Саранск ошонь культурань кудосо ютась «Сурский рубеж» военно-патриотической творчествань республикань 4-це фестивалесь. Сон алтавсь Ине Отечественной войнасо Изнямонь 78 иетненень ды Сурской оборонительной рубежень стявтомань 82 иетненень.
Ванстомань рубежень теемась мольсь 1,5 ков, 1941 иенть прядовомсто саезь 1942 иень январень 21-це чис. Моданть чувсть эйкакшт, од тейтерть, ават ды сыре ломанть. Якшамотне ульнесть -40 градуст, ломантне весементь тейсть кедьвийсэ – чувсть коймесэ, киркасо, ломсо. Эрявсь чувомс 80 вайгельбень кувалмосо рубеж, а нолдамс ятонть минек масторонть потс.
Фестиваленть прявт смустесь – ванстомс неть стака иетнеде, Мордовиянь эрицятнень фронтсо ды тылсэ ине тевдест ледстнематнень. Сонзэ ютавтыцянзо: МР-нь Культурань, национальной политикань ды архивень тевень министерствась, войнань, трудонь, вооружённой вийтнень ды правань ванстыця органтнэнь ветерантнэнь весероссиянь общественной организациянь МР-нь общественной организациясь, Республикань раськень творчествань кудось.
Лембе вал марто пурнавозтненень пшкалесть МР-нь Госсобраниянь Председателень полавтыцясь Е. П. Тюрин, ветеранонь советэнь ды комитетэнь республикань общественной вейсэндявксонь прявтось И. С. Цыганок, МР-нь культурань, национальной политикань ды архивень тевень министерствань раськетнень ютксо тевтнень коряс отделэнь прявтось А. М. Кочеваткин.
Фестивалесь эрьва ие пурны вейс школань тонавтницятнень, од ломантнень. Тедеде максозельть 119 яволявтомат. Сехте вадря номертнэ кочказельть гала-концертс. Тей сакшность республикань районтнэстэ ды Саранск ошонь округсто. Малав 30 номерт ды эрьвась токась видьстэ седейс. Театрализованной паро невтема анокстась Атемарень клубонь «Казачий край» киштемань ансамблясь. Покш Березникбуень Шугуровань школань тонавтницясь Александр Ромашкин эрзянь кельсэ ловнось В. Головановонь «Сурский рубеж» стихть. Пек лембестэ вастозель Орданьбуень эйкакшонь искусствань школань «Юность» морамонь ансамблясь. Сынь морызь «Русь называют святою» моронть. Кода пачтясь коллективенть ветицясь Олеся Майорова, ансамблянть сон пурнызе кото иеде икеле. Сынь морсить военно-патриотической ды духовной морот. Мелят ды тедеде «Сурань рубеж» фестивальсэнть эсь номинациясост сайсть васенце тарка. «Истят фестивальтне минек эйкакштненень кандыть покш лезэ, тонавтыть сынст вечкеме тиринь масторонть, кепедить мельёжост, сюкпря ютавтыцятненень», – мерсь Олеся Майорова.
Татьяна Маторкина