МР-нь Някань государственной театрасо анокстыть путомо од спектакля. Эрьва чи молить репетицият. Вишка ваныцятнень учи «Красная Шапочка и Серый Волк» ёвксось. Пьесань авторось ды путыцясь – РФ-нь искусствань заслуженной деятелесь В. И. Бирюков.
Сон важоди Пензань Някань театрасо художественной руководителекс. Теде башка, путни спектаклят Россиянь эрьва кодамо ошсо. Минек республикав тердизь путомо васенцеде. Кодамо карми спектаклясь, теде ёвтнесь газетанок туртов.
– «Красная Шапочка» – ёвкс, конань содасызь ды вечксызь весе эйкакштне. Арсян, сонзэ а эряви полавтнемс неень шкань вешематнень коряс. Те пьесанть путокшныя эсень театрасо 30 иеде икеле ды свал арсинь путомс одс. Французонь ды рузонь ёвкстнэ пек явовить вейкест-вейкест эйстэ. Минь бажатано теемс французонь тешкс марто. Ламо театратнесэ прявт героинятнень, саемга, Золушканть, Якстере Шапочканть невтить вейкетьстэ: виздицякс-пелицякс, сэтьмекс. Минек жо Якстере Шапочкась – лия ёнов а молиця. Семиясо сон лидер. Мездеяк а пелиця, дерзкой. Сон сыргась ськамонзо бабанстэнь ды киненьгак а максы прянзо лоткавтомс. Эдь весе эйкакштне эрьва кодат. Тейтернетнеяк ветить пряст теке цёрынеть: тюрить, налксить-чийнить ансяк цёрынетнень марто, а кирдевикст. Минь невтьсынек эйкакшонь историянть, кона васенцеде кадови ськамонзо, ды кода карми ветямо прянзо. Те – эйкакш, сон весементень яви мель, соды ды ванкшны перьканзо неезенть, дивси ды теньсэ явови покш ломанденть, – ёвтнесь В.И. Бирюков.
Спектаклясонть налксить вете актёрт: МР-нь заслуженной артисткась Елена Романовская, Елена Лугаськова, Иван Чиндяйкин, Вера Ваганова ды Галина Хамова. Галина самай налкси Якстере Шапочкань. Кода тешксты режиссёрось, од тейтересь парсте невти образонть. Верьгизэсь те спектаклясонть карми аволь истямокс, кода весе лия ёвкстнэсэ, сон тесэ – интеллигентной ракша.
Путовкссонть ваныцятне редясызь Франциянь колоритэнть, тесэ виресь невтеви цецяпусмокс, конась чары-вели карусель ладсо. Эряви меремс, художникесь Санкт-Петербургонь, содавикс сценографось Алевтина Торик, конань важодеманзо изнякшность «Золотая маска» премиянть.
Спектаклясь путови «Единая Россия» партиянь «Культура малой Родины» федеральной партийной проектэнть вельде. Сонзэ премьеразо карми ноябрянь 25-26-це читнестэ 11:00 ды 13:00 чассто.
Татьяна Маторкина