Покш Игнатовань райононь Культурань кудосо ютась артыцянть Алексей Жегалинэнь картинанзо выставка «Тиринь ёнксонть мазычизэ» лементь ало. Сонзэ пурныцякс ды ютавтыцякс кармась художникенть авазо – педагогической трудонь ветеранось, РФ-нь образованиянь почётной роботникесь, МР-нь заслуженной тонавтыцясь Р. Д. Жегалина. Алексеень важодеманзо весе вейс пурназельть васенцеде. Пек ламо картинанзо ванстовить частной коллекциява. Сынь улить О. М. Полякинань, Н.С. Сапаревань, В. Г. Доронинэнь, Т. А. Краснощёковань, М. П. Асмановань ды лиятнень кедьсэ.
Алексей Жегалинэнь картинанзо лангс ванозь, арсят, нать, сон уш вишка пингестэ саезь арты. Сынь истят мазыйть, эрьва тешксэсь, эрьва тюсось аштить таркасост. Алкукс жо сонзэ ёрокчись кирвазсь Ицялонь педагогической колледжсэ тонавтнемстэ, сон кочкизе художественно-графической отделениянть. Теде икеле тонавтнесь трактористэкс-машинистэкс. Сынст семиясо ламот явсть мель творчествантень. Алексеень лелязо ды покштязо вадрясто артсть, тетязо сёрмадсь стихть, авазояк – творческой ломань. Сонензэяк ютась Пазонь сяткинесь.
Кода ледстнесть те вастовомасонть колледжень педагогтне ды ве курссо тонавтницятне, Алексей ламо важодсь картинатнень лангсо. Эзь вечке тееме ланга-прява. Явсь мель акварельной живописентень. Натой армиясо служамстояк эзизе кадно артоманть.
2000-це иетнестэ живописенть вельде трясь прянзояк. Ламо картинат артсь микшнемс, кой-кить тейнесть заказт. Седеяк ламо важодеманзо казнесь малавикстнэнь, ялгатнень, содавикстнэнь туртов.
– Сонзэ а кармавтсак озамс мольберт экшс, бути арасель мелезэ эли оймеёжозо. Зярдо жо кундыль тевс, весе шканзо ютавтыль картинанть велькссэ, стувтыль весе лия тевтнеде. Сехте стакакс ульнесь меельце пельксэсь – детальтнень лангсо важодемась. Сон стамбарнэ артыль лопинетнень, цецятнень, тикшинетнень, – ёвтнесь авазо Римма Дмитриевна.
Выставкантень сакшнось артыцянть сазорозо Марина Сидорова.
– Аволь весть ванынь, кода Алексей котьми картинатнень велькссэ. Мон варштавлинь, мезе тосо лиссь, сон лоткавтсамам: «Аштек, тесэ эштё арсемс эряви!» Артомсто сеедьстэ кунсолось Николай Расторгуевень моронзо. Сон кадсь мельганзо валдо ды лембе ледстнемат, свал карми минек седейсэнек, – пачтясь Марина Валерьевна.
Алексеень патязо Наталья Петровна Савельева ледстни, весть кевкстизе цёранть, кода арты картинатнень: «Каршо валонзо те шкас кирдян мельсэнь: «Содат, прясон ашти весе картинась, неян сонзэ, ансяк эряви ютавтомс холст лангс».
2001 иестэ саезь 2019 иес сон сёрмадсь малав 40 важодемат, юткстост 32 картинатне невтевсть выставкасонть. Артыцясь сёрмадсь натюрмортт, варчнесь виензэ теемс содавикс картинатнень копият, ансяк сехте вечкевикс жанракс кармась пейзажось.
Алексеень ламо картинатне алтазь кизэнтень. Истя ламо пиже тюст тевс нолды, сельметь кецнить! Ды малав свал картинатнесэ ули эрьке эли лей. Сёксень ды телень пейзажтнеяк пешксеть валдодо, лембеде.
А вана тундось вастови художникенть ансяк вейке картинасонзо, конась сёрмадозь 2001 иестэ, заказ тейнесь В. В. Микаев.
– Картинасонть невтеви Ташто Чамза веленть удало килейбулось. Эйкакш пингестэ саезь вечкса те тарканть: велень цёрынетнень марто якилинек тов тундонь ушодовомсто, зярдо ансяк-ансяк лисить ловдо солазь таркатне, чипаесь карми эждеме. Мон пшкадинь Алексейнень невтемс килейбулонть картинасо, ардынек тов, сон варштызе эсь сельмесэ, мейле артызе картинанть, – ёвтнесь Василий Виссарионович.
Алексей Жегалин ульнесь аволь ансяк ёроков художникекс, сон керсесь чувтосто, явсь мель пултамонтень (выжиганиянтень). Ниле иеть тонавтсь Эйкакшонь творчествань кудосо декоративно-прикладной искусства. Чувтосто керсевкстнэнь экспозициянть выставкантень анокстызе рисованиянь тонавтыцясь, ялгазо ды наставникезэ Николай Иванович Макаров.
Алексей вечксь тейнеме фотографият, косо сеедьстэ невтевсь пертьпельксэсь. Истя жо вечксь историянть ды археологиянть. Натой мусь X–XIII-це пингень узере. Важодськак мелензэ коряс: явсь мель строителень тевтненень, пурнась металлолом.
«Тиринь ёнксонть мазычизэ» выставкась важодсь ноябрянь 4-це чистэ, ансяк вейке чи. Те чистэнть Алексейнень бу топодевельть 45 иеть. Сон апак учне тусь эрямосто кизна, се шкастонть, конантень алтась ламо артовкст.
Наталья Смирнова