од ки, ды вана сынст вайгелест маризь.
Тедедень майстэ «Комплексное развитие сельских территорий» федеральной программанть юрсо тесэ ушодозельть од кинь теемань коряс роботатне. Кись ушодови автобусонь лотксема таркастонть, юты Октябрьской курованть ды пачкоди ловсонь-товарной фермантень. Кувалмозо – вейке пель марто вайгельбе. Питнезэ стясь 17,5 миллионт целковойть. Августсто малав весе роботатне прядозельть.
Эряви тешкстамс, миллиондо ламо целковойтнень явинзе тесэнь велень хозяйствань предприятиясь – «Сабанчеевское» ООО-сь, конань прявтсо Дмитрий Николаевич Игушкин. Предприятиясь эсь лангс саизе проектно-сметной документациянь анокстамонтькак.
Истя жо ёвтама, «Сабанчеевское» ООО-сь тейсь велентень эштё вейке покш казне. Велень хозяйствань предприятиянть вийсэ теевсь вадря ки велень калмазырентень. Сон ашти аламодо ве ёно прявт килангонть эйстэ ды тезэнь вадря вельтявкс теезь зярдояк арасель. Ней жо куш кодамо шкасто калмазыренть малас ардоват мелявкстомо. Тень кисэ Сабанцелень эрицятне ёвтыть покш сюкпря Д. Н. Игушкиннэнь.
Тедедень сентябрясто-октябрясто жо одкстомтозель эштё вейке ульцянь килангось. Россиянь Президентэнть В. В. Путинэнь мереманзо коряс Резервной фондсто Мордовиянтень явозельть 500 млн целковойть китнень теемс. Сабанцелесэ сынст вельде асфальтсо вельтязель Советской ульцянь вейке вайгельбесь.
Юлия Еремина